ඉරානයේ ජාතික ආරක්ෂක මණ්ඩලයේ ලේකම් Mohsen Rezaei සහ ඉන්දීය ජාතික ආරක්ෂක උපදේශක අජිත් දෝවාල් අතර විශේෂ දුරකථන සාකච්ඡාවක් පවත්වා ඇති බව විදෙස් මාධ්‍ය පවසයි.
එහිදී කලාපීය වර්ධනයන් සහ දෙරටටම වැදගත් වන පොදු කරුණු පිළිබඳව සාකච්ඡා වූ බව ඉන්දියාවේ ඉරාන තනාපති කාර්යාලය පවසයි.
X සටහනක් තබමින් එම තනාපති කාර්යාලය සඳහන් කළේ, මෙම ජ්‍යේෂ්ඨ නිලධාරීන් දෙදෙනා අතර පැවැති සාකච්ඡාවේදී කලාපීය කටයුතුවල සිට ඉන්දියාව සහ ඉරානය අතර ද්විපාර්ශ්වික සබඳතා දක්වා වූ කරුණු රාශියක් කෙරෙහි අවධානය යොමු වූ බවය.
මෙම සාකච්ඡා පැවැත්වෙන්නේ කලාපීය නොසන්සුන්තාවන් සහ වෙළෙඳ නාවික නෞකාවලට එල්ල වන ප්‍රහාරයන් මධ්‍යයේය.
මීට අමතරව, හෝමූස් සමුද්‍ර සන්ධිය නැවත විවෘත කිරීම සඳහා ඉරානය ඉදිරිපත් කළ කොන්දේසි 7න් කිහිපයකට අමෙරිකා එක්සත් ජනපදය එකඟ වී ඇති නමුත් වොෂින්ටනයෙන් ලැබුණු ප්‍රතිචාරය ප්‍රමාණවත් නොවන බවත් ඉරානයේ ජාතික ආරක්ෂක මණ්ඩලයේ ලේකම් පවසා තිබේ.
මේ අතර විදේශීය හමුදා ආක්‍රමණ සහ ආර්ථික සම්බාධක පවතින තෙක් කලාපයට නැවත සාමය සහ ආරක්ෂාව උදා විය නොහැකි බවට අනතුරු අඟවමින්, හෝමූස් සමුද්‍ර සන්ධියේ පූර්ණ පාලනය තවදුරටත් ටෙහෙරාන් පාලනය සතුව පවතින බව ඉරාන විදේශ කටයුතු අමාත්‍යාංශයේ ප්‍රකාශකයා පවසා ඇත.
වත්මන් තත්ත්වය පිළිබඳව අමෙරිකාව ඉදිරිපත් කරන කරුණු ප්‍රතික්ෂේප කරමින් ඉරාන විදේශ කටයුතු අමාත්‍යාංශයේ ප්‍රකාශකයා පෙන්වා දුන්නේ, වොෂින්ටනයේ නිල ප්‍රකාශවලට වඩා වෙළඳපොළේ සැබෑ තත්ත්වය සම්පූර්ණයෙන්ම වෙනස් බවය.
