විපක්ෂ නායක සජිත් ප්‍රේමදාස මහතා සහ මෙරට ප්‍රංශ තානාපති රෙබී ලැම්බර්ට් මහතා අතර අතර හමුවක් අද (02) සිදු විය.
ඒ ශ්‍රී ලංකාවේ පුනර්ජනනීය බලශක්ති කර්මාන්තය මුහුණ දෙන අභියෝග සහ එම අංශයේ ආයෝජන පුළුල් කිරීමට ඇති අවස්ථා සාකච්ඡා කිරීම සඳහාය.
මෙම අවස්ථාව සඳහා පුනර්ජනනීය බලශක්ති අංශයේ දේශීය නියෝජිත පිරිසක් සහ ප්‍රංශ තානාපති කාර්යාලයේ ආර්ථික උපදේශක එම්. පිලිප් ෆවුට්, දේශපාලන නිලධාරීන් වන ඇනා බෙලර්ක්, සහ පුනර්ජනනීය බලශක්ති කර්මාන්තයේ පාර්ශ්වකරුවන් රැසක් ද සහභාගී වූහ.
මෙම හමුව අතරතුරදී 2030 වසර වන විට මෙරට විදුලියෙන් 70%ක් පුනර්ජනනීය බලශක්ති ප්‍රභවයන්ගෙන් ජනනය කිරීමේ ඉලක්කය ඇතුළුව මෙරට ජාතික පුනර්ජනනීය බලශක්ති ඉලක්ක සපුරා ගැනීමේ වැදගත්කම විපක්ෂ නායකවරයා අවධාරණය කළේය.
එමෙන්ම රජයේ ප්‍රතිපත්තිය අනුව net metering සහ net accounting ක්‍රමයේ සිට net-plus යෝජනා ක්‍රමයට මාරු වීම ඇතුළුව මෙරට වහළ මත සවි කර ඇති සූර්ය පැනල සඳහා වන ගෙවීම් සහ ගිණුම්කරණ යාන්ත්‍රණයන්හි වෙනස්කම් පිළිබඳව මෙම ක්ෂේත්‍රයේ නියැලී සිටින පාර්ශ්වකරුවන් කනස්සල්ල පළ කර ඇති බවත් මෙම වෙනස්කම් සූර්ය බලශක්ති ව්‍යවසායකයින් සඳහා අවිනිශ්චිතතාවයක් ඇති කිරීම හේතුවෙන් එම අංශයේ ආයෝජනවල ශක්‍යතාවයට බලපා ඇති බවද විපක්ෂනායකවරයා මෙහිදී පෙන්වා දුන්නේය.
තවද සූර්ය බලශක්ති ආශ්‍රිත බලපත්‍ර නිකුත් කිරීමේ ප්‍රමාදය සහ කර්මාන්තය මුහුණ දෙන අනෙකුත් නියාමන බාධක පිළිබඳවද අවධානය යොමු කළ විපක්ෂනායකවරයා පුනර්ජනනීය බලශක්ති ආයෝජනය සඳහා පුරෝකථනය කළ හැකි පරිසරයක් නිර්මාණය කිරීමේ අවශ්‍යතාවද තවදුරටත් සඳහන් කළේය.
විදේශ ආයෝජන ආකර්ෂණය කර ගැනීමේ දී ස්ථාවර විදුලි ගාස්තු සහ පුරෝකථනය කළ හැකි ප්‍රතිපත්තිමය පරිසරයක වැදගත්කම ද විපක්ෂ නායකවරයා තවදුරටත් අවධාරණය කළ අතර ශ්‍රී ලංකාවට අඛණ්ඩ, උසස් තත්ත්වයේ සහ දැරිය හැකි බලශක්තියක් අවශ්‍ය බව ද මෙහිදී පෙන්වා දුන්නේය.
