අභිනව රාජෝපවනාරාමාධිපති ධුරයට රාජකීය පණ්ඩිත, ශාස්ත්‍රපති පූජ්‍ය අකුරැස්සේ සිරි ධම්මවිමල හිමියන් පත් කර තිබේ.

ඒ, ගැටඹේ රාජෝපවනාරාමාධිපති ලෙස කටයුතු කළ පූජ්‍ය කැප්පිටියාගොඩ සිරිවිමල නාහිමියන් අපවත්වීමෙන් අනතුරුවය.

ඊයේ (21) රාත්‍රියේ රාජෝපවනාරාමයට රැස්වූ ශ්‍රී ලංකා රාමඤ්ඤ මහා නිකායේ මහනුවර දකුණ ප්‍රාදේශීය සංඝ සභාව හා ප්‍රාප්ත මහා සංඝ රතනය විසින් උන්වහන්සේව මෙම ධුරයට පත්කර තිබේ.

1991 දී මාතර අකුරැස්සේ දී උපත ලබා ඇති සිරි ධම්මවිමල හිමියන් 2002 වසරේ දී කඩවත රන්මුතුගල මහා විහාරයේ දී පැවිදි දිවියට පත්වුණි.

පසුව රන්මුතුගල ජාතික භික්ෂු අධ්‍යාපන ආයතනික මුලික පිරිවෙනෙන් හා පේරාදෙණිය, පැණිදෙණිය ශ්‍රී භාරතී විද්‍යාතනයෙන් මුලික අධ්‍යාපනය හදාරා තිබේ.

2012 දී ගැටඹේ රාජෝපවනාරාමයේ පැවති ශ්‍රී ලංකා රාමඤ්ඤ මහා නිකායේ 68 වන උපසම්පදා පුණ්‍ය මහෝත්සවයේ දී රාජෝපවනාරාමාධිපති අතිපූජ්‍ය කැප්පිටියාගොඩ සිරිවිමල අනුනායක හිමියන්ගේ ජ්‍යෙෂ්ඨ ශිෂ්‍යවරයෙකු ලෙස වසර 10ක පමණ කාලයක සිට රාජෝපවනාරාම භාරකාර ධුරයද දරමින් කටයුතු කර ඇත.

පේරාදෙණිය විශ්වවිද්‍යාලයේ බෞද්ධ අධ්‍යයනය පිළිබඳ ප්‍රථම පන්තියේ සාමර්ථ්‍යලාභී හිමිනමක් වන සිරි ධම්මවිමල හිමි රාජකීය පණ්ඩිත උපාධිය ද ලබා තිබේ.

කැලණිය විශ්වවිද්‍යාලයෙන් ශාස්ත්‍රපති උපාධියද ලබා ඇති උන්වහන්සේ, මේ වනවිට පේරාදෙණිය, පැණිදෙණිය ශ්‍රී භාරතී විද්‍යායතන පිරිවෙන්හි නියෝජ්‍ය පරිවේණාධිපතීන් වහන්සේ ලෙස හා ශ්‍රී ලංකා රාමඤ්ඤ මහා නිකායේ මහනුවර දකුණ ප්‍රාදේශීක සංඝ සභාවේ නිකාය සංවර්ධන ලේඛකාධිකාරී ධුරය ද දරමින් කටයුතු කරයි.

ශ්‍රී ලංකා රාමඤ්ඤ මහනිකායේ අනුනායක, ගැටඹේ රාජෝපවනාරාමාධිපති අතිපූජ්‍ය කැප්පෙටියාගොඩ සිරිවිමල අනුනායක හිමිපාණන් වහන්සේ පසුගිය 18 වැනිදා අපවත් වූහ.  
කලක් රෝගාතුරුව පසුවූ උන්වහන්සේ මහනුවර පෞද්ගලික රෝහලක ප්‍රතිකාර ලබමින් සිටියදී අපවත් වනවිට 96 වැනි වියෙහි පසුවිය.

සිරිවිමල නාහිමිපාණන් වහන්සේ, ගැටඹේ රාජෝපවනාරාම විහාරස්ථානය කේන්ද්‍ර කරගනිමින් මෙරට බෞද්ධ පුනර්ජීවනය උදෙසාත්, සංස්කෘතික අභිවෘද්ධිය උදෙසාත් සුවිශාල මෙහෙවරක් ඉටුකළ යතිවරයාණන් වහන්සේනමකි.

එමෙන්ම ජාතික හා ආගමික වශයෙන් වැදගත් වූ විවිධ අවස්ථාවන්හිදී රටත් ආගමත් වෙනුවෙන් අභීතව හඬ නැගූ යතිවරයාණන් වහන්සේනමක් ලෙසද උන්වහන්සේ මේගෞරවාදරයට පාත්‍ර වූහ.

ගැටඹේ රාජෝපවනාරාමාධිපති අපවත්වී වදාළ පූජ්‍ය කැප්පිටියාගොඩ සිරිවිමල හිමියන්ගේ ආදාහන පූජෝත්සවය රාජ්‍ය අනුග්‍රහය සහිතව ගැටඹේ නාගරික ක්‍රීඩාංගණයේදී ඊයේ (21) පස්වරු 02.00ට සිදුකෙරිණි.