ආසියානු කුසලාන කාන්තා විස්සයි20 ක්රිකට් තරගාවලියේ අවසන් මහා තරගය ශ්රී ලංකා කණ්ඩායම සහ ඉන්දීය කණ්ඩායම අතර අද (13) ඩුබායි ජාත්යන්තර ක්රිකට් ක්රීඩාංගණයේදී පැවැත්වේ.
තරගය ශ්රී ලංකා වේලාවෙන් රාත්රී 8ට ආරම්භ වීමට නියමිතය.
තරගාවලිය පුරා අපරාජිත වාර්තාවක් තබා ගනිමින් කණ්ඩායම් දෙකම අවසන් තරගයට සුදුසුකම් ලැබීම විශේෂත්වයකි.
තරගාවලියේ මූලික වටයේ 'බී' කාණ්ඩයෙන් තරග වැදුණු ශ්රී ලංකා කණ්ඩායම, බංග්ලාදේශය, සත්කාරක එක්සත් අරාබි එමීර් රාජ්යය සහ ඉන්දුනීසියාව පරාජය කරමින් අවසන් පූර්ව වටයට පිවිසියේය.
ඉන් අනතුරුව පැවැති අවසන් පූර්ව තරගයේදී පාකිස්තානය පරාජය කරමින් ඔවුහු අවසන් මහා තරගයට පිවිසියහ.
මූලික වටයේ 'ඒ' කාණ්ඩයෙන් තරග වැදුණු ඉන්දීය කණ්ඩායම පාකිස්තානය, තායිලන්තය සහ හොංකොං පරාජය කරමින් අවසන් පූර්ව වටයට පිවිසි අතර, එහිදී බංග්ලාදේශය පරාජය කරමින් අවසන් තරගයේ ඉඩකඩ වෙන් කර ගත්තේය.
ශ්රී ලංකාව තරගාවලියේ වත්මන් ශූරියන් වන අතර, 2024 වසරේදී ශ්රී ලංකාවේ පැවැති තරගාවලියේ අවසන් මහා තරගයේදී ඉන්දියාව පරාජය කරමින් තම කුලුඳුල් ආසියානු කුසලාන ශූරතාව දිනා ගැනීමට සමත් විය.
2004 වසරේදී ශ්රී ලංකාවේ සත්කාරකත්වයෙන් එක්දින ආකෘතියෙන් ආරම්භ වූ මෙම තරගාවලිය, 2012 වසරේ සිට විස්සයි20 ආකෘතියට පරිවර්තනය විය.
ආසියානු කාන්තා ක්රිකට් ඉතිහාසයේ සාර්ථකම කණ්ඩායම වන ඉන්දියාව සමස්ත ශූරතා 7කට හිමිකම් කියන අතර, 2004 සිට 2016 දක්වා පැවැති තරගාවලි 6 හිදීම අඛණ්ඩව ශූරතාව දිනාගැනීමට සමත් විය.
එක් ශූරතාවක් සහ අනුශූරතා 5ක් දිනා සිටින ශ්රී ලංකාව ඉතිහාසයේ දෙවැනියට සාර්ථකම කණ්ඩායම වන අතර, ඉන්දියාව සහ ශ්රී ලංකාවට අමතරව 2018 වසරේදී බංග්ලාදේශය පමණක් එක් වරක් මෙම ශූරතාව දිනාගෙන ඇත.
