විල්පත්තුව ජාතික වනෝද්යාන කලාපයේ පිහිටි වනාතවිල්ලුව පරණ එළුවන්කුළම 'නෙළුම් වැව' පරිශ්රයේ ශාක ගිනිගෙන විනාශ වීම සම්බන්ධයෙන් මේ වන විට කරුණු රැසක් අනාවරණය වී තිබේ.
පරිසර අමාත්යාංශය සඳහන් කරනුයේ අමාත්යාංශ මැදිහත්වීම මත ඊයේ (18) දින පුළුල් ඒකාබද්ධ ක්ෂේත්ර පරීක්ෂණයක් පවත්වන ලද බවය.
මධ්යම පරිසර අධිකාරියේ නිලධාරීන්ගේ මූලිකත්වයෙන් පැවැති මෙම ඒකාබද්ධ නිරීක්ෂණය සඳහා වනාතවිල්ලුව ප්රාදේශීය ලේකම්වරයා, වන සංරක්ෂණ දෙපාර්තමේන්තුව, වනජීවි සංරක්ෂණ දෙපාර්තමේන්තුව, වයඹ පළාත් පරිසර අධිකාරිය, ගොවිජ සේවා දෙපාර්තමේන්තුව, වාරිමාර්ග දෙපාර්තමේන්තුව, රාජ්ය දැව සංස්ථාව සහ ප්රදේශයේ ග්රාම නිලධාරිවරයා ඇතුලු රාජ්ය ආයතන ගණනාවක නිලධාරීන් එක්ව ඇත.
මෙම පරීක්ෂණයේදී අනාවරණය වී ඇත්තේ විශාල කුඹුක් ගස් 61ක්, බක්මී ගස් 24ක් සහ මාදං ගස් 02ක් ඇතුළුව මුළු ගස් 110කට ආසන්න ප්රමාණයක් ගින්නට හසුව ඇති බවය.
වාරිමාර්ග දෙපාර්තමේන්තුව යටතේ පාලනය වන මෙම වැව පසුගිය දිට්වා සුළි කුණාටු සමයේදී වැව් බැම්ම කැඩී යාම නිසා පිළිසකර කරමින් පවතින අතර එහිදී වැව තුළින්ම පස් ලබා ගනිමින් පිළිසකර කිරීම් සිදුකරන අතරතුර එක්රැස්ව තිබූ වියළි ශාක කොටස් මත හටගත් ගින්නකින් ගස්වල පාදම පිලිස්සී මෙලෙස බිම වැටී ඇති බවට නිරීක්ෂණය වී තිබේ.
මෙම වැව විල්පත්තුව ජාතික වනෝද්යානයේ සංවේදී ප්රේරණ කලාපය තුළ පිහිටා තිබුණද අදාළ ප්රතිසංස්කරණ කටයුත්ත සඳහා වනජීවි සංරක්ෂණ දෙපාර්තමේන්තුවෙන් හෝ මධ්යම පරිසර අධිකාරියෙන් කිසිදු පූර්ව අනුමැතියක් හෝ පාරිසරික නිර්දේශයක් ලබාගෙන නොමැති බවද විමර්ශනයේදී හෙළිව තිබේ.
ඒ අනුව සිදුවූ පාරිසරික හානිය සැලකිල්ලට ගනිමින් වනජීවි සංරක්ෂණ දෙපාර්තමේන්තුව විසින් වාරිමාර්ග දෙපාර්තමේන්තුවට එරෙහිව වනසත්ත්ව හා වෘක්ෂලතා ආරක්ෂක ආඥාපනත යටතේ පුත්තලම මහේස්ත්රාත් අධිකරණයේදී නඩු පවරා ඇති අතර සිද්ධිය සම්බන්ධව වනාතවිල්ලුව ප්රාදේශීය ලෙකම්වරයා විසින් පොලිසිය වෙත පැමිණිල්ලක්ද ගොනු කර ඇති බව පරිසර අමාත්යාංශය සඳහන් කළේය.
අමාත්යාංශය සඳහන් කරනුයේ රාජ්ය සංවර්ධන කටයුත්තක් වුවද රටේ පවතින පාරිසරික නීති රෙගුලාසි උල්ලංඝණය කරමින් මෙවැනි සංවේදී පරිසර පද්ධති විනාශ කිරීමට කිසිදු පාර්ශ්වයකට ඉඩ නොතබන බවය.
