
ගාල්ල - උණවටුන ප්රදේශයේදී බලපත්ර නොමැතිව සංචාරක මඟපෙන්වන්නෙකු ලෙස පෙනී සිටිමින්, මෙරටට පැමිණි රුසියානු ජාතික සංචාරක කාන්තාවකට අඩන්තේට්ටම් කර, පහරදී මුදල් කොල්ලකෑමේ සිද්ධියට සම්බන්ධ ප්රධාන සැකකරු උණවටුන සංචාරක පොලීසිය විසින් අත්අඩංගුවට ගෙන තිබේ.
පසුගිය නොවැම්බර් 05 වන දින සංචාරක වීසා මත දිවයිනට පැමිණ උණවටුන ප්රදේශයේ හෝටලයක නවාතැන් ගෙන සිටි 40 හැවිරිදි රුසියානු ජාතික කාන්තාවක් මෙලෙස පීඩාවට පත්ව තිබුණි.
විමර්ශනවලදී අනාවරණය වී ඇති අන්දමට, සැකකරු තමා සංචාරක මඟපෙන්වන්නෙකු ලෙස හඳුන්වා දී, පසුගිය 12 වන දින රාත්රී 10.00ට පමණ රාත්රී ආහාර ගැනීම සඳහා යැයි පවසමින් ඇයව ත්රිරෝද රථයකින් ගාල්ල නගරය වෙත කැඳවාගෙන ගොස් තිබේ.
එහිදී සැකකරු විසින් ඇයට ලිංගික බලපෑම් කිරීමට උත්සාහකර ඇති අතර, ඇය එය දැඩි ලෙස ප්රතික්ෂේප කිරීමත් සමඟ උරණ වූ සැකකරු ඇයගේ ජංගම දුරකථනය උදුරාගෙන රුපියල් 35,000ක කප්පම් මුදලක් ඉල්ලා තර්ජනය කර ඇත.
පසුව යළි ත්රිරෝද රථයෙන් හෝටලය වෙත පැමිණෙමින් සිටියදී, සැකකරු විසින් අදාළ විදේශීය කාන්තාවගේ මුහුණට සහ හිසට පහරදී ඇය සතුව තිබූ රුපියල් 20,000ක මුදල බලහත්කාරයෙන් පැහැරගෙන තිබේ.
කෙසේ වෙතත්, එම අවස්ථාවේදී ත්රිරෝද රථ රියදුරු වහා මැදිහත්වී පහරදීම වළක්වා ඇයගේ ගමන් මල්ල බේරා ගැනීමට සහය වී ඇත.
මෙම සිද්ධිය සම්බන්ධයෙන් විදේශීය ජාතික කාන්තාව පසුගිය 13වන දින උණවටුන සංචාරක පොලීසිය වෙත පැමිණිලි කර ඇති අතර, ඇයගේ වීසා කාලය අවසන් වීම හේතුවෙන් ඇය මේ වන විට දිවයිනෙන් පිටව ගොස් ඇත.
සාක්ෂි ඔස්සේ සිදුකළ විමර්ශනවලින් අනතුරුව උණවටුන සංචාරක පොලීසිය විසින් සැකකරු අත්අඩංගුවට ගෙන වැඩිදුර විමර්ශන සහ අධිකරණ කටයුතු සඳහා ගාල්ල මූලස්ථාන පොලීසිය වෙත භාර දී තිබේ.
කොල්ලකෑම, පහරදීම, ලිංගික හිරිහැර කිරීම සහ බලපත්ර නොමැතිව සංචාරක මඟපෙන්වන්නෙකු ලෙස කටයුතු කිරීම යන බරපතළ චෝදනා යටතේ සැකකරු අද (19) ගාල්ල ප්රධාන මහේස්ත්රාත් අධිකරණය හමුවට ඉදිරිපත් කිරීමට නියමිතය.
උණවටුන සංචාරක පොලීසිය වැඩිදුර පරීක්ෂණ පවත්වයි.














































