චීන අභ්‍යවකාශ තාක්ෂණ ඉතිහාසයේ දැවැන්ත පෙරළියක් සිදු කරමින්, යළි භාවිත කළ හැකි 'Zhuque-3' රොකට්ටුව අභ්‍යවකාශගත කර එහි මුල් කොටස ගොඩබිමෙහි නිශ්චිත ස්ථානයක් වෙත සාර්ථකව ගොඩබස්වා ගැනීමට චීනය සමත් වී තිබේ.

වයඹදිග චීනයේ ඩොංෆෙං (Dongfeng) වාණිජ අභ්‍යවකාශ නවෝත්පාදන නියමු කලාපයෙන් මෙම රොකට්ටුව අභ්‍යවකාශය වෙත මුදා හැර ඇත්තේ එරට වෙලාවෙන් අද (19) උදෑසන 07:35ටය.

මෙම මෙහෙයුමේ විශේෂතා කිහිපයක් පහත පරිදි දැක්විය හැකිය.

මෙය චීනය විසින් දියත් කරන ලද ප්‍රථම ගොඩබිම් පාලිත රොකට් ගොඩබෑම ලෙස අභ්‍යවකාශ ඉතිහාසයට එක්වේ.

'Zhuque-3' රොකට්ටුවේ පළමු අදියර සඳහා දිග හැරිය හැකි ගොඩබෑමේ පාද (Deployable landing legs) යොදාගෙන ඇති අතර, එමඟින් සිරස් අතට ගොඩබෑම සහ එය නැවත වරක් භාවිත කිරීමේ හැකියාව ලැබී ඇත.

පසුගිය ජූලි මස 10 වන දින 'Long March-10B' රොකට්ටුවේ පළමු කොටස මුහුදේ පිහිටුවන ලද දැලක් ආධාරයෙන් සාර්ථකව ස්ථානගත කර ගැනීමෙන් අනතුරුව ක්‍රියාත්මක වූ සාර්ථකම මෙහෙයුම මෙය වේ.

අභ්‍යවකාශ මෙහෙයුම් සඳහා දැරීමට සිදුවන පිරිවැය සැලකිය යුතු ලෙස අඩු කර ගැනීමටත්, චීනයේ ප්‍රධාන වාණිජ අභ්‍යවකාශ මෙහෙයුම් අවශ්‍යතා අනාගතයේදී සාර්ථකව සපුරා ගැනීමටත් මෙම නව තාක්ෂණික ජයග්‍රහණය ඉතා වැදගත් වනු ඇති බව අභ්‍යවකාශ විශේෂඥයෝ පෙන්වා දෙති.