මාලබේ පිහිටි නෙවිල් ප්‍රනාන්දු රෝහල මින් පසු ගුවන් හමුදා පරිපාලනය යටතේ පවත්වාගෙන යන බව අමාත්‍ය වෛද්‍ය නලින්ද ජයතිස්ස මහතා පවසයි.
අද (10) පැවැති කැබිනට් තීරණ දැනුම්දීමේ මාධ්‍ය හමුවේදී අදහස් දක්වමින් අමාත්‍යවරයා පැවසුවේ 2017 වසරේදී රජයට පවරා ගැනීමෙන් අනතුරුව එහි පවතින ණය මේ වන විට ගෙවා අවසන් බවය.
ඒ අනුව වර්තමානය වන විට නෙවිල් ප්‍රනාන්දු රෝහල මහා භාණ්ඩාගාරයේ දේපළක් ලෙස ගුවන් හමුදා පරිපාලනය යටතේ ක්‍රියාත්මක වන බව පැවසූ අමාත්‍යවරයා මෙතෙක් ජනතාවට ලබා දුන් පහසුකම් ඒ ආකාරයෙන්ම ඉදිරියට ගුවන් හමුදා පරිපාලනය යටතේ ජනතාවට ලබා දෙන බවය.
මේ සම්බන්ධව වැඩිදුරටත් කරුණු පැහැදිළි කළ අමාත්‍ය වෛද්‍ය නලින්ද ජයතිස්ස මහතා,
"නෙවිල් ප්‍රනාන්දු මැතිතුමා විසින් ගොඩනගන ලද ඒ රෝහල සහ වෛද්‍ය පීඨය 2017 වසරේදී රජයට පවරාගත්තා ඒ ඉදිකරන ලද නෙවිල් ප්‍රනාන්දු මහතාගේ පවුලට ඒ මුදල් ගෙවීමටත් එකඟතා සහිතව. ඒ අනුව පාර්ශ්ව තුනක් හැටියට ත්‍රෛපාර්ශ්වික ගිවිසුකමක් මගින් ඒ වෙලාවේ තිබුණා බැංකුවකට ගෙවිය යුතු ණය ප්‍රමාණයක් තිබුණා. ඒක ක්‍රමානුකූලව භාණ්ඩාගාරය විසින් ගෙව්වා. අපේ රජය ආවට පස්සේ තමයි ගෙවීම් අවසන් කළේ. එතැනින් පස්සේ තමයි භාණ්ඩාගාරයට මේ අයිතිය ලැබෙන්නේ බැංකුවෙන්. එතකොට දැන් මේක භාණ්ඩාගාරය සතු දේපළක්. දැන් ඇඳන් 1002ක් සහිත මේ රෝහළ ඉදිරි ගමන්මග පිළිබඳව සැලසුමක් සකස් කරගත යුතුව තිබුණා. සෞඛ්‍ය අමාත්‍යාංශය විසින් පත් කරන ලද කමිටුවක් විසින් තමයි මෙහි පරිපාලනය කරගෙන ගියේ. රෝහලේ යම් මුදල් අය කිරීමකුත් කරනවා, නොමිලේ සේවා සැපයීමකුත් කරනවා. නමුත් එම මුදල් ප්‍රමාණවත් වුණේ නෑ එහි සේවකයින්ට පඩි ගෙවන්නවත්. ඒ අනුව සාමාන්‍යයෙන් මාසයකට රුපියල් මිලියන 50ක පමණ මුදලක් පහුගිය අවුරුදු කිහිපයේම සෞඛ්‍ය අමාත්‍යාංශය හරහා ලබා දුන්නා. ඊට පසුව මේ රෝහලේ අනාගතය පිළිබඳව සාකච්ඡා වට කිහිපයක් පැවැත්වුණා. 2017 වසරෙදි තාවකාලිකව ණය ගෙවීමට භාණ්ඩාගාරය මැදිහත් වුණාට ඊට පසුව කරන දේ ගැන ස්ථීර විසඳුමක් තිබුණේ නෑ.
ඒ අතරෙදි ගුවන් හමුදාවටත් අවශ්‍ය වෙලා තිබුණා තමන්ගෙම වූ රෝහලක්. දැනට ගුවන් හමුදාවේ ගුවන්පුර ප්‍රදේශයේ තිබෙනවා ගුවන් හමුදා රෝහලක් ඇඳන් 60ක් සහිත රෝහලක් නමුත් ඒක ප්‍රමාණවත් නෑ. ගුවන් හමුදාවේ නිලදාරීන්ට සහ විශ්‍රාම ගිය නිලදාරීන්ට ඒ ප්‍රතිකාර සපයන්න. ඒ අනුව මේ වෛද්‍ය නෙවිල් ප්‍රනාන්දු රෝහල ගුවන් හමුදාවේ පරිපාලනය යටතේ භාණ්ඩාගාරයේ දේපළක් හැටියට පවතිනවා. ගුවන් හමුදාවට ඇඳන් 180ක පමණ ප්‍රමාණයක් මේ කලාපය තුළ පවතිනවා. ගුවන් හමුදාව විසින් ඒ කටයුතු සිදුකරනවා. ඊට අමතරව ජනතාවට නොමිලේ සේවාවන් සැපයීමේ පහසුකම් තිබුණා ඒක දිගටම කරගෙන යනවා. ඊළඟට මුදල් ගෙවා ප්‍රතිකාර ලබා ගැනීමේ පහසුකම් තිබුණා ඒකත් දිගටම කරගෙන යනවා. දැන් රෝහල මුළුමනින්ම අංග සම්පූර්ණව ක්‍රියාත්මක කිරීම සහ සංවර්ධනය කිරීම තමයි බලාපොරොත්තු වෙන්නේ. මොකද රෝහල ආරම්භයේදී මිලදී ගන්නා ලද යම් උපකරණවල මේ වන විට කල් ඉකුත් වෙමින් පවතිනවා. තවත් අලුත්වැඩියාවන් ගණනාවක් තිබෙනවා ඒකට භාණ්ඩාගාරයේ මුදල් ලබා දුන්නා. ඖෂධ සැපයීම සෞඛ්‍ය අමාත්‍යාංශය විසින් සිදුකරනවා. මේ ආදි හැටියට තමයි රෝහලේ කළමනාකරණ කටයුතු සිදුකරන්නේ."
