ශ්රී ලංකාව සහ තායිලන්තය අතර කම්කරු ක්ෂේත්රයේ ද්විපාර්ශ්වික සහයෝගීතාව තවදුරටත් තහවුරු කරමින් කම්කරු සහයෝගීතාව පිළිබඳ අවබෝධතා ගිවිසුමකට සහ තායිලන්තයේ ශ්රී ලංකා සේවකයින් සේවයේ යෙදවීම පිළිබඳ එකඟතා ගිවිසුමකට බැංකොක් නුවරදී අත්සන් තබා තිබේ.
මෙම ගිවිසුම් දෙක සඳහා ශ්රී ලංකාව වෙනුවෙන් විදේශ කටයුතු, විදේශ රැකියා සහ සංචාරක අමාත්ය විජිත හේරත් මහතාද, තායිලන්තය වෙනුවෙන් එරට කම්කරු අමාත්ය ජුලාපුන් අමෝර්න්විවාත් (Julapun Amornvivat) මහතාද අද (14) මෙලෙස අත්සන් තැබූ බව විදේශකටයුතු අමාත්යාංශය නිවේදනය කළේය.
දෙරටේ අදාළ බලධාරීන් අතර පැවති අඛණ්ඩ සාකච්ඡාවල ප්රතිඵලයක් ලෙස මෙම ගිවිසුම් ඇති කර තිබෙන අතර, එය ශ්රී ලංකා සේවකයින් තායිලන්තයේ රැඳවීමේ සහ සේවයේ යෙදවීමේ ක්රියාවලිය විධිමත් හා ඔවුන්ගේ අයිතිවාසිකම්, සුභසාධනය සහ ආරක්ෂාව තහවුරු කිරීමටත් මාවත සපයයි.
ශ්රී ලංකාව සහ තායිලන්තය අතර ආරක්ෂිත, විධිමත් සහ අන්යෝන්ය වශයෙන් වාසිදායක කම්කරු සංක්රමණ පුළුල් කිරීමේ සන්ධිස්ථානයක් ලෙස මෙම ගිවිසුම්ගත වීම හැඳින්විය හැකි බව සඳහන් වේ.
තායිලන්තයේ පවතින ශ්රම හිඟයට පිළියමක් ලෙස, ස්ථාපිත නීතිමය රාමුව යටතේ මූලික ශ්රී ලංකා සේවකයින් 10,000 දෙනෙකු බඳවා ගැනීමට තායිලන්ත කැබිනට් මණ්ඩලය ද අනුමැතිය ලබා දී ඇති බව නිවේදනයේ සඳහන් වේ.
කම්කරු ප්රතිපත්ති සහ භාවිතයන්, ශ්රම වෙළෙඳපොළ තොරතුරු, කුසලතා සංවර්ධනය, ශ්රම නිෂ්පාදිතය, කම්කරු ආරක්ෂණය මෙන්ම නීතිවිරෝධී බඳවා ගැනීම් සහ මිනිස් ජාවාරම් වැළැක්වීම යන ක්ෂේත්රවල සහයෝගීතාව සඳහා මෙම අවබෝධතා ගිවිසුම මගින් රාමුවක් සපයයි.
තායිලන්ත රජය විසින් ශ්රී ලංකාවේ සේවකයින්ට එරට රැකියා අවස්ථා ලබාදීම සම්බන්ධයෙන් සිය කෘතඥතාව පළ කළ අමාත්ය විජිත හේරත් මහතා, ඔවුන්ගේ අයිතිවාසිකම්, සුභසාධනය සහ සමාජ ආරක්ෂණය තහවුරු කිරීමේ වැදගත්කම අවධාරණය කළේය.
