ශ්රී ලංකාවට පැමිණ සිටින ඉන්දියාවේ ආරක්ෂක අමාත්ය රාජ්නාත් සිං මහතා සහ අග්රාමාත්ය ආචාර්ය හරිනි අමරසූරිය අතර හමුවක් අද (09) පාර්ලිමේන්තුවේදී පැවැත්විණි.
මෙහිදී අග්රාමාත්යවරිය, ජාතික අපහසුතා මෙන්ම 'දිට්වා' සුළි කුණාටුවෙන් ඇති වූ ව්යසනකාරී තත්ත්වයන් හමුවේ ඉන්දියානු රජය ශ්රී ලංකාවට ලබා දුන් අඛණ්ඩ සහයෝගය පිළිබඳව සිය දැඩි කෘතඥතාව පළ කළාය.
එමෙන්ම, ඉන්දීය රජය විසින් මානුෂීය සහ ආපදා සහන සේවා යටතේ ආරම්භ කරන ලද "ඔපරේෂන් සාගර් බන්ධු" (Operation Sagar Bandhu) මෙහෙයුම ඇය මහත් සේ අගය කර තිබේ.
ශ්රී ලංකාව සහ ඉන්දියාව අතර පවතින සබඳතාව රාජ්යතාන්ත්රික හා ආර්ථික සහයෝගීතාවෙන් ඔබ්බට ගිය, සංස්කෘතික, ඓතිහාසික හා ආගමික බැඳීම්වලින් පෝෂණය වූ දීර්ඝකාලීන මිත්රත්වයක් බව අග්රාමාත්යවරිය මෙහිදී පෙන්වා දී ඇත.
වෙළෙඳාම, සංවර්ධනය, ආරක්ෂාව සහ අධ්යාපනය ඇතුළු පුළුල් ක්ෂේත්ර ගණනාවක් ඔස්සේ ඉන්දියාව ශ්රී ලංකාවේ වැදගත් හවුල්කරුවෙකු වන බව එහිදී සාකච්ඡා කර ඇත.
පාර්ලිමේන්තු සහ රාජ්ය අංශවල ධාරිතා වර්ධනය, ආයතනික හැකියා ශක්තිමත් කිරීම සහ යහපාලනය සඳහා දෙරට අන්යෝන්ය වශයෙන් සහයෝගයෙන් කටයුතු කර ඇති අතර දෙරට අතර දිගුකාලීන ආරක්ෂක සහයෝගීතාව අගය කළ අග්රාමාත්යවරිය, එම හවුල්කාරිත්වය තවදුරටත් අඛණ්ඩව පවත්වාගෙන යාමේ සහ ශක්තිමත් කිරීමේ වැදගත්කම අවධාරණය කර තිබේ.
මෙම සංචාරය අතරතුර අවබෝධතා ගිවිසුම් කිහිපයකට අත්සන් තැබීම ද මෙහිදී සිදු විය.
විශේෂයෙන්ම සංචාරක හා අධ්යාපන ක්ෂේත්රවල ප්රාදේශීය සහයෝගීතාව පුළුල් කිරීමේ වැදගත්කම පිළිබඳව ද අග්රාමාත්යවරිය වැඩිදුරටත් අවධාරණය කළ බව සඳහන් වේ.
දැනුම් හුවමාරුව, නවෝත්පාදනය සහ කුසලතා සංවර්ධනය ඉහළ නංවා ගැනීම සඳහා ශ්රී ලංකාවේ විශ්වවිද්යාල සහ ඉන්දීය තාක්ෂණ ආයතන (IITs) ඇතුළු විශේෂිත අධ්යාපන ආයතන අතර සහයෝගීතාව වර්ධනය කර ගැනීමේ ඇති හැකියාව ඇය පෙන්වා දුන් බව අග්රාමාත්ය මාධ්ය අංශය කළ නිවේදනයේ ඳසහන් වේ.
