රජය විසින් යෝජිත ත්‍රස්තවාදයෙන් රාජ්‍ය ආරක්ෂා කර ගැනීමේ පනත් කෙටුම්පත ජාත්‍යන්තර මානව හිමිකම් නීතියට අනුකූල වන පරිදි සංශෝධනය කළ යුතු බව එක්සත් ජාතීන්ගේ සංවිධානය පවසයි.
එම සංවිධානයේ විශේෂඥයින් විශේෂ ප්‍රකාශයක් සිදුකරමින් සඳහන් කර ඇත්තේ, 1979 අංක 48 දරණ ත්‍රස්තවාදය වැළැක්වීමේ පනත අහෝසි කිරීමට යෝජනා කිරීම අගය කරන බවයි.
අදාළ පනත් කෙටුම්පත මඟින් සුළුතර ප්‍රජාවන්, මානව හිමිකම් ක්‍රියාකාරීන්, මාධ්‍යවේදීන් සහ සිවිල් සමාජය වෙත විවිධ හිංසනයන් එල්ලවූ බව එම විශේෂඥයින් පෙන්වා දී තිබේ.
ශ්‍රී ලංකා රජය විසින් ඉදිරිපත් කර ඇති ත්‍රස්තවාදයෙන් රාජ්‍ය ආරක්ෂා කිරීමේ පනත් කෙටුම්පත තුළ යහපත් ප්‍රවණතාවක් පැවතියද විසඳිය යුතු තීරණාත්මක ගැටලු කිහිපයක් පවතින බව එක්සත් ජාතීන්ගේ සංවිධානය පෙන්වා දෙයි.
රඳවා තබා ගැනීමේ නියෝග, කඩිනම් සහ ඵලදායී අධිකරණ පාලනයකට සහ අධීක්ෂණයකට යටත් විය යුතු බවත් රදවා තබා ගැනීම සම්බන්ධ අභියාචනා විභාග කරන ස්වාධීන සමාලෝචන කමිටුව සැබවින්ම ස්වාධීන විය යුතු බවත් ඔවුන් පෙන්වා දී තිබේ.
ත්‍රස්තවාදය යන්නෙහි අර්ථ නිරූපණය හිතාමතා මරණය හෝ බරපතළ ශාරීරික හානි සිදුකරන ක්‍රියාවලට පමණක් සීමා විය යුතු බවත් දේපළවලට සිදුවන හානි ඊට ඇතුළත් නොවිය යුතු බවත් එක්සත් ජාතීන්ගේ සංවිධානයේ විශේෂඥයින් වැඩිදුරටත් අවධාරණය කර ඇත.
මේ අතර ත්‍රස්තවාදයෙන් රාජය ආරක්ෂා කිරීමේ පනත් කෙටුම්පත සහ සංවිධානාත්මක අපරාධ වැළැක්වීමේ පනත් කෙටුම්පත් සඳහා රජය විසින් යෝජනා කර ඇති සංශෝධන ප්‍රමාණවත් නොවන බව සමගි ජන බලවේගය පවසයි.
අදාළ පනත් කෙටුමපත් සඳහා සංශෝධන ඉදිරිපත් කිරීමට රජය දැනුම් දුන්න ද එම සංශෝධන කිසිසේත් ප්‍රමාණවත් නොවන බව ඊයේ රාත්‍රී ටීවි දෙරණ ඔස්සේ විකාශය වූ 360 කාලීන වැඩසටහන සමඟ එක්වෙමින් පාර්ලිමේන්තු මන්ත්‍රී අජිත් පී පෙරේරා මහතා සඳහන් කළේය.
