රුපියල් මිලියන 454ක (රු.කෝ. 45කට අධික) ඇස්තමේන්තුගත වෙළෙඳපොළ වටිනාකමකින් යුත් කොකේන් සහ එක්ස්ටසි මත්ද්‍රව්‍ය තොගයක් සමග ඉන්දීය ජාතිකයෙකු රේගු භාරයට ගෙන ඇත.
ශ්‍රී ලංකා රේගුවේ මත්ද්‍රව්‍ය පාලන අංශ නිලධාරීන් විසින් අද (28) කටුනායක ගුවන්තොටුපොළේ සිදුකළ පරීක්ෂාවකදී සැකකරු සමග මෙම මත්ද්‍රව්‍ය තොගය සොයාගැනීමට හැකිව තිබේ.
වෘත්තියෙන් ඉංජිනේරුවෙකු වන 46 හැවිරිදි මෙම ඉන්දීය ජාතිකයා, පැරිස් සිට දෝහා හරහා මෙරටට පැමිණ තිබේ.
වැඩිදුර පරීක්ෂාව සඳහා රේගු මත්ද්‍රව්‍ය පාලන අංශයේ නිලධාරීන් විසින් මෙම මගියා රඳවා ගෙන ඇත.
මගියාගේ ගමන් මලු පරීක්ෂා කිරීමේදී මෙම මත්ද්‍රව්‍ය සොයාගැනීමට හැකිවී ඇති අතර, වැඩිදුර පරීක්ෂාවේදී ඒවා කොකේන් සහ එක්ස්ටසි මත්ද්‍රව්‍ය බවට හඳුනාගෙන තිබේ.
අත්අඩංගුවට ගත් මත්ද්‍රව්‍ය තොගයට කොකේන් ග්‍රෑම් 5,121ක් ඇතුළත් අතර, එහි ඇස්තමේන්තුගත වෙළෙඳපොළ වටිනාකම රුපියල් මිලියන 256කි.
එමෙන්ම ග්‍රෑම් 13,173ක බරින් යුත් එක්ස්ටසි මත්ද්‍රව්‍ය තොගයක් සොයාගෙන ඇති අතර, එය පෙති 23,000කට ආසන්නය. එම තොගයේ ඇස්තමේන්තුගත වෙළෙඳපොළ වටිනාකම රුපියල් මිලියන 198කි.
සිද්ධිය සම්බන්ධයෙන් ශ්‍රී ලංකා රේගුව විසින් මූලික විමර්ශන සිදුකරනු ලබන අතර, ඉදිරි විමර්ශන සහ නීතිමය කටයුතු සඳහා සැකකරු, අත්අඩංගුවට ගත් මත්ද්‍රව්‍ය තොගය සහ අනෙකුත් අදාළ නඩු භාණ්ඩ පොලිස් මත්ද්‍රව්‍ය කාර්යාංශය වෙත භාරදීමට නියමිතය.
