වැඩිමිලට ආනයනික කීරි සම්බා සහල් අලෙවි කළ අම්පාර ප්‍රදේශයේ සුපිරි වෙළෙඳසැලකට රුපියල් ලක්ෂ පහක දඩ මුදලක් නියම කර තිබේ.
ඒ, පාරිභෝගික කටයුතු පිළිබඳ අධිකාරිය විසින් 2026 ජුනි 15 දින හෝ ඊට ආසන්න දිනයකදී සිදුකරන ලද විමර්ශනයකින් අනතුරුව අම්පාර මහේස්ත්‍රාත් අධිකරණයේ ගොනු කළ නඩුවක අදාළ තීන්දුව ප්‍රකාශයට පත් කරමිනි.
එම අධිකාරිය සිදු කළ වැටලීමකදී ආනයනික කීරි සම්බා සහල් කිලෝග්‍රෑම් එකක් සඳහා නියමිත උපරිම සිල්ලර මිල රුපියල් 255ක්ව තිබියදී, එම සහල් කිලෝග්‍රෑම් දෙකක් පාරිභෝගික කටයුතු පිළිබඳ අධිකාරියේ විමර්ශන නිලධාරියෙකුට රුපියල් 560කට අලෙවි කර ඇති බව අනාවරණ විය.
ඒ අනුව සහල් කිලෝග්‍රෑම් එකක් රුපියල් 280කට අලෙවි කර තිබූ අතර, නියමිත උපරිම සිල්ලර මිලට වඩා කිලෝග්‍රෑම් එකකට රුපියල් 25ක් වැඩිපුර අය කර තිබූ අතර සහල් කිලෝග්‍රෑම් දෙක සඳහා වැඩිපුර අය කර තිබූ මුළු මුදල රුපියල් 50කි.
2025 ඔක්තෝබර් 21 දිනැති අංක 2459/12 දරන අතිවිශේෂ ගැසට් පත්‍රයේ ප්‍රකාශිත නියෝග අංක 94 මඟින් ආනයනික කීරි සම්බා සහල් කිලෝග්‍රෑම් එකක උපරිම සිල්ලර මිල රුපියල් 255ක් ලෙස නියම කර ඇත.
මෙම නියෝගය උල්ලංඝනය කිරීම සම්බන්ධයෙන් 2003 අංක 09 දරන පාරිභෝගික කටයුතු පිළිබඳ අධිකාරිය පනත සහ 2021 අංක 20 දරන සංශෝධන පනතේ අදාළ විධිවිධාන යටතේ නීතිමය පියවර ගෙන තිබේ.
පාරිභෝගික කටයුතු පිළිබඳ අධිකාරියේ විමර්ශන නිලධාරීන් විසින් මිලදී ගත් සහල් පාර්සලය, ගනුදෙනුවට අදාළ මුදල් සහ බිල්පත ඇතුළු නඩු භාණ්ඩ අධිකරණයට ඉදිරිපත් කරන ලදී.
ඒ අනුව අම්පාර මහෙස්ත්‍රාත් අධිකරණයේදී 2026 ඔක්තෝබර් 22 දින මෙම නඩුවට අදාළව රුපියල් 500,000ක දඩ මුදලක් නියම කර ඇත.
