සිය භාර්යාවට නඩත්තු හිඟ මුදල් ගෙවීම පැහැර හැරීම හේතුවෙන් මාස 29ක සිර දඬුවම් නියම වී සිටි මොහොමඩ් අමීන් මොහොමඩ් නසීම් නමැත්තෙකු හිටපු ජනාධිපති රනිල් වික්‍රමසිංහ මහතා විසින් පොදු සමාව යටතේ නිදහස් කිරීමට ගනු ලැබූ තීරණය බලශූන්‍ය බව ශ්‍රේෂ්ඨාධිකරණය තීන්දුකර තිබේ.

ඒ අනුව අදාළ පුද්ගලයාට එරෙහිව අධිකරණය විසින් නියම කර තිබෙන දඬුවම යළි ක්‍රියාත්මක කිරීමට බන්ධනාගාර බලධාරීන්ට බලය තිබෙන බව තීන්දුවේ සඳහන් කර ඇත.

මෙසේ නිදහස් කෙරුණු පුද්ගලයාගේ බිරිඳ වන අහමඩ් ෆාමිල්ලා බේගම් විසින් ගොනුකළ මූලික අයිතිවාසිකම් පෙත්සමක් විභාගයට ගැනීමෙන් අනතුරුව, ආචාර්ය සෝභිත රාජකරුණා, සම්පත් විජේරත්න යන විනිසුරුවරුන්ගේ එකඟත්වය ඇතිව ශ්‍රේෂ්ඨාධිකරණ විනිසුරු ජනක් ද සිල්වා මහතා විසින් මෙම තීන්දුව ලබාදී තිබේ.

පෙත්සම්කාරිය පවසා ඇත්තේ, 2005 වසරේ අප්‍රේල් මස 23 වනදා මුස්ලිම් විවාහ හා දික්කසාද නීතිය යටතේ තමා වග උත්තරකරු සමග විවාහ වූ බවය.

දරුවන් තුන්දෙනෙකු එම විවාහයෙන් උපත ලැබූ බව කියා සිටි පෙත්සන්කාරිය, එම විවාහය අවසන් කිරීමෙන් පසුව නැගෙනහිර කොළඹ ක්වාසි අධිකරණයෙන් 2022 වසරේ ජූනි 11 වනදා රුපියල් 60,000ක මුදලක් නඩත්තු වශයෙන් ගෙවන ලෙස වගඋත්තරකරුට නියෝග කළ බවත් සඳහන් පවසා තිබේ.

එහෙත් දිගින් දිගටම වගඋත්තරකරු විසින් එම නඩත්තු මුදල් ගෙවීම පැහැර හැරීම හේතුවෙන් මීගමුව මහෙස්ත්‍රාත් අධිකරණය විසින් රුපියල් 1,740,000ක (මිලියන 1.7) හිඟ නඩත්තු ගෙවන ලෙස නියෝගයක් නිකුත් කළ බවත් ඇය සඳහන් කර ඇත.

ඉන්පසුව නඩත්තු ගෙවීම් පැහැර හැරීමේ චෝදනාවට වරදකරු කෙරුණු වගඋත්තරකරුට මීගමුව මහේස්ත්‍රාත් අධිකරණය විසින් මාස 29ක සිර දඬුවමක් නියම කර තිබේ.

ඉන් අනතුරුව 2024 වසරේ සැප්තැම්බර් මස 12 වැනිදා යෙදුණු සිරකරුවන්ගේ දිනය නිමිත්තෙන් ආණ්ඩුක්‍රම ව්‍යවස්ථාවේ 34 වන ව්‍යවස්ථාව ප්‍රකාරව පොදු සමාව යටතේ වගඋත්තරකරු 2024 වසරේ සැප්තැම්බර් මස 12 වැනිදා නිදහස් කෙරනු ලැබූ බවත් තීන්දුවේ සඳහන් විය.

