කථානායකවරයාගේ මැදිහත්වීම මත පාර්ලිමේන්තුවේ නියෝජ්‍ය මහලේකම් චමින්ද කුලරත්න මහතාගේ වැඩ තහනම් කිරීමට ගෙන ඇති තීරණය නීතියට පටහැනි බවත්, ඒ සම්බන්ධයෙන් මැදිහත් වී පරීක්ෂා කිරීමට අධිකරණයට බලය පවතින බවත් පෙත්සම්කරු වෙනුවෙන් පෙනී සිටි ජනාධිපති නීතිඥ සංජීව ජයවර්ධන මහතා අභියාචනාධිකරණය හමුවේ ප්‍රකාශ කර තිබේ.
කිසිදු සාධාරණ නීතිමය පදනමකින් තොරව සිය වැඩ තහනම් කිරීමට ගෙන ඇති තීරණය අභියෝගයට ලක් කරමින් චමින්ද කුලරත්න මහතා විසින් ගොනුකර ඇති රිට් පෙත්සම ඊයේ (15) සලකා බැලූ අවස්ථාවේදී ඔහු මේ බව සඳහන් කළේය.
අභියාචනාධිකරණ සභාපති විනිසුරු රොහාන්ත අබේසූරිය සහ විනිසුරු ප්‍රියන්ත ප්‍රනාන්දු යන මහත්වරුන්ගෙන් සමන්විත විනිසුරු මඩුල්ල හමුවේ මෙම පෙත්සම කැඳවනු ලැබීය.
එහිදී කථානායක වෛද්‍ය ජගත් වික්‍රමරත්න මහතා වෙනුවෙන් පෙනී සිටි ජනාධිපති නීතිඥ කේ. කනගේෂ්වරන් මහතා මූලික විරෝධතා ඉදිරිපත් කළේය.
පාර්ලිමේන්තු කාර්ය මණ්ඩල උපදේශක කාරක සභාව පාර්ලිමේන්තු වරප්‍රසාදවලට යටත් වන බැවින් එහි තීරණ අධිකරණය හමුවේ අභියෝගයට ලක් කළ නොහැකි බවත්, ඒ අනුව එවැනි තීරණයකට එරෙහිව අභියාචනාධිකරණයේ රිට් බලය ක්‍රියාත්මක කළ නොහැකි බවත් ඔහු තර්ක කළේය.
අමාත්‍ය බිමල් රත්නායක මහතා ඇතුළු වගඋත්තරකරුවන් දෙදෙනෙකු වෙනුවෙන් පෙනී සිටි ජනාධිපති නීතිඥවරුන් වන නයිජල් හැච් සහ උපුල් කුමරප්පෙරම යන මහත්වරු ද එම මූලික විරෝධතාවලට සහාය පළ කළහ.
ඊට පිළිතුරු දෙමින් පෙත්සම්කරු වෙනුවෙන් කරුණු දැක්වූ ජනාධිපති නීතිඥ සංජීව ජයවර්ධන මහතා පෙන්වා දුන්නේ මෙරට නීතියේ උත්තරීතරත්වය ආණ්ඩුක්‍රම ව්‍යවස්ථාවට හිමි වන බවය.
පාර්ලිමේන්තු වරප්‍රසාදවල අරමුණ ව්‍යවස්ථාදායකයේ නීත්‍යනුකූල කටයුතු ස්වාධීනව පවත්වාගෙන යාමට ආරක්ෂාව සැලසීම බවත්, පාර්ලිමේන්තු පරිපාලනය විසින් ගනු ලබන සෑම තීරණයකටම එම වරප්‍රසාද යටතේ මුක්තියක් හිමි නොවන බවත් ඔහු සඳහන් කළේය.
පාර්ලිමේන්තු කාර්ය මණ්ඩලයේ පත්වීම් සහ විනය පාලනය සම්බන්ධයෙන් ගනු ලබන තීරණ ව්‍යවස්ථාදායකයේ කටයුතුවලට සමාන කරමින් අධිකරණ අධීක්ෂණයෙන් බැහැර කළ නොහැකි බව ද ජනාධිපති නීතිඥවරයා තර්ක කළේය.
වත්මන් ආණ්ඩුක්‍රම ව්‍යවස්ථාව යටතේ පාර්ලිමේන්තු මහලේකම්වරයා පාර්ලිමේන්තු පරිපාලනයේ ප්‍රධාන විධායක නිලධාරියා ලෙස කටයුතු කරන අතර, කාර්ය මණ්ඩලයේ විනය පාලනයට අදාළ බලතල ඔහු සතු බව ද ඔහු පෙන්වා දුන්නේය.
පෙත්සම්කරුගේ වැඩ තහනම් කිරීම සහ චෝදනා පත්‍ර නිකුත් කිරීම කථානායකවරයාගේ උපදෙස් මත සිදුකර ඇති බව පාර්ලිමේන්තු මහලේකම්වරයා ඉදිරිපත් කළ දිවුරුම් ප්‍රකාශයෙන් පැහැදිලි වන බව සඳහන් කළ ජනාධිපති නීතිඥවරයා, ඒ අනුව අදාළ තීරණයේ නීත්‍යනුකූලභාවය පරීක්ෂා කිරීමට අධිකරණයට බලය ඇති බව ද ප්‍රකාශ කළේය.
ඉදිරිපත් වූ කරුණු සලකා බැලූ අභියාචනාධිකරණය වැඩිදුර කරුණු දැක්වීම නොවැම්බර් 2 වනදා දක්වා කල් තැබීය.
