දෙහිවල නිවසකට පසුගිය 11 වැනිදා අත්බෝම්බ ප්‍රහාරය එල්ල කළ පුද්ගලයා පොලීසියට තොරතුරු රැසක් අනාවරණ කර තිබේ.

මෙම අත්බෝම්බ ප්‍රහාරයෙන් දරුවන් දෙදෙනකු මියගොස් ඔවුන්ගේ පියා බරපතළ තුවාල ලැබුවේය.

සිද්ධිය සම්බන්ධයෙන් පොලිස්පතිවරයාගේ උපදෙස් මත බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති සජීව මැදවත්ත මහතාගේ අධීක්ෂණයෙන් පොලිස් කණ්ඩායම් කිහිපයක් මගින් විමර්ශන ආරම්භ කෙරුණි.

එවන් පසුබිමක අත්අඩංගුවට ගැනුණු බෝම්බ ප්‍රහාරය එල්ල කළ පුද්ගලයා අද වැඩිදුර විමර්ශන සඳහා බස්නාහිර දකුණ, දිසා අපරාධ කොට්ඨාසය වෙත රැගෙන ආවේය.

ඔහුගෙන් සිදුකළ ප්‍රශ්න කිරීම්වලදී අනාවරණ වී ඇත්තේ, ඔහු 2025 වසරේ නැදිමාල ප්‍රදේශයේ සිදුකළ වෙඩිතැබීමකට අදාළව රක්ෂිත බන්ධනාගාරගතව සිට ඉකුත් ජූලි මස 19 වැනිදා ඇපමත නිදහස්ව පැමිණි බවය.

පසුව ඔහු ඉකුත් අගෝස්තු පළමුවැනිදා රත්මලානේදී කුඩු අංජුගේ සමීපතමයෙක් වෙඩිතබා ඝාතනය කර තිබේ.

ඒ සඳහා බෝධියාවත්තේ අවිශ්ක හා කොස්මල්ලි විසින් තමාට රුපියල් ලක්ෂ 5ක මුදලක් හා අයිස් මත්ද්‍රව්‍ය ග්‍රෑම් 10ක් ලබාදී ඇතැයි ඔහු පොලිසියට අනාවරණ කර තිබේ.

අනතුරුව ඔහුට දෙහිවල නිවසට බෝම්බ ප්‍රහාරය එල්ල කිරීමේ කොන්ත්‍රාත්තුව භාරදී ඇත්තේද බෝධියාවත්තේ අවිශ්ක හා කොස්මල්ලි විසින් බවද ඔහු පවසා තිබුණි.

ඒ අනුව ප්‍රහාරය එල්ලකිරීමට ගිය ත්‍රිරෝද රථයේ අත් බෝම්බයද තබාතිබී ඇති අතර, ප්‍රහාරයට අදාළ නිවස පෙන්වීම සඳහා එහි තවත් පුද්ගලයෙකු සිටි බව සැකකරු පවසා ඇතැයි වාර්තා වෙයි.

කෙසේවෙතත් එම පුද්ගලයා තමන්ට පෙන්වා ඇත්තේ වැරදි නිවසක් බවත් සැකකරු එහිදී පවසා තිබේ.

අදාළ ප්‍රහාරයෙන් පසුව බෝධියාවත්තේ අවිශ්ක හා කොස්මල්ලි විසින් තමන්ට රුපියල් එක් ලක්ෂ විසිදහසක මුදලක් ලබාදී, බිබිල ප්‍රදේශයට පලායන ලෙසට උපදෙස් දුන් බව සැකකරු පවසා ඇති බවයි වාර්තා වෙයි.

ඔහු අත්අඩංගුවට පත්ව ඇත්තේ  බිබිලේ සිය හිතවතෙකුගේ නිවසක සැඟවී සිටියදීය.

මේ අතර ප්‍රහාරය සඳහා නිවස පෙන්වූ පුද්ගලයාද බස්නාහිර දකුණ අපරාධ කොට්ඨාසය විසින් අත්අඩංගුවට ගනුලැබීය.

ඔහුගෙන් සිදුකළ ප්‍රශ්න කිරීම්වලදී අනාවරණ වී ඇත්තේ, ඒ සඳහා අවිශ්ක හා කොස්මල්ලි විසින් රුපියල් විසිදහසක මුදලක් ලබාදුන් බවය.

සිද්ධිය පිළිබඳ වැඩිදුර විමර්ශන බස්නාහිර දකුණ භාර නියෝජ්‍ය පොලිස්පති සාමන්ත විජේසේකර මහතාගේ අධීක්ෂණයෙන් බස්නාහිර දකුණ අපරාධ කොට්ඨාසය විසින් සිදුකරයි.