අමෙරිකාවේ ඉලිනොයිස් ප්‍රාන්තයේ, චිකාගෝ නගරයේ ඕරෝරා ප්‍රදේශයේ පිහිටි හින්දු දේවස්ථානයක් ඉලක්ක කර ගනිමින් වෙඩි තැබීමේ ප්‍රහාරයක් සැලසුම් කළ 19 හැවිරිදි තරුණයෙක් එරට පොලීසිය විසින් අත්අඩංගුවට ගෙන තිබේ.
පැලටීන් ප්‍රදේශයේ පදිංචි ඇලෙක්සැන්ඩ්‍රොස් පැපොරාකිස් නමැති එම පුද්ගලයා ආපනශාලාවක සේවය කරන අයෙක් බව සඳහන් වේ.
පරීක්ෂණ වලදී හෙළි වී ඇත්තේ සුදු ජාතිකවාදී අන්තවාදී අදහස් ප්‍රකාශ කරන සහ ඉන්දීය සම්භවයක් ඇති පුද්ගලයන්ට එරෙහිව හිංසා පීඩා කිරීමට අනුබල දෙන ප්‍රකාශ ඇතුළත් ප්‍රකාශන මෙන්ම ගිනි අවි සහ යුධෝපකරණ රැසක් සැකකරු සතුව තිබී සොයා ගෙන ඇති බවය.
සැකකරු විසින් සිදු කිරීමට ගිය ප්‍රහාරය පිළිබඳව වෙනත් පුද්ගලයෙකු විසින් පොලීසියට තොරතුරු ලබා දී තිබේ.
ඔක්තෝබර් 11 වන ඉරිදා දින ඕරෝරා ප්‍රදේශයේ හින්දු දේවස්ථානයක් ඉලක්ක කර ගනිමින් මොහු ප්‍රහාරය එල්ල කිරීමට සැලසුම් කර ඇති බව පොලිස් පරීක්ෂණ වලදී අනාවරණය වී ඇත.
ප්‍රහාරය එල්ල කිරීමට ගිය අවස්ථාවේදී ඔහුගේ රයිෆල් තුවක්කුව ක්‍රියා විරහිත වීම නිසා එම මහා පරිමාණ සංහාරය වැළැක්වී ගොස් ඇති බව බලධාරීහු සඳහන් කරති.
සිද්ධියෙන් පසු නිවසින් පිටව යමින් සිටියදී පැලටීන් සහ මවුන්ට් ප්‍රොස්පෙක්ට් පොලිස් දෙපාර්තමේන්තු ඒකාබද්ධව සැකකරු අත්අඩංගුවට ගෙන ඇත.
සැකකරුගේ නිවසේ සිදු කළ සෝදිසියකදී රයිෆල් තුවක්කුවක්, පතොරම් පිරවූ මැගසින් රැසක්, උණ්ඩ තොගයක්, යුධමය ඇඳුම් සහ සුදු ජාතිකවාදී අන්තවාදයට සම්බන්ධ ලාංඡන සහිත සන්නාහ කබායක් (Body armour) ද පොලිසිය විසින් සොයාගෙන තිබේ.
