විනාශ වූ ගොඩනැඟිලිවල නටබුන් සහ අවතැන් වූවන්ගේ කූඩාරම් මැද, පලස්තීන මනාල මනාලියන් 250ක් වෙනුවෙන් පැවැත් වූ දැවැන්ත සමූහ මංගල උත්සවයක් ගාසා තීරයේදී අති උත්කර්ෂවත් අයුරින් පවත්වා තිබේ.

ගාසා නගරයේ වෙරළ තීරයේ පිහිටි උත්සව ශාලාවකදී මෙම ඓතිහාසික උත්සවය සංවිධානය කර තිබුණි.

එක්සත් අරාබි එමීර් රාජ්‍යයේ මානුෂීය මෙහෙයුමක් වන 'Operation Gallant Knight 3'  යටතේ ක්‍රියාත්මක කරන ලද විශේෂ ව්‍යාපෘතියක් මඟින් මෙය සංවිධානය කර ඇත.

යුද්ධය සහ අවතැන් වීම් නිසා දැඩි ආර්ථික අපහසුතාවන්ට මුහුණ දී සිටින තරුණ පරපුරට සහන සැලසීම සහ ගාසා තීරයේ ආදරයට නව ආරම්භයක් සනිටුහන් කිරීම මෙහි අරමුණ විය.

මෙම සමූහ මංගල උත්සවය සඳහා අයැදුම්කරුවන් 11,622 දෙනෙකු අතරින් විශේෂ ලොතරැයි ක්‍රමයක් හරහා යුවළයන් තෝරාගෙන තිබීම විශේෂත්වයකි.

මංගල උත්සවය අතරතුර යුගදිවියට එළැඹි යුවළ සාම්ප්‍රදායික සංගීතයට අනුව නැටුම්වල යෙදුණු අතර, මංගල සරසන ලද රථ ගාසා තීරයේ වෙරළබඩ මාර්ගය ඔස්සේ ගමන් කළේය.

එමෙන්ම, උත්සව භූමිය පුරා පලස්තීන සහ එක්සත් අරාබි එමීර් රාජ්‍යයේ ජාතික කොඩි ප්‍රදර්ශනය කර තිබුණි.

දැඩි යුධමය වාතාවරණයක් සහ අභියෝග මැද වුවද, පලස්තීන ජනතාව සිය ජීවිත අත්නොහැර ඉදිරියට පවත්වාගෙන යාමටත්, සාම්ප්‍රදායික සංස්කෘතිය ආරක්ෂා කර ගැනීමටත් දරන උත්සාහයේ ප්‍රබල සංකේතයක් ලෙස මෙම උත්සවය විස්තර කෙරේ.

පසුගිය වසරේ ඔක්තෝබර් මාසයේදී ගාසා තීරයේ සටන් විරාමයක් ක්‍රියාත්මක වුවද, ඊශ්‍රායල ගුවන් ප්‍රහාර පාහේ දිනපතාම අඛණ්ඩව ක්‍රියාත්මක වේ.

2023 ඔක්තෝබර් 7 වන දින හමාස් සංවිධානය විසින් ඊශ්‍රායලයට එල්ල කරන ලද ප්‍රහාරයකින් පුද්ගලයින් 1200ක් පමණ මිය ගොස් තවත් 251 දෙනෙකු ප්‍රාණ ඇපයට ගැනීමත් සමඟ මෙම ගාසා යුද්ධය ආරම්භ විය.

ඊට ප්‍රතිචාර වශයෙන් ඊශ්‍රායලය ගාසා තීරයේ හමාස් සංවිධානයට එරෙහිව හමුදා මෙහෙයුමක් දියත් කළ අතර, එම ප්‍රදේශයේ සෞඛ්‍ය අමාත්‍යාංශයට අනුව එම කාලය තුළ පුද්ගලයින් 74,640කට අධික සංඛ්‍යාවක් මිය ගොස් තිබේ.

මෙවැනි අඛණ්ඩ යුධමය වාතාවරණයක් සහ දැඩි අසීරුතා මධ්‍යයේ වුවද, ආදරය සහ නව ජීවිතයක් අපේක්ෂාවෙන් පලස්තීන යුවළ 250ක් මෙලෙස ගාසා තීරයේදී එකවර යුගදිවියට පිවිසීම ජාත්‍යන්තරයේ දැඩි අවධානයට ලක් වූ සුවිශේෂී සිදුවීමක් විය.