නාවික හමුදාව විසින් සැප්තැම්බර් 01 වනදා සිට 11 වනදා දක්වා ක්රියාත්මක කළ විශේෂ සෝදිසි මෙහෙයුම්වලින් නීතිවිරෝධී ලෙස ධීවර කටයුතුවල නිරත වූ පුද්ගලයන් 65 අත්අඩංගුවට ගෙන තිබේ.
නැගෙනහිර, උතුර සහ ගිනිකොණ යන නාවික විධාන එක්ව ත්රිකුණාමලය ජමාලියා, ෆවුල් පොයින්ට්, ඉලන්කන්තෙයි, පරවි දූපත, නඩිතිව් දූපත, ඇලස්වත්ත, නිලාවේලි, යාපනය කඩ්ඩයිකාඩු, වෙත්තලකේණි, චුන්ඩිකුලම් සහ මඩකලපුව ආරුගම්බේ යන වෙරළ හා මුහුදු ප්රදේශ ආවරණය වන පරිදි මෙම මෙහෙයුම් සිදුකර ඇත.
එහිදී තහනම් ධීවර දැල්, නීති විරෝධී පන්නක්රම මෙන්ම වින්ච් යන්ත්ර හා ට්රැක්ටර් රථ භාවිත කරමින් ධීවර කටයුතු හි නිරත වූ පුද්ගලයන් 63 දෙනෙකු නාවික හමුදා භාරයට ගෙන ඇත.
මීට අමතරව, ශ්රී ලංකා පොලීසිය හා එක්ව කාත්තන්කුඩි නගරයේ සිදුකළ විශේෂ සෝදිසි මෙහෙයුමකදී තහනම් ධීවර දැල් 44ක් සමඟ තවත් සැකකරුවන් දෙදෙනෙකු අත්අඩංගුවට ගැනීමට කටයුතු කර තිබේ.
මෙම සමස්ත මෙහෙයුම්වලදී ඩිංගි යාත්රා 26ක්, කැබ් රථයක් සහ ට්රැක්ටර් රථ 02ක් ද නාවික හමුදා භාරයට ගෙන ඇත.
අත්අඩංගුවට ගත් සැකකරුවන්, ධීවර යාත්රා, වාහන සහ තහනම් ධීවර ආම්පන්න ඉදිරි නීතිමය කටයුතු සඳහා කොඩ්බේ, කින්නියා, මුතූර්, ත්රිකුණාමලය, මඩකලපුව, යාපනය සහ පොතුවිල් යන ප්රදේශවල පිහිටි ධීවර හා ජලජ සම්පත් දෙපාර්තමේන්තු කාර්යාල වෙත භාරදීමට නාවික හමුදාව පියවර ගෙන ඇත.
