සම්මානිත මහාචාර්ය ගණනාත් ඔබේසේකර දිවි සැරිය නිම කරයි

අමෙරිකාවේ ප්‍රින්ස්ටන් විශ්ව විද්‍යාලයේ මානව විද්‍යාව පිළිබඳ සම්මානිත මහාචාර්යවරයෙකු වූ ගණනාත් ඔබේසේකර මහතා අභාවප්‍රාප්ත වී තිබේ.

මිය යන විට ඒ මහතා 95 වැනි වියේ පසුවිය.

මහාචාර්ය ගණනාත් ඔබේසේකර මහතා 1955 වසරේදී පේරාදෙණිය විශ්ව විද්‍යාලයේ ඉංග්‍රීසි භාෂාව පිළිබඳ ශාස්ත්‍රවේදී උපාධිය සම්පූර්ණ කර ඇති අතර පසුව 1958 වසරේදී වොෂින්ටන් විශ්ව විද්‍යාලයෙන් සිය පශ්චාත් උපාධියත් 1964 වසරේදී මානව විද්‍යාව සම්බන්ධව සිය ආචාර්ය උපාදියත් හිමි කරගනු ලැබීය.

තවද 1968 වසරේ සිට 1972 දක්වා ශ්‍රී ලංකා විශ්ව විද්‍යාලයේ සමාජ විද්‍යා අංශයේ මහාචාර්යවරයෙකු මෙන්ම ප්‍රධානියාද වූ ඒ මහතා 1972 වසරේ සිට 1980 දක්වා සැන් ඩියාගේ හී කැලිෆෝනියා විශ්ව විද්‍යාලයේ මානව විද්‍යාව පිළිබඳ ආචාර්යවරයෙකුද විය.

1983 වසරේ සිට 1988 දක්වා ප්‍රින්ස්ටන් විශ්ව විද්‍යාලයේ මානව විද්‍යා දෙපාර්තමේන්තුවේ සභාපතිවරයා ලෙස කටයුතු කළ ගණනාත් ඔබේසේකර මහතා 1988 වසරේ සිට 2000 වසර දක්වා ප්‍රින්ස්ටන් විශ්ව විද්‍යාලයේ සිය දැනුම සිසු පරපුර වෙත ලබා දෙමින් ද සිටියේය. 

ගණනාත් ඔබේසේකර මහතා ශ්‍රී ලංකාවේ සහ ඉන්දියාවේ ක්ෂේත්‍ර කටයුතුවල නියැලී සිටි අතර ඔහු වඩාත් උනන්දු වූයේ මනෝ විශ්ලේෂණය සහ මානව විද්‍යාව මෙන්ම ආගමික අත්දැකීම් සමග පුද්ගලික සංකේතවාදය සම්බන්ධ වන ආකාරයන් පිළිබඳවය.

ඔහු ශ්‍රී ලංකාවේ බුදුදහම, ජනවාර්ගික අර්බුදය වැනි විෂයයන් කෙරෙහි බලපෑම් සහගත අධ්‍යන සිදුකළ මානව විද්‍යාඥයෙකු ලෙසද හැඳින්වෙන අතර දුටුගැමුණුගේ හෘදසාක්ෂිය, ප්‍රොතෙස්තන්ත බුදුදහම සහ පත් ඇදහිල්ල ඔහු විසින් කරන ලද අවධානය දිනාගන්නා ලද ශාස්ත්‍රීය අධ්‍යයනයන් වේ.

සිය ජීවිත කාලය තුළ ග්‍රන්ථ කිහිපයක්ද රචනා කර ඇති මහාචාර්ය ගණනාත් ඔබේසේකර මහතා තමන් පරිශීලනය කළ පොත් පත් රැසක් අඩංගුව තිබූ සිය පුස්තකාලයද පේරාදේණිය විශ්ව විද්‍යාලයට පරිත්‍යාග කිරීමටද පියවර ගෙන තිබුණි.

එමෙන්ම ඔහු විසින් රචනා කරන ලද කෘතීන් අතරට වැදගත් කෘතියක් වූ Land Tenure in Village Ceylon කෘතිය සඳහන් කළ හැකි අතර එය සමාජ විද්‍යාත්මක හා ඓතිහාසික අධ්‍යයනයක් ද විය.