2026 වසරේ මෙරට විවාහක රූ රැජින Mrs. Sri Lanka World 2026 කිරුළ දිනා ගැනීමට නිෂාදි ඒකනායක සමත්ව තිබේ.
මෙවර ජාතික රූ රැජින තරගාවලියේ අවසාන මහා තරගයේදී දැඩි තරගකාරීත්වයක් මධ්‍යයේ අනෙකුත් දක්ෂතා දැක්වූ විවාහක යුවතියන් අභිබවමින් ඇය 12 වන අංකය යටතේ තරග වැදී මෙම කිරුළ තමන් සතු කර ගත්තාය.
මහනුවර මහාමායා බාලිකා විදුහලේ ආදි ශිෂ්‍යාවක් වන ඇය, පාසල් අවදියේදී අධ්‍යාපනයෙන් මෙන්ම ක්‍රීඩාවෙන්ද ඉහළ දක්ෂතා දැක්වූ තැනැත්තියකි.
ඇය හෙදියක් ලෙසත්, ව්‍යවසායිකාවක් ලෙසත් කටයුතු කරයි.
ඇය විද්‍යාපති උපාධි අපේක්ෂිකාවක් (MSc Scholar) ලෙසද සිය අධ්‍යාපන කටයුතුවල නිරත වෙමින් සිටියි.
ඉදිරියේදී ජාත්‍යන්තර වේදිකාවේ පැවැත්වෙන ලෝක විවාහක රූ රැජින (Mrs. World) තරගාවලිය සඳහා ශ්‍රී ලංකාව නියෝජනය කරමින් සහභාගී වීමට ඇය නියමිතය.
මෙම තරගාවලියේ ජාතික අධ්‍යක්ෂවරයා ලෙස චන්දිමාල් ජයසිංහ මහතා කටයුතු කරයි.
මීට පෙර ලෝක විවාහක රූ රැජින තරගාවලියේදී අතිශය සුවිශේෂී සහ ආඩම්බරකාරී ජයග්‍රහණ දෙකකට මෙරටට හිමිව ඇත.
රොසි සේනානායක (Rosy Senanayake) - 1984
ලෝක ඉතිහාසයේ ප්‍රථම වරට පවත්වන ලද මංගල Mrs. World (1984) තරගාවලියේදී ලෝක විවාහක රූ රැජින කිරුළ දිනා ගැනීමට ඇය සමත් විය.
ඕස්ට්‍රේලියාවේ ක්වීන්ස්ලන්තයේ පැවති මෙම තරගාවලියේදී ශ්‍රී ලංකාව නියෝජනය කරමින් මෙම ජාත්‍යන්තර කිරුළ දිනාගත් ප්‍රථම ලාංකිකාව ලෙස ඇය ඉතිහාසයට එක්විය. පසුකාලීනව ඇය මෙරට ප්‍රමුඛ පෙළේ දේශපාලනඥයකු සහ අමාත්‍යවරියක ලෙසද කටයුතු කළාය.
කැරොලයින් ජූරි (Caroline Jurie) - 2020
රොසි සේනානායක මහත්මිය කිරුළ දිනා වසර 35කට පමණ පසු, එනම් 2020 Mrs. World ලෝක විවාහක රූ රැජින කිරුළ යළිත් ශ්‍රී ලංකාවට දිනා දීමට කැරොලයින් ජූරි සමත් වූවාය.
අමෙරිකාවේ ලාස් වේගාස් නුවර පැවති මෙම තරගාවලියේදී ලෝකයේ රටවල් රැසක විවාහක රූ රැජිනන් අභිබවා ඇය මෙම කිරුළ දිනාගත් අතර, එය ශ්‍රී ලංකා නාමය ජාත්‍යන්තරය තුළ යළිත් බැබළවූ සුවිශේෂී අවස්ථාවක් විය.
ශ්‍රී ලංකාව මෙලෙස ලෝක විවාහක රූ රැජින (Mrs. World) ඉතිහාසයේ කිරුළස්ථාන දෙකක් හිමිකරගත් ආඩම්බරකාරී රටක් වන අතර, මෙවර ජාතික කිරුළ දිනාගත් නිෂාදි ඒකනායක වෙතද ඉදිරි ලෝක තරගාවලියේදී මෙවැනිම විශිෂ්ට ජයග්‍රහණයක් රටට ගෙන ඒමට හැකියාව ලැබේවා යන්න අපේ පැතුමයි!
