
ඉරානයට එරෙහිව එල්ල වූ අමෙරිකානු - ඊශ්රායල ප්රහාර හේතුවෙන් ළමුන් 623 දෙනෙකු ජීවිතක්ෂයට පත්ව ඇති බව ඉරානයේ කාන්තා හා පවුල් කටයුතු පිළිබඳ උප ජනාධිපතිනී Zahra Behrouz-Azar ප්රකාශ කළාය.
ඉරිදා (22) පැවති උත්සවයක් අමතමින් ඇය මේ බව සඳහන් කළ අතර, ඉරානයේ අනාගතය නියෝජනය කළ තරුණ ජීවිත අහිමි වීම පිළිබඳව සිය බලවත් ශෝකය පළ කර ඇත.
දෙවන සහ තෙවන ආරක්ෂක සටන්වලදී මියගිය දරුවන්ගේ සහ යෞවනයන්ගේ පවුල් වෙත සිය උපහාරය පුද කරමින් බෙහ්රූස්-අසාර් උප ජනාධිපතිනිය පවසා ඇත්තේ,
"මෑතකදී අප මත පැටවූ යුද්ධවලදී අපේ දරුවන්ට සිදුවූ දේ ඉතා කටුකයි. ඉරානයේ බලාපොරොත්තුව වූ සහ ඉරානයේ ඉරණම තීරණය කිරීමට සිටි වටිනා තරුණ ජීවිත 623 ක් දිවි පිදුවා. අපට ඔවුන් අහිමි වුණා."
මෙම ප්රහාර හේතුවෙන් මියගිය පිරිසට අමතරව තවත් විශාල ළමුන් පිරිසක් තුවාල ලබා ඇති බවද ඇය පෙන්වා දී තිබේ.
යුද ගැටුම්වල සෘජු බලපෑමට අමතරව, ආර්ථික සම්බාධක සහ මූල්ය පීඩනයන් ද දරුවන්ගේ ජීවිතවලට දැඩි ලෙස බලපා ඇති බව උප ජනාධිපතිනිය අවධාරණය කරයි.
විශේෂිත ඖෂධ මත යැපෙන දුර්ලභ හා බරපතළ රෝගවලින් පෙළෙන දරුවන් මුහුණ දෙන දුෂ්කරතා පිළිබඳව ඇය කරුණු පැහැදිලි කර ඇති බව සඳහන් වේ.
දේශීය ඖෂධ නිෂ්පාදනාගාර වෙත එල්ල වූ ප්රහාර හේතුවෙන් රෝගීන්ට අවශ්ය ඖෂධ නිෂ්පාදනය සහ බෙදා හැරීම බරපතළ ලෙස අඩාල වී ඇති බවට ද ඇය චෝදනා කරයි.
















































