ඉඩම් ප්‍රතිසංස්කරණ කොමිෂන් සභාවට අයත් හැටන් රුවන්පුර ප්‍රදේශයේ ඉඩම් කැබලි ලබා දෙන බවට පොරොන්දුවී පුද්ගලයන්ගෙන් මුදල් ලබාගැනීමේ සිද්ධියක් සම්බන්ධයෙන් හැටන් - දික්ඔය නගර සභාවේ ලංකා කම්කරු කොංග්‍රසයේ නාගරික මන්ත්‍රී සුන්දරරාජ් ප්‍රභාකරන් මහතා අත්අඩංගුවට ගෙන තිබේ.

හැටන් පොලිසියේ අපරාධ විමර්ශන අංශය විසින් ඊයේ (24) ඔහු අත්අඩංගුවට ගෙන ඇති අතර හැටන් මහේස්ත්‍රාත් අධිකරණයට ඉදිරිපත් කිරීමෙන් අනතුරුව මන්ත්‍රීවරයා වරද පිළිගෙන ඇත.

එමෙන්ම ලබාගත් රුපියල් හය ලක්ෂ තිස්පන්දහක මුදල අධිකරණය හමුවේ ගෙවීමට එකඟවී ඇති බව සඳහන්ය.

ඒ හේතුවෙන් සැකකරු රුපියල් 50,000ක ශරීර ඇප මත මුදාහැර යළිත් මෙම නඩුව ඔක්තෝබර් 22 වැනිදා කැඳවීමට මහේස්ත්‍රත්වරයා නියෝග කළේය.

සැකකරු 2022 වසරේ සිට ඉඩම් ප්‍රතිසංස්කරණ කොමිෂන් සභාවේ ක්ශේත්‍ර නිලධාරියෙකු සමග එක්ව හැටන් රුවන්පුර ප්‍රදේශයේ එම කොමිෂන් සභාවට අයත් ඉඩම් කැබලි ලබා දෙන බවට පොරොන්දු වී සැකකරුගේ ගිණුමට රුපියල් ලක්ෂ 6ත් 15ත් අතර ප්‍රමාණයක් පුද්ගලයන් කිහිප දෙනෙකුගෙන් මුදල් ලබා ගෙන මෙතෙක් කල් මෙම ඉඩම ලබා නොදී ඇත.

මේ සම්බන්ධයෙන් අදාළ නාගරික මන්ත්‍රීවරයාට එරෙහිව හැටන් පොලිසියේ අපරාධ විමර්ශන අංශයේ කරන ලද පැමිණිල්ලක් මත හැටන් කොට්ඨාස භාර පොලිස් අධිකාරි ප්‍රදීප් වීරසේකර මහතාගේ අධික්ෂණය යටතේ විමර්ශන සිදු කළ හැටන් පොලිසියේ අපරාධ විමර්ශන අංශයේ ස්ථානාධිපති පොලිස් පරික්ෂක නිශාන්ත ද සිල්වා මහතා සැකකරුගේ බැංකු ගිණුම් වාර්තා ලබාගෙන සැකකරු අත්අඩංගුවට ගෙන අධිකරණය වෙත ඉදිරිපත් කරනු ලැබූහ.

අධිකරණය හමුවේ කරුණු ඉදිරිපත් කරමින් හැටන් පොලිසියේ අපරාධ විමර්ශන අංශයේ ස්ථානාධිපති පොලිස් පරික්ෂක නිශාන්තද සිල්වා මහතා කියා සිටියේ සැකකරු මෙවැනි මුදල් වංචා ගණනාවකට සම්බන්ධ බවය.

ඒ සම්බන්ධයෙන් පැමිණිලි ලැබීමෙන් පසු ඉදිරි විමර්ශව කටයුතු සිදු කරන බවත්, මෙම මුදල් වංචාවට සම්බන්ධ ඉඩම් ප්‍රතිසංස්කරණ කොමිෂන් සභාවේ ක්ෂේත්‍ර නිලධාරියා ද අත්අඩංගුවට ගැනීමට නියමිත බව සඳහන්ය.

කරුණු සලකා බැලූ මහේස්ත්‍රාත්වරයා අධිකරණය හමුවේ කියා සිටියේ සැකකරු වරද පිළිගත් බැවින් එම මුදල  අද (25) දිනම පැමිණිලිකරුට නොගෙවන්නේ නම් සැකකරු රක්ෂිත බන්ධනාගාර ගත කිරිමට සිදු වන බවය.

සැකකරු වෙනුවෙන් පෙනී සිටි නීතිඥයින් අධිකරණය හමුවේ කියා සිටියේ පැමිණිලිකරුගේ මුදල අධිකරණය හමුවේ අද දිනයේ ගෙවීමට සැකකරු එකග බවය.