ස්ථාවර නියෝග අත්හිටුවීමට ඡන්දයක් ඉල්ලමින් අද (17) පාර්ලිමේන්තුවේදී විපක්ෂය ගෙනා යෝජනාව දුර්වල උපාය මාර්ගයක් බව අග්‍රාමාත්‍ය රනිල් වික්‍රමසිංහ මහතා පවසා තිබේ.

ඔහු පෙන්වා දී ඇත්තේ, තමන් ද විපක්ෂයේ සිටියේ නම් ස්ථාවර නියෝග අත්හිටුවීමට විරුද්ධව ඡන්දය ප්‍රකාශ කිරීමට ඉඩ තිබූ බවය.

පාර්ලිමේන්තු මන්ත්‍රී එම්. ඒ. සුමන්තිරන් මහතාට අද සභා ගර්භයේදී අග්‍රාමාත්‍යවරයා විසින් ඒ බව යළිත් පැහැදිලි කර තිබේ.

ඒ අනුව, ඡන්ද විමසීමෙන් අනතුරුව අගමැතිවරයා විපක්ෂයේ මන්ත‍්‍රීවරුන් කිහිපදෙනෙකුට පැහැදිලි කර තිබුණේ ජනාධිපතිවරයාට එරෙහි විශ්වාසභංග යෝජනාව විවාදයට ගැනීම වැළැක්වීම සඳහා ආණ්ඩුවේ මන්ත්‍රීවරුන් ස්ථාවර නියෝග අත්හිටුවීමට ජන්දය අවස්ථාවක් කරගන්නා බවය.

ඒ නිසා මෙය දුර්වල පාර්ලිමේන්තු උපාය මාර්ගයක් බවද අගමැතිවරයා විපක්ෂයට පෙන්වා දී තිබුණි.

නමුත් විපක්ෂය වැරැදි උපාය මාර්ගයක් තෝරාගෙන ස්ථාවර නියෝග අත්හිටුවීමට ඡන්දයක් ඉදිරිපත් කිරීමට කටයුතු කළේය.

ස්ථාවර නියෝග අත්හිටුවා ජනාධිපතිවරයාට එරෙහි අප්‍රසාදය පළකිරීම පිළිබඳ යෝජනාවක් විවාදයට ගැනීමට අවශ්‍ය බව විපක්ෂයේ පාර්ලිමේන්තු මන්ත්‍රීවරුන් වන එම්. ඒ.සුමන්තිරන්, රවුෆ් හකීම් සහ මනෝ ගනේෂන් ඊයේ (16) අගමැතිවරයා සමග පැවති සාකච්ඡාවකදී දන්වා තිබුණි.

එහිදී ද අගමැතිවරයා විපක්ෂයේ මන්ත්‍රීවරුන්ට සඳහන් කර ඇත්තේ තම නිවෙස්වලට එල්ලවූ ප්‍රහාර සම්බන්ධයෙන් කල්තැබීමේ විවාදයක් ගෙනඒමට මන්ත්‍රීවරුන්ට අවශ්‍යවී ඇති බවත් ඒ නිසා ඔවුන්ට ඒ සඳහා ඉඩ ලබාදෙන ලෙසත්ය.

අගමැතිවරයා විසින් වැඩිදුරටත් පැහැදිලි කර ඇත්තේ මේ වනවිටත් විශ්වාසභංගය පිළිබඳ යෝජනාව න්‍යාය පුස්තකවල ඇති බැවින් එය පසුව සලකාබලන බවය.

එමෙන්ම මන්ත‍්‍රීවරුන්ට ප‍්‍රධානතම ප‍්‍රශ්නය වී ඇත්තේ තම නිවසට පහරදීම නිසා, ස්ථාවර නියෝග අත්හිටුවීමේ ඡන්දය පරාජයට පත්කරනු ඇති බවද පෙන්වා දී ඇත.

කෙසේවෙතත් ස්ථාවර නියෝග අත්හිටුවීමේ මන්ත්‍රී සුමතිරන්ගේ යෝජනාව පිළිබඳව ඡන්ද විමසීම අද පාර්ලිමේන්තුවේදී පැවත්වුණි.

ඒ අනුව එය වැඩි ඡන්ද 51කින් පරාජයට පත්විය.

එම යෝජනාවට පක්ෂව ඡන්ද 68 ක් ලැබුණු අතර විරුද්ධව ඡන්ද 119ක් ලැබී තිබුණි.

ජනාධිපතිවරයාට අප්‍රසාදය පළකිරීමේ යෝජනාව විවාදයට ගැනීම තීරණය කිරීම සඳහා මෙලෙස ස්ථාවර නියෝග අත්හිටුවීම සම්බන්ධයෙන් ඡන්ද විමසීමක් සිදුකරනු ලැබීය.

ඒ අනුව ජනාධිපතිවරයාට අප්‍රසාදය පළකිරීමේ යෝජනාව විවාදයට නොගෙන ප්‍රතික්ෂේප වෙයි.