වෛද්‍යවරුන්ගේ වාර්ෂික ස්ථාන මාරු සහ පශ්චාත් සීමාවාසික වෛද්‍යවරුන් ස්ථානගත කිරීමේ ක්‍රියාවලියේ පවතින ප්‍රමාදයන් හා අක්‍රමිකතා හේතුවෙන් පර්යන්ත රෝහල් සහ ප්‍රාථමික සෞඛ්‍ය ඒකකවල සේවා බිඳවැටීමේ අවදානමක් මතුව ඇති බව රජයේ වෛද්‍ය නිලධාරීන්ගේ සංගමය පවසයි.
එම සංගමය පෙන්වා දී ඇත්තේ මෙරට වෛද්‍ය සේවාව දීප ව්‍යාප්ත සේවාවක් ලෙස පවත්වාගෙන යාම සඳහා විධිමත් ස්ථාන මාරු ක්‍රියාවලියක් අත්‍යවශ්‍ය වන බවය.
සෑම වසර හතරකටම වරක් කුසලතාව මත පදනම්ව ක්‍රියාත්මක වන වෛද්‍ය නිලධාරීන්ගේ වාර්ෂික ස්ථාන මාරු ක්‍රියාවලිය, දුෂ්කර හා පර්යන්ත රෝහල් ඇතුළු රට පුරා වෛද්‍ය සේවාව අඛණ්ඩව පවත්වාගෙන යාමට තීරණාත්මක බවද ඔවුන් පෙන්වා දී ඇත.
එමෙන්ම පශ්චාත් සීමාවාසික වෛද්‍යවරුන් ස්ථානගත කිරීමේදී සේවා අවශ්‍යතා සහ ආයතනික අවශ්‍යතා සැලකිල්ලට ගනිමින් ස්ථාන මාරු මණ්ඩල හරහා තීරණ ගන්නා බවද ඔවුන් සඳහන් කර තිබේ.
කෙසේ වෙතත්, ඔවුන් චෝදනා කරනුයේ සෞඛ්‍ය අමාත්‍යාංශය තුළ අදාළ බලධාරීන්ගේ අකාර්යක්ෂම හා අත්තනෝමතික ක්‍රියාමාර්ග හේතුවෙන් මෙම ක්‍රියාවලිය මේ වනවිට අර්බුදයකට පත්ව ඇති බවය.
ආයතන සංග්‍රහය සහ රාජ්‍ය සේවා කොමිෂන් සභාවේ කාර්ය පටිපාටිගත රීති අනුව වෛද්‍ය ස්ථාන මාරු සහ පශ්චාත් සීමාවාසික වෛද්‍යවරුන් ස්ථානගත කිරීම සඳහා ස්ථාන මාරු මණ්ඩලවල සහභාගිත්වය පිළිගෙන තිබියදීත්, අධ්‍යක්ෂ - වෛද්‍ය සේවා විසින් වගකීම් විරහිතව හා අත්තනෝමතිකව ක්‍රියා කිරීම හේතුවෙන් පශ්චාත් සීමාවාසික වෛද්‍යවරුන්ගේ ස්ථානගත කිරීම් ප්‍රමාද වී ඇති බවද එම සංගමය චෝදනා කර තිබේ.
එමෙන්ම වෛද්‍යවරුන්ගේ වාර්ෂික ස්ථාන මාරු ක්‍රියාවලියද අවිධිමත් හා අකාර්යක්ෂම තත්ත්වයකට පත්ව ඇති ඇතැයිද මෙම තත්ත්වය හේතුවෙන් ප්‍රාථමික සෞඛ්‍ය ඒකක ඇතුළු පර්යන්ත රෝහල්වල සේවා බිඳ වැටීමේ අවදානමක් මතුව ඇති බවත් රජයේ වෛද්‍ය නිලධාරීන්ගේ සංගමය සඳහන් කළේය.
මේ හේතුවෙන් වාර්ෂික ස්ථාන මාරු ලබාගැනීමට බලාපොරොත්තුවෙන් සිටින වෛද්‍යවරුන්ටද සිය ස්ථාන මාරු ක්‍රියාත්මක කරගැනීමට නොහැකි තත්ත්වයක් ඇතිවී තිබෙන බව සංගමය පැවසීය.
එම සංගමය සඳහන් කරනුයේ සේවා අවශ්‍යතා සහ ආයතනික අවශ්‍යතා නොසලකා ඇතැම් අවස්ථාවලදී ස්ථාන මාරු ක්‍රියාත්මක කිරීම හේතුවෙන් සෞඛ්‍ය සේවා සැපයීමද අර්බුදයට ලක්ව ඇති බවය.
මේ හේතුවෙන් අධ්‍යක්ෂ - වෛද්‍ය සේවා මගින් සිදුකරන අකාර්යක්ෂම, අවිධිමත් සහ අත්තනෝමතික ක්‍රියාපටිපාටිය හේතුවෙන් ස්ථාන මාරු ක්‍රියාවලිය අර්බුදයකට ලක්වී රෝගී සත්කාර සේවාවන්ටද බාධා එල්ල වී ඇති බවත් එය නැවත නිවැරදි කිරීමට වහාම කටයුතු කළ යුතු බවද රජයේ වෛද්‍ය නිලධාරීන්ගේ සංගමය සඳහන් කර තිබේ.
