විෂ වර්ග, අබිං සහ අන්තරායදායක ඖෂධ පිළිබඳ ආඥාපනත සංශෝධනය කිරීම සඳහා ඉදිරිපත් කර ඇති පනත් කෙටුම්පත් දෙකක් පාර්ලිමේන්තුවේ සරල බහුතරයකින් සම්මත කළ හැකි බව ශ්‍රේෂ්ඨාධිකරණය තීරණය කර තිබේ.
අද (09) පාර්ලිමේන්තුවේදී නියෝජ්‍ය කථානායක රිස්වි සාලි මහතා විසින් ශ්‍රේෂ්ඨාධිකරණයේ තීරණ පාර්ලිමේන්තුවට දැනුම් දෙමින් මේ බව පැවසීය.
ආණ්ඩුක්‍රම ව්‍යවස්ථාවේ 121(1) ව්‍යවස්ථාව යටතේ අභියෝගයට ලක්කර තිබූ 2026 අංක 79 දරන විෂ වර්ග, අබිං සහ අන්තරායදායක ඖෂධ (සංශෝධන) පනත් කෙටුම්පත (LDO 8/2026) සහ 2026 අංක 80 දරන විෂ වර්ග, අබිං සහ අන්තරායදායක ඖෂධ (සංශෝධන) පනත් කෙටුම්පත (LDO 11/2026) ශ්‍රේෂ්ඨාධිකරණය විසින් පරීක්ෂාවට ලක්කර ඇති බව නියෝජ්‍ය කථානායකවරයා මෙහිදී සඳහන් කළේය.
ඒ අනුව, 2026 අංක 79 දරන පනත් කෙටුම්පත කාරක සභා අවස්ථාවේදී නිශ්චිත සංශෝධන කිහිපයක් සිදුකිරීමට යටත්ව පාර්ලිමේන්තුවේ සරල බහුතරයකින් සම්මත කළ හැකි බව ශ්‍රේෂ්ඨාධිකරණය තීරණය කර ඇත.
එම සංශෝධන යෝජිත 77අ(5) වගන්තියට අදාළ වන අතර, සැකකරුවකු අධිකරණය හමුවේ පෙනී සිටීම සහ අදාළ වාර්තා සැකකරුට හෝ ඔහුගේ නීතිඥවරයාට භාරදෙන දිනය සම්බන්ධයෙන් වගන්ති සංශෝධනය කිරීම මීට ඇතුළත් වේ.
මේ අතර, 2026 අංක 80 දරන පනත් කෙටුම්පත ආණ්ඩුක්‍රම ව්‍යවස්ථාවේ කිසිදු විධිවිධානයකට පටහැනි නොවන බව ශ්‍රේෂ්ඨාධිකරණය තීරණය කර ඇති අතර, එය ද පාර්ලිමේන්තුවේ සරල බහුතරයකින් සම්මත කළ හැකි බව දැනුම් දී තිබේ.
ශ්‍රේෂ්ඨාධිකරණයේ මෙම තීරණ එදින පාර්ලිමේන්තු කටයුතු පිළිබඳ නිල වාර්තාවට ඇතුළත් කරන ලෙස ද නියෝජ්‍ය කථානායක වෛද්‍ය රිස්වි සාලි මහතා උපදෙස් ලබා දී ඇත.
