අසාධ්‍ය තත්ත්වයෙන් පසුවන ‘කාවන්තිස්ස’ ඇතාගේ ජීවිතය බේරාගැනීම සඳහා ප්‍රතිකාර කටයුතු අඛණ්ඩව සිදු කෙරෙන බැවින්, එම කටයුතුවලට බාධා නොවන පරිදි නිහඬ පරිසරයක් පවත්වා ගැනීමට සහාය වන ලෙස ඉල්ලීමක් කර තිබේ.
සියඹලන්ගමුව වනජීවී කලාපයට අයත් ප්‍රදේශයක කුඹුරක ඇද වැටී සිටින කාවන්තිස්ස ඇතා, ඊයේ දිනයේදී ප්‍රතිකාර කළ ස්ථානයේ සිට කිලෝමීටර් දෙකක පමණ දුරක් ගමන් කිරීමෙන් අනතුරුව මෙලෙස ඇද වැටී ඇති බව වාර්තා වේ.
වනජීවී සංරක්ෂණ දෙපාර්තමේන්තුවේ විශේෂඥ පශු වෛද්‍ය කණ්ඩායම් ඇතාගේ ජීවිතය බේරාගැනීම සඳහා පැය 24 පුරා ප්‍රතිකාර කටයුතුවල නිරතව සිටින බව සඳහන් වේ.
ඇතාගේ කායික තත්ත්වය ස්ථාවර කිරීම සඳහා සේලයින් සහ අත්‍යවශ්‍ය ඖෂධ ලබාදෙමින් ප්‍රතිකාර සිදු කරන බව ද වාර්තා වේ.
ප්‍රතිකාර සිදුකරන ස්ථානය අවට විශාල පිරිසක් රැස්වීම හේතුවෙන් ඇතාට මානසික ආතතියක් ඇතිවිය හැකි අතර, වෛද්‍ය කණ්ඩායමේ කටයුතුවලට ද බාධා සිදුවිය හැකි බව පෙන්වා දී තිබේ.
ඒ අනුව, ප්‍රතිකාර කලාපයට අනවශ්‍ය ලෙස ඇතුළු වීමෙන් සහ එම ස්ථානය අවට රැස්වීමෙන් වළකින ලෙසත්, ශබ්ද නැගීමෙන් සහ ඩ්‍රෝන කැමරා භාවිතයෙන් වැළකී සිටින ලෙසත් ජනතාවගෙන් ඉල්ලා සිටී.
කාවන්තිස්ස ඇතාට අවශ්‍ය සන්සුන් පරිසරය සලසා දෙමින් පශු වෛද්‍ය කණ්ඩායමට ප්‍රතිකාර කටයුතු බාධාවකින් තොරව සිදු කිරීමට ඉඩ ලබාදීම මේ මොහොතේ අත්‍යවශ්‍ය බව ද අවධාරණය කර තිබේ.
