කථානායක ජගත් වික්‍රමරත්න මහතාට එරෙහිව විපක්ෂය විසින් ඉදිරිපත් කර ඇති විශ්වාසභංග යෝජනාව පිළිබඳ විවාදය දින නියමයක් නොමැතිව කල් දමා තිබේ.
ඉදිරි සතියේ පාර්ලිමේන්තු කටයුතු තීරණය කිරීම සඳහා පාර්ලිමේන්තු කටයුතු පිළිබඳ කාරක සභාව අද (16) දිනයේ පාර්ලිමේන්තු සංකීර්ණයේදී රැස්ව තිබිණි.
අදාළ විවාදය ලබන 20වන අගහරුවාදා දිනයේ විවාදයට ගැනීමට ආණ්ඩු පක්ෂය විසින් යෝජනා කර ඇති අතර කථානායකවරයාට එරෙහි යෝජනාවේ කරුණු 50ක් සඳහන්ව ඇති බැවින් ඊට එක් දිනයක් ප්‍රමාණවත් නොවන බවයි විපක්ෂයේ නියෝජිතයින් පෙන්වාදී ඇත.
කෙසේවෙතත් කථානායකවරයාට එරෙහිව ඉදිරිපත් කළ විශ්වාසභංග යෝජනාවේ ඇතුළත් කරුණුවල තාක්ෂණික ගැටළු කිහිපයක් පවතින බැවින් ඒ පිළිබඳ නීතිපතිවරයාගේ මතය විමසිය යුතු බවට ආණ්ඩු පක්ෂය විසින් එහිදී ප්‍රකාශ කර තිබේ.
ඒ අනුව ඒ සඳහා යම් කාලයක් ගත වන බැවින් විශ්වාසභංග යෝජනාව පිළිබඳ විවාදය ඉදිරි පාර්ලිමේන්තු සතියේ විවාදයට ගැනීමට නොහැකි බව පාර්ලිමේන්තු කටයුතු පිළිබඳ කාරක සභාවේදී තීරණයවී ඇත.
ඒ අනුව නීතිපති උපදෙස් ලැබීමෙන් පසු කථානායකවරයාට එරෙහි විශ්වාසභංග යෝජනාව විවාදයට ගැනෙන දින පිළිබඳ තීරණය වනු ඇති බව විපක්ෂයේ ප්‍රධාන සංවිධායක ගයන්ත කරුණාතිලක මහතා සඳහන් කළේය.
