බ්‍රසීල ජාතිකයෙකුව රඳවා තබාගෙන රුපියල් ලක්ෂ 30ක කප්පම් මුදලක් ඉල්ලූ පුද්ගලයින් තිදෙනෙකු උණවටුන සංචාරක පොලිසිය විසින් අත්අඩංගුවට ගෙන තිබේ.
අදාළ බ්‍රසීල ජාතිකයා ගාල්ල, තල්පේ ප්‍රදේශයේ පිහිටි නවාතැන්පොළක රැදී සිට ඇති අතර එම ස්ථානයට පැමිණි පුද්ගලයින් දෙදෙනෙකු තමන් සංචාරක පොලිස් නිලධාරීන් බව පවසා කාමරය පරීක්ෂා කර ඇත.
එහිදී ඔවුන් විසින් විදේශිකයා සතු බ්‍රසීලියානු ගමන් බලපත්‍රය, ඇමරිකානු ලේඛන, ජංගම දුරකථන ඇතුළු උපකරණ කිහිපයක් බලහත්කාරයෙන් ලබාගෙන තිබේ.
අනතුරුව එම ස්ථානයට තවත් පුද්ගලයෙකු පැමිණ ඇති අතර ඔහු සහ අදාළ ව්‍යාජ පොලිස් නිලධාරීන් එකතු වී විදේශිකයාට මාංචු දමා ඔහුව බියගන්වා ඇත.
එහිදී එම පිරිස විසින් විදේශිකයාට පවසා ඇත්තේ ඔහුව අත්අඩංගුවට පත්වීමෙන් බේරා ගැනීම සඳහා කොළඹ පොලිස් ප්‍රධානියෙකුට අල්ලස් ලබා දිය යුතු බවය.
අල්ලස් වශයෙන් රුපියල් ලක්ෂ 30ක මුදලක් අවශ්‍ය වන බවත් ඉන් ලක්ෂ දෙකක මුදලක් යතුරුපැදියක් උකස් කර ලබා දුන් බවත් එම මුදල සහ ඉතිරි ලක්ෂ 28 වහාම ලබා දෙන ලෙසත් පවසා එම පිරිස විසින් විදේශිකයාට තර්ජනය කර තිබේ.
මේ පිළිබව ලැබුණු පැමිණිල්ලට අනුව උණවටුන සංචාරක පොලිස් ඒකකයේ ස්ථානාධිපති ඇතුළු නිලධාරීන් කණ්ඩායමක් විසින් දියත් කළ ක්ෂණික මෙහෙයුමකට අනුව අදාළ සැකකරුවන් අත්අඩංගුවට ගැනීමට සමත්ව ඇත.
පොලීසිය සඳහන් කළේ අත්අඩංගුවට ගත් සැකකරුවන් වයස අවුරුදු 25 සහ 26 යන වයස්වල පසුවන්නන් වන බවය.
එමෙන්ම මෙම අපරාධය සිදු කිරීම සඳහා සැකකරුවන් විසින් යොදාගත් ඇල්ටෝ වර්ගයේ මෝටර් රථයක් ද පොලීසිය සිය භාරයට ගෙන තිබේ.
අත්අඩංගුවට ගත් සැකකරුවන් සහ නඩු භාණ්ඩ ගාල්ල මහේස්ත්‍රාත් අධිකරණය වෙත ඉදිරිපත් කිරීමට නියමිත අතර, උණවටුන සංචාරක පොලිසිය වැඩිදුර විමර්ශන සිදු කරයි.
