හම්බන්තොට, කටුවන ප්රදේශයේ සිදුවූ වෙඩි තැබීමේ සිද්ධියේ වගකීම ආණ්ඩුව භාරගත යුතු බවත්, වහාම මේ සම්බන්ධව චෝදනා එල්ලව ඇති පුද්ගලයින් අත්අඩංගුවට ගෙන ඔවුන් නීතිය හමුවට ගෙන ආ යුතු බවත් ජනතා විමුක්ති පෙරමුණ පවසයි.
ආණ්ඩුවට එරෙහි පාතාල කණ්ඩායම් ඉවත්කර ආණ්ඩුව විසින් පාතාලය තුළ ඒකාධිකාරයක් ගොඩනගාගත් බවත්, දැන් පවතින්නේ ආණ්ඩුව මෙහෙයවන පාතාලයක් පමණක් බවත් ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහතා සඳහන් කරයි.
එම පාතාලය ආණ්ඩුව විසින් සිය දේශපාලන අරමුණු වෙනුවෙන් යොදවා ගන්නා බවට ටිල්වින් සිල්වා මහතා චෝදනා කරයි.
එවැනි කණ්ඩායමක් කටුවන ප්රදේශයේ සැරිසරමින්, ජනතාව බියවද්දමින් කටයුතු කරන බවත් ඔවුන් ඊයේ සිදුවූ වෙඩි තැබීම සිදුකළ බවත් අද(16) බත්තරමුල්ල ජනතා විමුක්ති පෙරමුණේ මූල්ස්ථානයේ දී පැවති මාධ්‍ය හමුවක දී අදහස් දක්වමින් ඒ මහතා ප්‍රකාශ කළේය.
රට පුරා සහ ජාත්‍යන්තර වශයෙන් මෙම ඝාතන රැල්ලට එරෙහිව උද්ඝෝෂණ මාලාවක් පවත්වන බව ද, එවැනි එක් උද්ඝෝෂණයක් ජූනි 19 වන දින කොළඹ දී පැවැත්වෙන බව ද ඔහු එහිදී කියා සිටියේය.
ඝාතනයක් සිදුවීමටත් වඩා ඝාතනය සම්බන්ධ වගකිවයුත්තන් නීතිය ඉදිරියට ගෙනඒම වෙනුවට ආණ්ඩුව මැදිහත්ව මෙම ඝාතනය ජනතා විමුක්ති පෙරමුණේ අභ්‍යන්තර ප්‍රශ්නයකට ලඝු කර සත්‍ය ඝාතකයින් නිදහස් කිරීමට උත්සාහ දැරීම බරපතළ බව ද හෙතෙම පෙන්වාදුන්නේය.
මෙම සිද්ධිය සම්බන්ධව පැමිණිලි සටහන් කර‍ගැනීම පමණක් සිදුකර ඇති නමුත් කිසිදු පුද්ගලයෙකු අත්අඩංගුවට ගෙන නොමැති බව ද ප්‍රධාන ලේකම්වරයා පැවසීය.
ආණ්ඩුව අදාළ සිද්ධියේ වගකීම කිසිවෙකුට හෝ පැවරීම සඳහා ප්‍රකාශ නිකුත් කරමින් සිටින බවත් ඔහු කියා සිටියේය.
අදාළ වෙඩි තැබීම සඳහා පැමිණි පුද්ගලයින් කටුවන ප්‍රදේශයේම වෙසෙන අය බවත්, අදාළ රැස්වීමට පැමිණි කටුවන ප්රදේශයේ වැසියන් ඔවුන් හඳුනාගෙන ඇති බවත් ටිල්වින් සිල්වා මහතා මෙම මාධ්‍ය හමුවේ දී ප්‍රකාශ කළේය.
ඒ අනුව වෙඩි තැබූ පුද්ගලයින් පිළිබඳව ඔවුන් පොලිසිය වෙත පැමිණිලි කර ඇති බවත් හෙතෙම සඳහන් කළේය.
මෙම සිදුවීම පෙරටුගාමී සමාජවාදී පක්ෂය මත පටවමින් ආණ්ඩුව ඇඟ බේරාගැනීමට උත්සාහ දැරීම විහිළුවක් පමණක් බවත්, එවැනි ක්‍රියාවක් කිරීමේ හැකියාව එම පක්ෂයට නොමැති බව ද ඒ මහතා පෙන්වාදුන්නේය.
ආණ්ඩුව විසින් දැන් සිදුකළ යුතුව ඇත්තේ ඉදිරිපත් වූ පැමිණිලි අනුව කටයුතු කිරීම බව ද මාධ්‍ය හමුවේ දී වැඩිදුරටත් අදහස් දැක්වූ ටිල්වින් සිල්වා මහතා වැඩිදුරටත් සඳහන් කර සිටියේය.
මෙම වෙඩි තැබීම ජනතා විමුක්ති පෙරමුණේ අභ්‍යන්තර ගැටලුවක් බව ආණ්ඩුව පෙන්වාදෙයි නම් ඒ සඳහා වගකිවයුතු පිරිස් කවුරුන්ද යන්න හෙළිකළ යුතු බව ද ඔහු කියා සිටියේය.
එ‍සේ සිදුනොකර රටේ ජන මතය නොමග යැවීමට උත්සාහ කරමින් සිටින බව ද ජනතා විමුක්ති පෙරමුණේ ප්‍රධාන ලේකම්වරයා ප්‍රකාශ කළේය.
