යාපනය ශික්ෂණ රෝහල, යාපනය හෙද විදුහල ඇතුළු උතුරු පළාතේ රෝහල් සහ සෞඛ්ය ආයතන සඳහා රේඛීය අමාත්යාංශය යටතේ මෙන්ම උතුරු පළාත් සභාව යටතේ ද අලුතින් බඳවාගත් සෞඛ්ය කාර්ය සහායක 350 දෙනෙකු සඳහා පත්වීම් ප්රදානය හෙට (18) සිදු කිරීමට නියමිතව තිබේ.
ඒ, සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස සහ උතුරු පළාත් ආණ්ඩුකාර නාගලිංගම් වේදනායගම් යන මහත්වරුන්ගේ ප්රධානත්වයෙන් කන්කසන්තුර පාර, තිවියාමහල්හිදීය.
මෙම පත්වීම් ප්රදානයේ දී රේඛීය අමාත්යාංශය යටතේ බඳවා ගත් සෞඛ්ය කාර්ය සහායක 45 දෙනෙකු යාපනය ශික්ෂණ රෝහල වෙත ද පස් දෙනෙකු යාපනය හෙද විදුහල වෙත ද අනුයුක්ත කිරීමට නියමිත අතර පළාත් සභාව යටතේ බඳවාගත් 300 දෙනෙකු උතුරු පළාතේ අනෙකුත් රෝහල් සහ සෞඛ්ය ආයතන වෙත ද අනුයුක්ත කිරීමට නියමිතය.
මෙරට නිදහස් සෞඛ්ය සේවා පද්ධතියේ ගුණාත්මකභාවය ඉහළ නැංවීම සහ රෝහල් පද්ධතිය වඩාත් කාර්යක්ෂම කිරීම සඳහාත්, රෝහල් පරිපාලනය සහ රෝගී සත්කාරක සේවා බිඳවැටීමකින් තොරව පවත්වාගෙන යාම සඳහාත් වර්තමාන රජය පළාත් සභා ද සමඟ ඒකාබද්ධව සැලසුම් සහගත වැඩපිළිවෙලක් ක්රියාවට නංවා ඇත.
ඒ අනුව මානව සම්පත් සංවර්ධන වැඩපිළිවෙල යටතේ, දීර්ඝ කාලයකට පසු සෞඛ්ය කාර්ය සහායක ඇතුළු ක්ෂේත්ර කිහිපයක පවතින පුරප්පාඩු කඩිනමින් පිරවීමට පියවර ගනිමින් මීට ප්රථම බස්නාහිර පළාත ඇතුළු දිවයිනේ අනෙකුත් රෝහල් හා සෞඛ්ය ආයතන සඳහා සෞඛ්ය කාර්ය සහායකයන් 1860 සඳහා මේ වනවිටත් පත්වීම් ප්රදානය කර තිබේ.
මෑතකදී පවත්වන ලද ව්යුහගත සම්මුඛ පරීක්ෂණ ඉතා සාර්ථක ලෙස නිම කර ඇති සහ කුසලතා මත තේරී පත් වූ අපේක්ෂකයින් හට මෙම පත්වීම් ලිපි ප්රදානය කරනු ලබයි.