මෙසේ නිදහස් කරන අවස්ථාව වන වගඋත්තරකරු තමන්ට නියම වූ මාස 29ක සිරදඬුවමින් මාස 2ක් පමණක් ගෙවා තිබූ බවත් තීන්දුවේ සඳහන් කර තිබේ.

පෙත්සම්කාරිය කියා සිටින්නේ වගඋත්තරකරුට සමාව ප්‍රදානය කිරීම අත්තනෝමතික මෙන්ම අසාධාරණ බවත්, එය ආණ්ඩුක්‍රම ව්‍යවස්ථාවේ 12(1) ව්‍යවස්ථා මගින් සහතික කර තිබෙන මූලික අයිතිවාසිකම් උල්ලංඝනය කිරීමක් බවය.

මෙවැනි සමාවක් ප්‍රදානය කිරීමට පෙර තමන්ගෙන් කරුණු විමසීමක් සිදුකර නොමැති බවත් පෙත්සංකාරිය චෝදනා කරයි.

එහෙත් නිදහස ලැබූ වගඋත්තරකරු අධිකරණය හමුවේ ප්‍රකාශ කර තිබුණේ තමන්ට ලබාදී තිබෙන පොදුසමාව ආණ්ඩුක්‍රම ව්‍යවස්ථාවේ 34(1) අ ව්‍යවස්ථාව යටතේ ලබා දුන් සමාවක් නොව 34(1) ඈ ව්‍යවස්ථාව යටතේ සිදුකළ දඬුවම් ලිහිල් කිරීමක් බවය.

එහෙත් මෙලෙසම නඩත්තු නොගෙවීම මත සිරගත වී සිටි තවත් සිරකරුවකු වන මොහොමඩ් ෆයිසාල් මොහොමඩ් නව්ෂාඩ් නමැත්තා නිදහස් කිරීමක් සිදුවී නොමැති, අතර ඔහුගේ සිර දඬුවම් කාලය සතියකින් පමණ අඩු කිරීම පමණක් අඩුකර ඇති ආකාරය පෙනී යන බවත් තීන්දුවේ සඳහන්ය.

ඒ අනුව මෙම පොදු සමාව ප්‍රදානය කිරීමේ ක්‍රියාවලිය තුළ අසමානතාවයක් නිරීක්ෂණය වන බවත් අධිකරණය සිය තීන්දුවෙන් ප්‍රකාශකර ඇත.

වගඋත්තරකරු පොදු සමාව යටතේ නිදහස් කිරීමට පියවර ගැනීම තුළින් හිටපු ජනාධිපතිවරයා, අධිකරණ අමාත්‍යංශයේ හිටපු ලේකම්, හිටපු බන්ධනාගාර කොමසාරිස් ජෙනරාල්වරයා ආණ්ඩුක්‍රම ව්‍යවස්ථාවේ 12(1) ව්‍යවස්ථාවේ සඳහන් සමානාත්මතාවය සහ නීතියේ ආරක්ෂාව උල්ලංඝනය කරමින් කටයුතු කර තිබෙන බවත් විනිසුරුවරු සිය තීන්දුවේ සඳහන් කර ඇත.

ඒ අනුව අදාළ වගඋත්තරකරුට ප්‍රදානය කර ඇති සමාව නීතිය ඉදිරියේ බලශූන්‍ය බව තීන්දුවේ සඳහන්ය.

නිදහස් කරන ලද වගඋත්තරකරුට මීගමුව මහේස්ත්‍රාත් අධිකරණය මගින් පමුණුවන ලද දඬුවම යළි ක්‍රියාත්මක කිරීම සඳහා නීතියට අනුකූලව සියලු ක්‍රියාමාර්ග ගන්නා ලෙසත් ශ්‍රේෂ්ඨාධිකරණය විසින් බන්ධනාගාර කොමසාරිස් ජෙනරල්වරයාට නියම කර තිබේ.