නීතිවිරෝධී ලෙස තීරුබදු රහිතව මෙරටට ගෙන එන ලද දුම්වැටි තොගයක් සමඟ සැකකරුවෙකු කළුතර කොට්ඨාස විෂ මත්ද්‍රව්‍ය වැටලීම් ඒකකය මගින් අත්අඩංගුවට ගෙන තිබේ.
බේරුවල, දර්ගා නගරය සහ චීන කොටුව ඇතුළු ප්‍රදේශ ඉලක්ක කරගනිමින් මෙලෙස නීතිවිරෝධී ලෙස තීරුබදු රහිතව මෙරටට ගෙන ආ දුම්වැටි අලෙවි කරන බවට කළුතර කොට්ඨාස විෂ මත්ද්‍රව්‍ය වැටලීම් ඒකකයට ලැබුණු තොරතුරකට අනුව ඊයේ (01) පස්වරුවේ මෙම වැටලීම සිදු කර ඇත.
ඒ අනුව, බේරුවල, පිටවල ප්‍රදේශයේ වෙළෙඳසැලක් වටලා සිදුකළ විමර්ශනයේදී එහි සඟවා තිබූ දුම්වැටි 3,000කට ආසන්න ප්‍රමාණයක් පොලිස් භාරයට ගැනීමට හැකි වී තිබේ.
අදාල දුම්වැටි තොගයේ වටිනාකම රුපියල් ලක්ෂ තුනකට ආසන්න බව පැවසෙන අතර, ඒවායේ රජය මගින් අනිවාර්ය කර ඇති සෞඛ්‍ය අවවාද හෝ රූප සංඥා මුද්‍රණය කර නොතිබූ බව සොයාගෙන ඇත.
සිද්ධිය සම්බන්ධයෙන් අදාළ වෙළෙඳසැලේ සේවය කළ හැටන් ප්‍රදේශයේ පදිංචි 25 හැවිරිදි තරුණයෙකු අත්අඩංගුවට ගෙන ඇති අතර, සැකකරු කළුතර මහෙස්ත්‍රාත් අධිකරණයට ඉදිරිපත් කිරීමට නියමිතය.
