ගාල්ල, උඩුගම, කෝරළේගම ප්‍රදේශයේ පෞද්ගලික හෝටලයක සිදුවූ පහරදීමකින් බරපතළ තුවාල ලැබූ පුද්ගලයින් දෙදෙනෙකු රෝහල්ගතව ප්‍රතිකාර ලබමින් සිටියදීම සැකකරුවන් ඇප මත මුදාහැර ඇතැයි පහරකෑමට ලක්වූ පුද්ගලයින්ගේ ඥාතීන් චෝදනා කරයි.
ඉකුත් 8 වනදා රාත්‍රියේ අදාළ හෝටලයට කඩාවැදී තිබූ සැකකරුවන් තිදෙනා එහි සිටි පුද්ගලයින් දෙදෙනෙකුට මෙලෙස අමානුෂික අයුරින් පහරදී පලාගොස් තිබුණි.
ප්‍රහාරයෙන් පසු සැකකරුවන් දින කිහිපයක් පොලිසිය මගහැර සැඟවී සිට තිබෙන අතර පසුව පොලිසියට භාරවීමෙන් අනතුරුව අත්අඩංගුවට ගෙන අධිකරණයට ඉදිරිපත් කර ඇපමත මුදාහැර තිබුණි.
ඒ, පහරකෑමෙන් බරපතළ තුවාල ලැබූ පුද්ගලයින් දෙදෙනා උඩුගම මූලික රෝහලේ නේවාසිකව ප්‍රතිකාර ලබමින් සිටියදීය.
පහර කෑමට ලක්වූ පුද්ගලයන්ගේ ඥාතීන් පැවසුවේ, සැකකරුවන් අධිකරණයට ඉදිරිපත් කළ අවස්ථාවේදී වින්දිතයින් තවමත් රෝහල්ගතව ප්‍රතිකාර ලබන බවට පොලිසිය විසින් අධිකරණයට නිසි තොරතුරු වාර්තා නොකිරීම හේතුවෙන් සැකකරුවන් මෙලෙස පහසුවෙන් ඇප ලබාගෙන තිබූ බවය.
ඒ අනුව වින්දිතයින්ගේ තත්ත්වය පිළිබඳව පොලිසිය නිසි ලෙස අධිකරණයට කරුණු වාර්තා නොකිරීම සම්බන්ධයෙන් පහරකෑමට ලක්වූ පුද්ගලයින්ගේ ඥාතීන් පොලිසියට දැඩි අප්‍රසාදය පළකර තිබේ.
අදාළ පහරදීමට සම්බන්ධ පළමු සැකකරු නුවන් මුත්තෙට්ටුවත්ත නම් නෙළුව ජාතික පාසලේ සහ තවලම මහා විද්‍යාලයේ අනධ්‍යයන කාර්යමණ්ඩලයේ සේවය කරන්නෙකි.
ඔහු හිනිදුම ආසනයේ සමගි ජන බලවේගයේ ප්‍රධාන සංවිධායක මෙන්ම හිටපු අමාත්‍යවරයෙකු වන පියසේන ගමගේ මහතාගේ දේශපාලන කටයුතු සඳහා සහාය දක්වන්නෙකු බවද පැවසෙයි.
එමෙන්ම පළමු සැකකරුගේ බිරිඳ නාගොඩ ප්‍රාදේශීය ලේකම් කාර්යාලයට අයත් ග්‍රාම නිලධාරිනියක බවටද තොරතුරු වාර්තාවී ඇතැයි පහරකෑමට ලක්වූ පාර්ශ්වය සඳහන් කරයි.
සිද්ධියට සම්බන්ධ දෙවැනි සැකකරු කැටගොඩ පන්විල අමිත් නමැත්තෙකි.
තෙවැනි සැකකරු: කැටගොඩ පන්විල ප්‍රවීන් නමැත්තෙකි.
මෙම සිද්ධිය සම්බන්ධයෙන් ගාල්ල දිසාව භාර නියෝජ්‍ය පොලිස්පති පුෂ්ප කුමාර මහතාගේ අධීක්ෂණය යටතේ උඩුගම සහ නාගොඩ පොලිස් ස්ථාන වැඩිදුර විමර්ශන සිදුකරයි.
