
2027 වසරේ සිට 6 ශ්රේණියේදී ව්යවසායකත්වය සහ මූල්ය සාක්ෂරතාවය පිළිබඳ නව විෂයක් හඳුන්වාදීමට කටයුතු කරන බව අග්රාමාත්ය ආචාර්ය හරිනි අමරසූරිය පවසන්නීය.
මූල්ය සාක්ෂරතාව ප්රවර්ධනය කිරීම වෙනුවෙන් පැවති සීනුව නාද කිරීමේ උත්සවයකට එක්වෙමින් අග්රාමාත්යවරිය මේ බව සඳහන් කළාය.
නව විෂය මාලා සංශෝධනය යටතේ 6 ශ්රේණියේ සිට 9 ශ්රේණිය දක්වා ව්යවසායකත්වය සහ මූල්ය සාක්ෂරතාවය පිළිබඳ දැනුම ලබාදීමට කටයුතු කරන බව ඇය පවසන්නීය.
එහි පළමු අදියර ලෙස 2027 වසරේදී සියලු පාසල් දරුවන්ට 6 ශ්රේණියේ සිට මෙම විෂය හඳුන්වාදීමට නියමිත බවද අග්රාමාත්යවරිය සඳහන් කළේය.
එමෙන්ම, පාසල් දරුවන් සහ තරුණ පරපුර කුඩා අවධියේ සිටම ව්යවසායකත්වය හා ආයෝජනය පිළිබඳ ප්රායෝගික අවබෝධයක් ලබාගැනීම සඳහා Stock Market Game සහ පාසල් ප්රාග්ධන වෙළෙඳපොළ සංගම් ඇතුළු වැඩසටහන් දියත් කර ඇති බවද ඇය පෙන්වා දුනි.
මූල්ය සාක්ෂරතාව ලබාදීමේදී ආචාරධර්ම පිළිබඳවද අවධානය යොමු කළ යුතු බව අවධාරණය කළ අග්රාමාත්යවරිය, අනෙකුත් පුද්ගලයන් සූරාකෑමෙන් හෝ වංචා කිරීමෙන් මුදල් උපයා ගැනීම නොව, වගකීමෙන් සහ සදාචාරාත්මකව කටයුතු කිරීමේ වැදගත්කමද තරුණ පරපුරට හඳුන්වා දිය යුතු බව සඳහන් කළාය.
"අපට අවශ්ය කරන්නේ මුදල් සහ මූල්ය පද්ධතිය ගැන දැනුම සමාජයේ සීමිත පිරිසකට විතරක් සීමා වෙච්ච රටක් නෙමෙයි. රටේ සෑම පුරවැසියෙකුටම තමන් උපයන මුදල නිවැරදිව කළමනාකරණය කරගන්න, නිසි ලෙස ඉතිරි කරන්න, අවදානම් තේරුම් අරගෙන ආයෝජනය කරන්න, ඒ වගේම වංචාකාරී මූල්ය ජාවාරම්වලට අසු නොවී සිටින්න පුළුවන් දැනුවත්භාවයක් ලබාදීමයි අපේ අරමුණ.
විශේෂයෙන්ම, අපේ අනාගතය භාරගන්න ඉන්න පාසල් දරුවන් වෙනුවෙන් අපි විශාල ආයෝජනයක් කරනවා. ඒ නිසාම, නව විෂය මාලා සංශෝධන යටතේ 6 වන ශ්රේණියේ සිට 9 වන ශ්රේණිය දක්වා "ව්යවසායකත්වය හා මූල්ය සාක්ෂරතාව" නමින් නව විෂය ක්ෂේත්රයක් හඳුන්වා දෙන්න අපි කටයුතු කරගෙන යනවා.
ඒ වගේම අද දියත් කෙරෙන "Stock Market Game" සහ පාසල් ප්රාග්ධන වෙළෙඳපොළ සංගම් වැනි ප්රායෝගික වැඩසටහන් හරහා දරුවන්ට සහ තරුණ පරපුරට කුඩා අවදියේ සිටම ව්යවසායකත්වය සහ ආයෝජනය ගැන නිවැරදි අවබෝධයක් ලබාදෙන්න පුළුවන් වෙනවා.
කොළඹ කොටස් හුවමාරුවේ 40 වැනි සංවත්සරය සමරන මේ මොහොතේ, දිවයින පුරා ශාඛා 13ක් දක්වා පුළුල් කරමින් ජනතාව අතරට මූල්ය දැනුම ගෙන යන්න දරන උත්සාහය රජයක් විදිහට අපි අගය කරනවා.
සාම්ප්රදායික ඉතුරුම් ක්රමවලින් ඔබ්බට ගිහින්, රටේ ප්රාග්ධන වෙළෙඳපොළ ශක්තිමත් කරන්නත්, තරුණ පරපුරට නව ආයෝජන අවස්ථා නිර්මාණය කරලා දෙන්නත් අපි කැපවී සිටිනවා."
අපේ දරුවන්ට මම කියන්නේ වෙනස් විදිහට හිතන්න. අවස්ථා එනකම් බලා ඉන්නේ නැතුව, නව අවස්ථා සොයන්න, අවස්ථා නිර්මාණය කරන්න. විභාගයකට ලකුණු ගන්න විතරක් නෙමෙයි, ජීවිත කාලයටම උපකාරී වෙන නිවැරදි මූල්ය පරිශීලනයක් සමාජය තුළ ගොඩනඟන්න එකතු වෙන්න. යනුවෙන් පැවසීය.














































