ආබාධිත පුද්ගලයෙකුට නිවාස ආධාර ලබාදීමේ කටයුතු කඩිනමින් ඉටු කර දීම සඳහා රුපියල් 25,000/- ක අල්ලසක් ලබා ගැනීමේ චෝදනාවට වරදකරු වූ හිටපු ග්රාම නිලධාරීවරයෙකුට කොළඹ මහාධිකරණය විසින් පනවන ලැබූ බරපතළ වැඩ සහිත වසර 05 ක සිර දඬුවම ශ්රේෂ්ඨාධිකරණය විසින් අද (25) ස්ථිර කළේය.
අදාළ සිර දඬුවමින් තමන්ව නිදොස්කොට නිදහස් කරන ලෙස ඉල්ලා විත්තිකාර ග්රාම නිලධාරීවරයා විසින් ඉදිරිපත් කළ විශේෂ අභියාචනා අයදුම්පතක් විභාගයට ගැනීම අවසර දීම ප්රතික්ෂේප කරමින් අගවිනිසුරු ප්රීති පද්මන් සූරසේන සහ අචල වෙංගප්පුලි යන මහත්වරුන්ගෙන් සමන්විත විනිසුරු මඩුල්ලක් විසින් මෙම නියෝගය නිකුත් කරනු ලැබීය.
2013 වසරේ ආබාධිත පුද්ගලයෙකුට නිවාස ආධාර ලබාදීමේ කටයුතු කඩිනමින් ඉටුකරදීම සඳහා රුපියල් ලක්ෂයක අල්ලසක් ඉල්ලා ඉන් රුපියල් 25,000/-ක් ලබා ගැනීම සම්බන්ධයෙන් අල්ලස් කොමිසම විසින් රත්නපුර, කුඩාව වසමේ සේවය කළ මෙම විත්තිකාර ග්රාම නිලධාරියාට එරෙහිව 2014 වසරේ කොළඹ මහාධිකරණය හමුවේ නඩු පවරා තිබුණි.
දීර්ඝ නඩු විභාගයකින් අනතුරුව අදාළ චෝදනාවලට වරදකරු කෙරුණු මෙම විත්තිකරුට කොළඹ මහාධිකරණය විසින් බරපතළ වැඩ සහිත වසර පහක සිර දඬුවම් නියම කළේය.
පසුව එම දඬුවමින් තමන්ව නිදොස් කොට නිදහස් කරන ලෙස ඉල්ලා අදාළ විත්තිකරු අභියාචනාධිකරණයට ඇපෑලක් ඉදිරිපත් කෙරිණි.
එම ඇපෑල විභාග කළ අභියාචනාධිකරණය අවසානයේදී එය නිෂ්ප්රභ කිරීමට තීන්දු කර තිබුණි.
එම තීන්දුව සම්බන්ධයෙන් අතෘප්තියට පත් අදාළ විත්තිකාර හිටපු ග්රාම නිලධාරියා පසුව ශ්රේෂ්ඨාධිකරණයට මෙම අභියාචනය ඉදිරිපත් කළේය.
එම අභියාචනා අවසර අයදුම් පත අද අගවිනිසුරු ප්රීති පද්මන් සූරසේන සහ අචල වෙංගප්පුලි යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල ඉදිරියේ කැඳවනු ලැබීය.
එහිදී අභියාචක පෙත්සම්කරු වෙනුවෙන් පෙනී සිටි ජනාධිපති නිතීඥවරයා අධිකරණය හමුවේ කරුණු දක්වමින් සිය සේවාදායකයාට එරෙහිව මහාධිකරණය විසින් පනවා තිබෙන දඬුවම නීතිමය වශයෙන් දෝෂ සහගත බව පෙන්වා දෙමින් දීර්ඝ ලෙස කරුණු ඉදිරිපත් කළේය.
නමුත් අල්ලස් කොමිසම වෙනුවෙන් පෙනී සිටි එහි සහකාර අධ්යක්ෂ ජනරාල් අනුෂා සම්බන්ධප්පෙරුම මහත්මිය අධිකරණයට දැනුම් දුන්නේ විත්තිකරුට එරෙහිව මහාධිකරණය විසින් ප්රකාශිත නඩු තීන්දුව නිසි ලෙස සාක්ෂි ඇගයීමකින් අනතුරුව විනිසුරුවරයා විසින් ලබා දී තිබෙන බවය.
දෙපාර්ශ්වය විසින් ඉදිරිපත් කළ කරුණු සලකා බැලූ අගවිනිසුරු ප්රීති පද්මන් සූරසේන මහතා ප්රමුඛ විනිසුරු මඩුල්ල මෙම අභියාචනා පෙත්සම විභාගයට ගැනීමට අවසර දීමට තරම් නීතිමය පදනමක් අනාවරණය නොවන හෙයින් එය නිෂ්ප්රභ කරන බවත් නියෝග කළේය.
