විෂ එන්නත් ලබා දී මරණ දඬුවම ක්‍රියාත්මක කිරීමට දැරූ ප්‍රයත්නය අසාර්ථක වීමෙන් අනතුරුව, ඇමෙරිකාවේ 50 හැවිරිදි ක්‍රිස්ටා පයික් නමැති කාන්තාව මේ වන විට දැඩි සත්කාර ඒකකයේ ප්‍රතිකාර ලබන බව වාර්තා වේ.
තම පෙම්වතාට අපහාස කළ බවට හා ඔහුව පැහැර ගැනීමට උත්සාහ කළ බවට චෝදනා කරමින්, 1995 වසරේදී 19 හැවිරිදි කොලීන් ස්ලෙමර් නමැති තරුණියට වධහිංසා පමුණුවා ඝාතනය කිරීමේ වරදට ක්‍රිස්ටා පයික් හට මරණ දඬුවම නියම වූයේ 1996 වසරේදී ය.
ඝාතනය සිදු කරන අවස්ථාවේ ඇගේ වයස අවුරුදු 18ක් වූ අතර, ඇය ටෙනෙසි ප්‍රාන්තයේ මරණ දඬුවම නියම වී සිටින එකම කාන්තාව ද වේ.
එසේම මෙම ප්‍රාන්තය තුළ කාන්තාවකට මරණ දඬුවම ක්‍රියාත්මක කිරීමට සූදානම් වූයේ වසර 200කට පසුව වීම ද විශේෂත්වයකි.
ඇයට මරණ දඬුවම ක්‍රියාත්මක කිරීම වළක්වමින් පහළ අධිකරණයක් ලබා දී තිබූ අත්හිටුවීමේ නියෝගය එරට ශ්‍රේෂ්ඨාධිකරණය මගින් අවලංගු කිරීමත් සමඟ, ඇයට විෂ එන්නත් විද මරණ දඬුවම ලබා දීමට නියමිතව තිබුණි.
කෙසේ වෙතත්, ඉකුත් බදාදා බන්ධනාගාර නිලධාරීන් විසින් ඇයගේ සිරුරට පෙන්ටොබාබිටල් (Pentobarbital) නැමැති විෂ ඖෂධ මාත්‍රාවන් දෙකක් ලබා දී තිබුණ ද ඇය මියගොස් නොමැත.
පසුව ගිලන් රථයකින් ඇයව නෑෂ්විල් ප්‍රදේශයේ රෝහලකට ඇතුළත් කිරීමට බලධාරීන්ට සිදු විය.
මේ වන විට ඇය සිහිසුන්ව, ශ්වසන යන්ත්‍ර ආධාරයෙන් පසුවන බව ඇගේ නීතිඥයෝ පවසති.
විෂ එන්නත් කිරීමේදී ඇගේ සිරුරට කටු 7කට වඩා වැඩි සංඛ්‍යාවක් භාවිතා කර ඇති අතර, එක් ඉඳිකටුවක් අංශක 90කට නැමී තිබූ බව ද සඳහන් වේ.
විෂ ශරීරගත වන අතරතුර ඇය හඬමින් සහ වේදනාත්මකව කෑගසමින් සිට ඇත.
ඇයට පවතින රුධිරය කැටිගැසීමේ රෝගී තත්ත්වයක් සහ සිරුරේ ලේ නහර කුඩා වීම හේතුවෙන් විෂ ඖෂධය නිවැරදිව රුධිරයට ගමන් නොකර සම යට පටක අතරට කාන්දු වීම හෝ රුධිරය කැටි ගැසීම නිසා ඇගේ ජීවිතය බේරෙන්නට ඇති බව විශේෂඥ වෛද්‍යවරු පෙන්වා දෙති.
මෙම අසාර්ථක ප්‍රයත්නයත් සමඟ ටෙනෙසි ප්‍රාන්ත ආණ්ඩුකාර බිල් ලී විසින් සිද්ධිය සම්බන්ධයෙන් ස්වාධීන පරීක්ෂණයක් සිදු කරන ලෙස නියෝග කර ඇත.
එමෙන්ම ප්‍රාන්තයේ සියලුම මරණ දඬුවම් ක්‍රියාත්මක කිරීම මේ වසර අග දක්වා අත්හිටුවීමට ද පියවර ගෙන තිබේ.
මේ අතර, සිදුවූ අසාර්ථක වීම සහ ඇය විඳි දැඩි වේදනාව සැලකිල්ලට ගනිමින් ඇගේ මරණ දඬුවම ලිහිල් කරන ලෙස ක්‍රිස්ටා පයික්ගේ නීතිඥ කණ්ඩායම අධිකරණයෙන් ඉල්ලා සිටින අතර, සිදුවීමට අදාළ සියලුම සාක්ෂි සුරක්ෂිතව තබන ලෙස ද ඉල්ලීමක් කර ඇත.
