විදෙස් බුද්ධි තොරතුරක් මත බේරුවලට ඔබ්බෙන් වූ ගැඹුරු මුහුදේ දී ශ්‍රී ලංකා නාවික හමුදා අවේක්ෂණ මෙහෙයුමක් අතරතුර මත්ද්‍රව්‍ය සමග භාරයට ගත් බහුදින ධීවර යාත්‍රාව ගැන තවත් කරුණු හෙළිකරගැනීමට හැකිව තිබේ.

ඒ අනුව සිදුකළ මූලික විමර්ශනවලදී අනාවරණ වී ඇත්තේ, ඉරාන නෞකාවකින් අදාළ මත්ද්‍රව්‍ය තොගය මෙම යාත්‍රාවට ලබාදි ඇති බවය.

'අවේමරියා' නම් මෙම යාත්‍රාව පසුගිය පෙබරවාරි 4 වැනිදා වෙල්ලමංකඩ ධීවර වරායෙන් පිටත්ව ගොස් තිබේ.

අත්අඩංගුවට පත් වූ ධීවරයින් 6 දෙනා මෙම ගමන පිටත්ව ගොස් ඇත්තේ මත්ද්‍රව්‍ය රැගෙන එන බව දැනුවත්ව බව සඳහන්ය.

එම එක් අයෙකුට රුපියල් කෝටියක මුදලක් ලබාදෙන බවට ජාවාරම්කරුවන් පොරොන්දු වී ඇති බවත් සිදුකළ මූලික ප්‍රශ්නකිරීම්වලදී අනාවරණ වී ඇත.

ඒ අනුව ඔවුන් පිටත්වීමට පෙර රුපියල් 50,000ක අත්තිකාරමක්ද ලබාගෙන තිබේ.

එමෙන්ම මෙම යාත්‍රාවේ හිමිකරුද මෙම ජාවාරම පිළිබඳ දැනුවත්ව ඇති බවට ආරක්ෂක අංශ සැක කරන අතර, ඔහු මේ වනවිට ප්‍රදේශයෙන් පලාගොස් ඇති බව වාර්තා වේ.

එමෙන්ම දිසානායක නමැති අයෙකු විසින් ගොඩබිමේ සිට යාත්‍රාවේ සිටි ධීවරයින් මෙහෙයවා ඇති අතර ඔහුව මෙහෙයවා ඇත්තේ 'අයියා' ලෙස හඳුන්වන අයෙක් බව මේ වනවිට අනාවරණ වී ඇත.

සිද්ධිය සම්බන්ධයෙන් වැඩිදුර විමර්ශන පොලිස් මත්ද්‍රව්‍ය නාශක කාර්යාංශය විසින් මෙම යාත්‍රාවේ තිබී හෙරොයින් කිලෝ ග්‍රෑම් 300කට අධික ප්‍රමාණයක් සොයාගනු ලැබීය.

එම මත්ද්‍රව්‍ය උර, යාත්‍රාවේ ඉදිරිපස ටැංකියේ සඟවා තිබියදී සොයාගැනීමට හැකිව ඇත.

පොලිස් මත්ද්‍රව්‍ය නාශක කාර්යාංශයේ නිලධාරීන් එහිදී සිදුකළ මූලික විමර්ශනයේදී හෙළිවුණේ යාත්‍රාවේ තිබූ උරවල අසුරන ලද පැකට් 298ක හෙරොයින් කිලෝග්‍රෑම් 323ක ප්‍රමාණයක් ඇති බවය.

එම මත්ද්‍රව්‍ය තොගය රුපියල් කෝටි 620කට අධික බව සඳහන්ය.

එමෙන්ම යාත්‍රාවේ තිබී සැටලයිට් දුරකථනයක් ද සොයාගැණුනි.