වසර ගණනාවක් පුරා පරිශීලකයින් අතර ජනප්‍රියව පැවති ස්වාධීන Messenger වෙබ් අඩවිය (messenger.com) 2026 අප්‍රේල් මාසයේ සිට සම්පූර්ණයෙන්ම අත්හිටුවීමට Meta සමාගම තීරණය කර ඇති බව විදෙස් මාධ්‍ය පවසයි.
මීට පෙර වින්ඩෝස් (Windows) සහ මැක් (Mac) සඳහා වූ Messenger ඩෙස්ක්ටොප් මෘදුකාංග අත්හිටුවීමට ගත් තීරණයෙන් පසු, වෙබ් අඩවිය ද ඉවත් කිරීමට ගත් මෙම පියවර හරහා Meta සමාගම සිය පණිවිඩ හුවමාරු සේවාවන් නැවතත් ප්‍රධාන Facebook වේදිකාව හා ඒකාබද්ධ කිරීමේ උත්සාහයක නිරත වන බව පැහැදිලි වේ.
2026 අප්‍රේල් මාසයේ සිට messenger.com වෙත පිවිසෙන පරිශීලකයින්ව ස්වයංක්‍රීයව facebook.com/messages වෙත යොමු කරනු ඇති බව සඳහන් වේ.
සක්‍රීය Facebook ගිණුමක් නොමැතිව Messenger පමණක් භාවිතා කරන අයට මින් ඉදිරියට පරිගණකයක් හරහා සිය පණිවිඩ බැලීමට නොහැකි වනු ඇති බව වාර්තා පවසයි.
ඒ අනුව, ඔවුන්ට පණිවිඩ හුවමාරු කිරීමට ඇති එකම විකල්පය Messenger ජංගම දුරකථන යෙදුම (Mobile App) පමණක් විය හැකිය.
සියලුම චැට් ඉතිහාසය (Chat history) ආරක්ෂිතව පවතින අතර, පරිශීලකයින් විසින් සකසන ලද PIN අංකය භාවිතා කර ඕනෑම වේලාවක ඒවා නැවත ලබාගත හැකි බව සඳහන් වේ.
විදෙස් මාධ්‍ය පවසන්නේ මෙම තීරණය සම්බන්ධයෙන් බොහෝ පරිශීලකයින් සිය නොසතුට පළ කර ඇති බවය.
විශේෂයෙන්ම Facebook ගිණුම් අක්‍රිය (Deactivate) කර Messenger පමණක් භාවිතා කළ පිරිසට මෙය විශාල බාධාවකි.
එසේම, ප්‍රධාන Facebook වෙබ් අඩවියේ ඇති අනවශ්‍ය පුවත් (News feed) මඟහැර පණිවිඩ හුවමාරු කිරීමට කැමති වූ අයටද මෙය අවාසිදායක බව සඳහන් වේ.
2008 දී "Facebook Chat" ලෙස ඇරඹි මෙම සේවාව 2011 දී ස්වාධීන App එකක් ලෙස වෙන් කරන ලදී.
නමුත් 2023 වසරේ සිට නැවතත් පණිවිඩ හුවමාරුව Facebook තුළටම ගෙන ඒමට Meta සමාගම පියවර ගනිමින් සිටියි.
නඩත්තු පිරිවැය අවම කරගැනීම සහ සියලුම සේවාවන් එක් තැනකට ගොනු කිරීම මෙහි ප්‍රධාන අරමුණ බව වාර්තා වේ.
කෙසේ නමුත් Meta ආයතනය මේ සම්බන්ධයෙන් නිල නිවේදනයක් නිකුත් කර නොමැති බව වැඩි දුරටත් වාර්තා විය.
