මත්ද්‍රව්‍ය ජාවාරමෙන් නීතිවිරෝධී ලෙස උපයාගත් බවට සැකකෙරෙන රුපියල් කෝටි 8.5කට අධික වටිනාකමකින් යුත් මුදල් සහ දේපොළ ක්‍රියා විරහිත කිරීමට නියෝග කර තිබේ.
ඒ අනුව, යාපනය අධිකරණය භාරයේ පවතින රුපියල් මිලියන 15ක මුදලක් සහ යාපනය, මාදගල් ප්‍රදේශයේ ඉදිකර ඇති රුපියල් මිලියන 70කට අධික වටිනාකමකින් යුත් දෙමහල් නිවසක් මෙලෙස ක්‍රියා විරහිත කර ඇත.
නීතිවිරෝධී වත්කම් විමර්ශන කොට්ඨාසය සඳහන් කළේ, මුදල් විශුද්ධිකරණය වැළැක්වීමේ පනත යටතේ මෙම නියෝග ඊයේ (15)සිට දින 14ක කාලයක් සඳහා නිකුත් කර ඇති බවය.
2023 අගෝස්තු 31 වනදා යාපනය විශේෂ කාර්ය බළකා කඳවුරේ නිලධාරීන් විසින් රුපියල් මිලියන 15ක මුදලක් සන්තකයේ තබාගෙන සිටි පුද්ගලයින් පස්දෙනෙකු ලොරි රථයක් ද සමඟ අත්අඩංගුවට ගෙන කෝපායි පොලීසියට ඉදිරිපත් කර තිබුණි.
ඒ සම්බන්ධයෙන් නීතිවිරෝධී වත්කම් විමර්ශන කොට්ඨාසය සිදුකළ වැඩිදුර විමර්ශනවලදී, සැකකරුවෙකු වන යාපනය, මාදගල් ප්‍රදේශයේ පදිංචි 32 හැවිරිදි පුද්ගලයෙකු මත්ද්‍රව්‍ය ජාවාරමෙන් උපයාගත් බවට සැක කෙරෙන මුදල් යොදා රුපියල් කෝටි 7කට අධික වටිනාකමකින් යුත් දෙමහල් නිවසක් ඉදිකර ඇති බව අනාවරණය වී තිබේ.
සිද්ධිය සම්බන්ධයෙන් නීතිවිරෝධී වත්කම් විමර්ශන කොට්ඨාසය වැඩිදුර විමර්ශන සිදුකරයි.
