ශ්‍රේෂ්ඨාධිකරණයේ පුරප්පාඩු 4ක් සහ අභියාචනාධිකරණයේ පුරප්පාඩු 4 පිරවීමේ දීර්ඝ කාලීන ප්‍රමාදය සම්බන්ධයෙන් ශ්‍රී ලංකා නීතිඥ සංගමය විසින් ජනාධිපතිවරයා වෙත ලිපියක් යොමුකර තිබේ.
එම සංගමය ඉකුත් මැයි 25 වැනිදා ද ශ්‍රේෂ්ඨාධිකරණයේ සහ අභියාචනාධිකරණයේ විනිසුරුවරුන්ගේ විශ්‍රාම යාමේ වයස් දීර්ඝ කිරීම සඳහා, ආණ්ඩුක්‍රම ව්‍යවස්ථාව සංශෝධනය කිරීමට වාර්තා පළ වී ඇති යෝජනාව සම්බන්ධයෙන්ද ජනධිපතිවරයා වෙත ලිපියක් යොමුකර තිබුණි.
ඒ අනුව එම ලිපියට තවමත් ප්‍රතිචාරයක් ලැබී නොමැති බවත්, තම සංගමය මතු කරන ලද ගැටළු පිළිබඳව නිසි සැලකිල්ලක් දක්වනු ලෙසත් සිය ලිපියෙන් වැඩිදුරටත් ඉල්ලා ඇත.
එවැනි පියවරක් ගතහොත් අධිකරණයේ ස්වාධීනත්වයට සහ යුක්තිය පසිඳලීම පිළිබඳ මහජන විශ්වාසයට ඇති කළ හැකි අහිතකර බලපෑම් පිළිබඳව අවධානයට ලක්කර ඇත.
ශ්‍රේෂ්ඨාධිකරණයේ පවතින පුරප්පාඩු වලින් පළමුවැන්න 2025 ජුනි 20 වැනිදා විනිසුරු ගාමිණී අමරසේකර විනිසුරුවරයා විශ්‍රාම යාමෙන් පසුව ඇති විය.
ඉන් අනතුරුව ජනාධිපති නීතීඥ එස්. තුරෙයිරාජා, කුමුදිනි වික්‍රමසිංහ සහ ප්‍රියන්ත ප්‍රනාන්දු යන විනිසුරුවරුන්ගේ විශ්‍රාම යාම හේතුවෙන් එම අධිකරණයේ වර්තමාන පුරප්පාඩු හතර ඇති වී තිබේ.
ඊට අමතරව, අභියාචනාධිකරණයේ පවතින පුරප්පාඩු හතරක් ඇති අතර, ඒවාද මේ වනතෙක් පුරවා නොමැත.
ශ්‍රේෂ්ඨාධිකරණයේ සහ අභියාචනාධිකරණයේ විනිසුරුවරුන් පත් කිරීම සඳහා ආණ්ඩුක්‍රම ව්‍යවස්ථාවේ 107(1) වගන්තිය යටතේ ජනාධිපතිවරයාට පැවරී ඇති ව්‍යවස්ථාමය වගකීම නිසැකවම අගය කරන බව නීතිඥ සංගමය සිය ලිපියෙන් දන්වා සිටී.
ඒ අනුව මෙම පුරප්පාඩු දිගු කාලයක් තිස්සේ පැවතීම එම වැදගත් ව්‍යවස්ථාමය කාර්යය ඵලදායී ලෙස ඉටු කිරීමට පටහැනි බවද දැක්වේ.
ශ්‍රී ලංකා නීතිඥ සංගමය නිකුත්කළ නිවේදනය,
BASL Letter to HE President Re Vacancies in SC and CA - Sinhala by poornima
