ගැසට් කරන ලද, ත්‍රස්තවාදය වැළැක්වීමේ පනතවෙනුවට හඳුන්වා දීමට යෝජිත “ත්‍රස්තවාදයෙන් රාජ්‍යය ආරක්ෂා කිරීමේ පනත් කෙටුම්පත” සම්බන්ධයෙන් Transparency International Sri Lanka ආයතනය සිය කනස්සල්ල පළ කර තිබේ.
මානව හිමිකම් ක්ෂේත්‍රයේ ක්‍රියාකාරීන් විසින් මේ වනවිටත් සිය කනස්සල්ල පළ කර ඇති මෙම පනත් කෙටුම්පතෙහි ත්‍රස්තවාදය පිළිබඳ පුළුල් අර්ථ දැක්වීම්, විධායකයේ බලතල පුළුල් කිරීම, පරිපාලනමය රඳවා තබා ගැනීම් සහ මූලික නිදහස සීමා කිරීම සම්බන්ධයෙන් බරපතළ ගැටලු පවතින බව TISL ආයතනය පෙන්වා දේ.
ත්‍රස්තවාදය වැළැක්වීමේ පනත වෙනුවට හඳුන්වා දීමට යෝජිත “ත්‍රස්තවාදයෙන් රාජ්‍යය ආරක්ෂා කිරීමේ පනත් කෙටුම්පත” ඉල්ලා අස්කර ගන්නා ලෙස ට්‍රාන්ස්පේරන්සි ඉන්ටර්නැෂනල් ශ්‍රී ලංකා (TISL) ආයතනය රජයෙන් ඉල්ලා සිටී.
ත්‍රස්තවාදය පිළිබඳ පුළුල් අර්ථ දැක්වීම්, විධායකයේ බලතල පුළුල් කිරීම, පරිපාලනමය රඳවා තබා ගැනීම් සහ අදහස් ප්‍රකාශ කිරීමේ නිදහස සීමා වීමේ අවදානම මෙම පනත් කෙටුම්පත සම්බන්ධයෙන් මතු වී ඇති ප්‍රධාන ගැටලු බව TISL ආයතනය සඳහන් කරයි.
පනත් කෙටුම්පත මඟින් දේපළ, පරිසරය සහ ඉලෙක්ට්‍රොනික පද්ධතිවලට හානි කිරීම ඇතුළු පුළුල් පරාසයක ක්‍රියා ත්‍රස්තවාදී වැරදි ලෙස අර්ථකථනය කිරීමේ අවදානමක් පවතින බවත්, එමඟින් නීත්‍යනුකූල අදහස් ප්‍රකාශ කිරීම, සංවිධානය වීම සහ සිවිල් සමාජ ක්‍රියාකාරකම් සීමා විය හැකි බවත් එම ආයතනය පෙන්වා දෙයි.
එමෙන්ම, සන්නද්ධ හමුදාවන්ට සහ වෙරළාරක්ෂක දෙපාර්තමේන්තුවට අත්අඩංගුවට ගැනීම්, සෝදිසි කිරීම්, දේපළ අත්පත් කර ගැනීම් සහ ප්‍රශ්න කිරීම් සම්බන්ධයෙන් පුළුල් බලතල ලබාදීම හේතුවෙන් වගවීම සහ පුද්ගල නිදහස ආරක්ෂා කිරීම පිළිබඳ ගැටලු මතුවිය හැකි බවද TISL ආයතනය සඳහන් කරයි.
යෝජිත නීතිය යටතේ ආරක්ෂක අමාත්‍යාංශයේ ලේකම්වරයාට මුල් මාස දෙකක කාලයක් සඳහා රඳවා තබා ගැනීමේ නියෝග නිකුත් කිරීමට බලය ලබාදීම සහ එවැනි රඳවා තබා ගැනීම් සම්බන්ධයෙන් අධිකරණයට ඇති අධීක්ෂණ හැකියාව සීමා වීම ද එම ආයතනයේ විවේචනයට ලක්ව තිබේ.
තවද, සංවිධාන තහනම් කිරීමට ජනාධිපතිවරයාට බලය ලබාදීම සහ එවැනි තීරණ පාලනය කරන ආරක්ෂණ විධිවිධාන සීමිත වීම හේතුවෙන් සංවිධානය වීමේ නිදහසට හා සිවිල් සමාජ ක්‍රියාකාරකම්වලට බලපෑම් ඇති විය හැකි බව TISL ආයතනය අවධාරණය කරයි.
ජාතික ආරක්ෂාව තහවුරු කිරීමේ අවශ්‍යතාව පිළිගන්නා නමුත්, ඒ සඳහා හඳුන්වා දෙන නීති මඟින් මූලික අයිතිවාසිකම්, නිසි නීතිමය ක්‍රියාපටිපාටිය සහ අධිකරණයේ ස්වාධීනත්වය ආරක්ෂා කළ යුතු බවද එම ආයතනය පවසයි.
ඒ අනුව, යෝජිත පනත් කෙටුම්පත ඉල්ලා අස්කර ගන්නා ලෙසත්, ත්‍රස්තවාදය වැළැක්වීමේ පනත තවදුරටත් ප්‍රමාදයකින් තොරව අහෝසි කරන ලෙසත් TISL ආයතනය රජයෙන් ඉල්ලා සිටී.
