ඉරානයේ පවතින ගැටුම සහ පුළුල් මැදපෙරදිග කලාපයේ ගැටුම් වැනි යුද්ධ කිසිදු පාර්ශ්වයකට ප්‍රතිලාභයක් ලබා නොදෙන බව අග්‍රාමාත්‍ය ආචාර්ය හරිනි අමරසූරිය අවධාරණය කරයි.
ශ්‍රී ලංකාවේ ප්‍රමුඛතාව වී ඇත්තේ කලාපීය සාමය ආරක්ෂා කිරීම, සිය සාගරික ආරක්ෂාව තහවුරු කිරීම සහ එම ගැටුමට සෘජුව සම්බන්ධ නොවී සිටීම බව ද ඇය සඳහන් කළාය.
CNN පුවත් සේවය සමඟ පැවති සම්මුඛ සාකච්ඡාවකට එක්වෙමින් ඇය මේ බව පැවසීය.
මෙම ගැටුම් හේතුවෙන් රටට ඇතිවන ආර්ථික බලපෑම්වලට මුහුණදීමට ද ශ්‍රී ලංකාව කටයුතු කරමින් සිටින බව ඇය වැඩිදුරටත් ප්‍රකාශ කළාය.
එලෙසම මැදපෙරදිග කලාපයේ ගැටුම හමුවේ ශ්‍රී ලංකාව මධ්‍යස්ථ ස්ථාවරයක් පවත්වාගෙන යන බව පැවසූ අග්‍රාමාත්‍යවරිය ශ්‍රී ලංකාවේ උපායමාර්ගික සමුද්‍රීය පිහිටීම හේතුවෙන් කලාපීය ස්ථාවරත්වය පවත්වා ගැනීම සහ මෙරට මුහුදු සීමාවට ගැටුමේ බලපෑම් ඇතිවීම වැළැක්වීම අත්‍යවශ්‍ය බවද ඇය පෙන්වා දුන්නේය.
කෙසේ වෙතත්, ජාත්‍යන්තර ගැටුමේ ආර්ථික ප්‍රතිවිපාකවලින් ශ්‍රී ලංකාවටද බලපෑම් එල්ල වී ඇති බව පැවසූ ඇය විශේෂයෙන්ම බලශක්ති පිරිවැය ඉහළ යාම, ආර්ථික අර්බුදයෙන් තවමත් යථා තත්ත්වයට පත්වෙමින් සිටින මෙරට ආර්ථිකයට අමතර පීඩනයක් එල්ල කර ඇති බවද පැවසීය.
මේ අතර, පසුගිය වසර කිහිපය තුළ ශ්‍රී ලංකාව මුහුණ දුන් අභියෝග සැලකිල්ලට ගැනීමේදී රටේ ආර්ථිකය සැලකිය යුතු ප්‍රගතියක් අත්කරගෙන ඇති බව අග්‍රාමාත්‍යවරිය ප්‍රකාශ කළාය.
“අප මුහුණ දුන් තත්ත්වයන් සැලකිල්ලට ගත් විට, අප ඉතා හොඳින් කටයුතු කරමින් සිටිනවා,” යැයි ඇය පැවසීය.
රාජ්‍ය මූල්‍ය කළමනාකරණය, ජාත්‍යන්තර මූල්‍ය අරමුදලේ (IMF) වැඩසටහන ක්‍රියාත්මක කිරීම, දූෂණය හා නාස්තිය අවම කිරීමේ උත්සාහයන් සහ පාලන ක්‍රමවේද වැඩිදියුණු කිරීම මෙම ප්‍රගතියට ප්‍රධාන වශයෙන් දායක වී ඇති බවද ඇය පැවසුවාය.
IMF වැඩසටහන සම්බන්ධයෙන් රජය මුල් අවධියේදී යම් අකමැත්තක් දැක්වූ බව පිළිගත් අග්‍රාමාත්‍යවරිය, පසුව ජාත්‍යන්තර මූල්‍ය අරමුදල සමඟ සහයෝගයෙන් කටයුතු කිරීමේ අවශ්‍යතාව හඳුනාගත් බව සඳහන් කළාය.
“අපි IMF වැඩසටහනට කැමැත්තක් දැක්වූයේ නැහැ. නමුත් අපට එය අනුගමනය කිරීමට සිදු වුණා,” යැයි ඇය පැවසීය.
එම වැඩසටහනේ ඇතැම් කොන්දේසි සමඟ රජය එකඟ වූ අතර, ආර්ථික ස්ථාවරත්වය පවත්වා ගැනීමට ප්‍රමුඛත්වය ලබාදුන් බවද අග්‍රාමාත්‍යවරිය පැහැදිලි කළාය.
වසර දෙකක කාලයකින් පසු ශ්‍රී ලංකාව වඩාත් ස්ථාවර ආර්ථික තත්ත්වයකට ළඟා වී ඇති නමුත්, නවතම ජාත්‍යන්තර වර්ධනයන් හමුවේ බාහිර ආර්ථික බලපෑම්වලට මෙරට ආර්ථිකය තවදුරටත් සංවේදී බව ඇය වැඩිදුරටත් පෙන්වා දුන්නේය.
