දෙමළ සිනමාවේ ස්වර්ණමය යුගයක් නියෝජනය කළ ප්‍රවීණ සංගීත අධ්‍යක්ෂ දේවා මහතා අභවාප්‍රාප්ත වී තිබේ.
හෘදයාබාධයක් හේතුවෙන් චෙන්නායි හිදී ඒ මහතා අභවාප්‍රාප්ත වී ඇති බව සඳහන් වේ.
මියයන විට ඔහුගේ වයස අවුරුදු 75 කි.
අද (17) උදෑසන කාලයේදී හදිසියේ ඇති වූ පපුවේ වේදනාවක් හේතුවෙන් ඔහුව වහාම චෙන්නායි හි සූර්යා රෝහල වෙත ඇතුළත් කිරීමට පියවර ගෙන තිබුණි.
කෙසේ වෙතත්, රෝහල්ගත කරන විටත් ඔහුගේ තත්ත්වය බරපතල වී තිබූ අතර, වෛද්‍යවරුන් දැඩි උත්සාහයක් දැරුවද ඔහුව බේරා ගැනීමට නොහැකි වී තිබේ.
දේවා මහතාගේ හදිසි වියෝව දෙමළ සිනමා කර්මාන්තයට මෙන්ම ලොව පුරා සිටින සංගීත ලෝලීන්ට දැඩි කම්පනයක් ගෙන දී ඇත.
ආකර්ෂණීය තනු නිර්මාණයන්ගෙන්, ගැමි සංගීත අංග මුසු කළ ගීත වලින් සහ විශේෂයෙන්ම චෙන්නායි නගරයේ ජනප්‍රිය 'ගානා' (Gaana) සංගීත ශෛලිය ප්‍රධානධාරාවේ සිනමාවට සාර්ථකව හඳුන්වා දීමේ පුරෝගාමියා ලෙස ඔහු සිනමා ඉතිහාසයේ අමතක නොවන නමක් සටහන් කර ඇත.
දශක කිහිපයකට අධික කලා දිවියක් හිමි ඔහු දෙමළ, තෙළෙඟු, කන්නඩ සහ මලයාලම් යන භාෂාවලින් චිත්‍රපට සිය ගණනකට සංගීතය සපයා තිබේ.
1950 නොවැම්බර් 20 වන දින දෙවනේසන් චොක්කලිංගම් යන නමින් උපත ලද දේවා, 1990 දශකයේ දෙමළ සිනමාවේ අතිශයින්ම ජනප්‍රිය සංගීත අධ්‍යක්ෂවරයෙකු ලෙස වැජඹුණි.
සුපිරි නළු රජිනිකාන්ත් රඟපෑ 'අන්නමලෙයි', 'බාෂා' සහ 'අරුණාචලම්' වැනි සදාස්මර්ණීය සිනමාපට සඳහා ඔහු නිර්මාණය කළ සංගීත ඇල්බම අදටත් රසිකයන් අතර අතිශය ජනප්‍රියය.
ඔහුගේ අභාවය වෙනුවෙන් ඉන්දීය සිනමා ක්ෂේත්‍රයේ ප්‍රකට නළුවන්, ගායකයන් සහ සංගීත ශිල්පීන් රැසක් සිය දැඩි ශෝකය පළ කරමින් සිටිති.
