ඉදිරි වසර 30ක කාලයට ගැළපෙන පරිදි කටුනායක බණ්ඩාරනායක ජාත්‍යන්තර ගුවන්තොටුපොළේ ගුවන් මගී ධාරිතාව සහ කාර්යක්ෂමතාව ඉහළ නැංවීමේ විශේෂ සංවර්ධන සැලැස්ම සම්බන්ධයෙන් ජනාධිපති අනුර කුමාර දිසානායක මහතාගේ අවධානය යොමුව තිබේ.

වරාය සහ සිවිල් ගුවන් සේවා අමාත්‍යාංශයේ 2026 වසරේ ප්‍රගතිය සහ 2027 වසරේ අයවැය ප්‍රතිපාදන පිළිබඳ විශේෂ සාකච්ඡාවක් ඊයේ (15) පස්වරුවේ ජනාධිපති ලේකම් කාර්යාලයේදී ජනාධිපතිවරයාගේ ප්‍රධානත්වයෙන් පැවැත්වුණු අතර එහිදී මේ පිළිබඳව සාකච්ඡා කර ඇත.

මෙම සංවර්ධන සැලැස්ම මඟින් වසර 2055 වන විට වාර්ෂික මගී ධාරිතාව මිලියන 24.2ක් දක්වා ඉහළ නැංවීම ඉලක්ක කර ඇත.

ඒ අනුව 2027 වසර තුළ කටුනායක බණ්ඩාරනායක ජාත්‍යන්තර ගුවන්තොටුපොළ සංවර්ධන ව්‍යාපෘතියේ දෙවන අදියර යටතේ පවතින පැමිණීමේ සහ පිටවීමේ පර්යන්ත පුළුල් කිරීම, නව පර්යන්තය ඉදිකිරීම සහ ඩිපෝ ප්‍රසාරණ කටයුතු අවසන් කිරීමට සැලසුම් කර තිබේ.

මීට අමතරව ගුවන්තොටුපොළ ආශ්‍රිතව මගී ප්‍රවාහන සේවා විධිමත් හා කාර්යක්ෂම කිරීමේ අවශ්‍යතාව ජනාධිපතිවරයා පෙන්වා දුන් අතර සියලු ගුවන්තොටුපොළ සේවා ඩිජිටල්කරණය කිරීම සඳහා ඩිජිටල් අමාත්‍යාංශය සමඟ ඒකාබද්ධව කටයුතු කරමින් පවතින බවද මෙහිදී අනාවරණය විය.

මෙම සාකච්ඡාවේදී අනෙකුත් ගුවන්තොටුපොළවල් පිළිබඳවද විශේෂ අවධානයක් යොමු විය.

මත්තල ගුවන්තොටුපොළ මේ වන විට දිනකට රුපියල් මිලියන 6-7ත් අතර, එනම් වසරකට රුපියල් බිලියන 4ක පමණ අලාභයක් ලබන බවද මෙහිදී අනාවරණය වී ඇත.

ඒ අනුව මත්තල ගුවන්තොටුපොළ සඳහා මේ වන විට ආයෝජන යෝජනා කැඳවා ඇති අතර 2027 වන විට ඊට අදාළ කටයුතු අවසන් කිරීමට ද විකල්ප යෝජනා ඉදිරිපත් කෙරිණි.

යාපනය ගුවන්තොටුපොළ මගී පර්යන්තය නවීකරණය කර පහසුකම් වැඩිදියුණු කිරීමේ කටයුතු මේ වන විටත් ආරම්භ කර ඇති බවද මෙහිදී අනාවරණය වී තිබේ.

මේ අතර හිඟුරක්ගොඩ ඇතුළු අභ්‍යන්තර ගුවන්තොටුපොළවල සිවිල් මගී මෙහෙයුම් කටයුතු සඳහා ගුවන් හමුදාව සමඟ එක්ව ඒකාබද්ධ සමාලෝචනයක් සිදු කර ඇගයීම් වාර්තාවක් සකස් කරන ලෙස ද ජනාධිපතිවරයා උපදෙස් ලබා දී ඇත.

එමෙන්ම ලෝක බැංකුව, ආසියානු සංවර්ධන බැංකුව සහ ඉන්දියානු රජයේ ආධාර මත වරාය අධිකාරිය යටතේ ක්‍රියාත්මක ශ්‍රී ලංකා වරාය සංවර්ධන වැඩසටහන සහ කන්කසන්තරේ වරාය ප්‍රතිසංස්කරණ ව්‍යාපෘතිවල ප්‍රගතියද ජනාධිපතිවරයාගේ නිරීක්ෂණයට ලක් විය.

කොළඹ වරායේ Logistic Park, දකුණු වරායේ දියකඩනය දීර්ඝ කිරීම, බටහිර පර්යන්තයේ දෙවන අදියර ක්‍රියාත්මක කිරීම සහ වරාය කටයුතු සියල්ල ඩිජිටල්කරණය කිරීම පිළිබඳවද මෙහිදී දීර්ඝ ලෙස සාකච්ඡා කෙරිණි.