පේරාදෙණිය විශ්වවිද්‍යාලයේ මූල්‍ය අක්‍රමිකතා සහ අපජල කළමනාකරණ ගැටලු රැසක් පිළිබඳව තොරතුරු පොදු ව්‍යාපාර පිළිබඳ කාරක සභාව හමුවේ හෙළි වී තිබේ.

ෙපේරාදෙණිය විශ්වවිද්‍යාලයේ 2023 සහ 2024 වර්ෂවලට අදාළ විගණකාධිපති වාර්තා සහ වර්තමාන කාර්යසාධනය පිළිබඳව සොයා බැලීම සඳහා පාර්ලිමේන්තුවේ පොදු ව්‍යාපාර පිළිබඳ කාරක සභාව (COPE) එහි සභාපති පාර්ලිමේන්තු මන්ත්‍රී නිශාන්ත සමරවීර මහතාගේ ප්‍රධානත්වයෙන් පසුගියදා පාර්ලිමේන්තුවේදී රැස්ව ඇත.

මීට පෙර මෙම මස 05 වන දින පැවති සාකච්ඡාවේ දිගුවක් ලෙස මෙම දෙවැනි හමුව පවත්වා තිබේ.

මෙහිදී විශ්වවිද්‍යාලයේ මූල්‍ය පරිපාලනය, අපජල කළමනාකරණය, පර්යේෂණ දීමනා ගෙවීම, ආයතනික පාලනය සහ ඉදිරි සංවර්ධන සැලසුම් සම්බන්ධයෙන් දැඩි අවධානයක් යොමු වූ අතර, එහිදී කරුණු රැසක් අනාවරණය වූ බව පාර්ලිමේන්තුවේ මාධ්‍ය අංශය නිකුත් කළ නිවේදනයේ සඳහන් වේ.

විශ්වවිද්‍යාලයේ නේවාසිකාගාර කිහිපයකින් බැහැර වන අපජලය නිසි පරිදි කළමනාකරණය නොවීම හේතුවෙන් පරිසරයට සිදුවන බලපෑම පිළිබඳව මෙහිදී මූලික වශයෙන් සාකච්ඡා කර තිබේ.

මහනුවර නාගරික අපජල ව්‍යාපෘතියට මෙම පද්ධතිය සම්බන්ධ කිරීමේ කටයුතු ප්‍රමාද වීම නිසා, මුල් ඇස්තමේන්තුගත පිරිවැය රුපියල් මිලියන 464 සිට රුපියල් බිලියන 1.4 දක්වා ඉහළ ගොස් ඇති බව හෙළි වූ බව සඳහන් වේ.

කෙසේ වෙතත්, මෙම ව්‍යාපෘතිය ඉදිරියට ගෙනයාම සඳහා ජයිකා (JICA) ආයතනය හරහා රුපියල් බිලියන 2ක ප්‍රතිපාදන ලබාගෙන ඇති බව නිලධාරීහු පෙන්වා දී තිබේ.

තවද, විශ්වවිද්‍යාලය සතුව බැංකු ගිණුම් 68ක් සහ විවිධ අරමුදල්වලට අදාළ ගිණුම් විශාල සංඛ්‍යාවක් පැවතීමත්, ඇතැම් ව්‍යාපෘති අවසන් වී තිබියදීත් එම ගිණුම් වසා නොදමා පවත්වාගෙන යාම සහ මධ්‍යගතව නිරීක්ෂණය නොවීම සම්බන්ධයෙන් කාරක සභාව දැඩි අවධානයක් යොමු කර ඇත.

මෙහිදී වඩාත් කතාබහට ලක් වූ තවත් කරුණක් වී ඇත්තේ පර්යේෂණ දීමනා ගෙවීමය.

පර්යේෂණ කළමනාකරණ කමිටුවේ අනුමැතියකින් තොරව සහ අදාළ පර්යේෂණ වාර්තා ලබාගැනීමකින් තොරව, අනධ්‍යයන හා විධායක කාර්ය මණ්ඩලයේ නිලධාරීන් 59 දෙනෙකුට පර්යේෂණ දීමනා ගෙවා ඇති බව අනාවරණය වී ඇත.

ඉන් නිලධාරීන් 28 දෙනෙකු 2023 ජුනි 30 වන විටත් අදාළ වාර්තා ඉදිරිපත් කර නොතිබුණි. පර්යේෂණ දීමනා කිසිදු විටෙක අමතර වැටුපක් ලෙස භාවිත කිරීම අනුමත කළ නොහැකි බව අවධාරණය කළ COPE කමිටුව, ඒවා නිසි ක්‍රමවේද යටතේම භාවිත කළ යුතු බව පෙන්වා දුන් බව සඳහන් වේ.

මීට අමතරව, කළමනාකරණ සේවා දෙපාර්තමේන්තුවේ අනුමැතියකින් තොරව පවත්වාගෙන යන තනතුරු සහ සිදුකර ඇති දීමනා ගෙවීම් සම්බන්ධයෙන්ද කරුණු විමසූ කාරක සභාව, රාජ්‍ය මූල්‍ය රෙගුලාසිවලට අනුකූල නොවන එවැනි සියලු ගෙවීම් නීත්‍යානුකූලව නිරවුල් කිරීමට පියවර ගන්නා ලෙස උපදෙස් දී ඇත.

විශ්වවිද්‍යාලයේ ඉදිරි සංවර්ධන සැලසුම් පැහැදිලි කාර්ය සාධන දර්ශක සහිතව සකස් කරන ලෙසත්, අපජල හා කසළ කළමනාකරණය මෙන්ම නව සායනික බ්ලොක් ඉදිකිරීම් කඩිනම් කරන ලෙසත් මෙහිදී වැඩිදුරටත් උපදෙස් ලබා දී ඇත.