මල්වානේ සුවිසල් මන්දිරය ප්‍රසිද්ධියේ වෙන්දේසි කිරීමට නියෝග
June 3, 2022 10:27 pm
ගම්පහ මල්වාන නිවස සම්බන්ධයෙන් වන නඩුවෙන් හිටපු අමාත්‍ය බැසිල් රාජපක්ෂ සහ තිරු නඩේෂන් නිදොස් කොට නිදහස් කිරීමට ගම්පහ මහාධිකරණය අද (03) නියෝග කළේය.
තීන්දුව ප්‍රකාශයට පත්කරමින් පූර්වගාමී මහාධිකරණ විනිසුරුවරයා පැවසුවේ විත්තිකරුවන්ට එරෙහි චෝදනා සාධාරණ සැකයෙන් ඔබ්බට ඔප්පු කිරීමට පැමිණිලි පාර්ශ්වය අපොහොසත්වීම හේතුවෙන් මෙම නියෝගය ලබාදෙන බවය.
දොම්පේ, මල්වානේ කැලණි ගඟ අසල අක්කර 16ක ඉඩමක් මිලට ගෙන එහි සුවිසල් නිවෙසක් සහ නාන තටාකයක් ඉදිකර ගොවිපොළක් පවත්වාගෙන යමින් රාජ්‍ය මුදල් අවභාවිත කළ බවට චෝදනා කරමින් නීතිපති දෙපාර්තමේන්තුව යහපාලන ආණ්ඩු සමයේදී බැසිල් රාජපක්ෂ සහ තිරු නඩේෂන් යන මහත්වරුන්ට එරෙහිව නඩු ගොනු කළේය.
නඩුවට අදාළ අක්කර 16ක ඉඩමේ ඉදිකර තිබූ නිවසේ මෙන්ම නාන තටාකයේ සහ සියලුම දේපළවල වටිනාකම රුපියල් විසිකෝටි අසූලක්ෂයක් වන බවට නීතිපති දෙපාර්තමේන්තුව සිදුකළ තක්සේරුවකදී අනාවරණ වූ බව එම දෙපාර්තමේන්තුව අධිකරණයට දැනුම් දුනි.
කෙසේවෙතත් මෙම නඩුව විභාගයට ගන්නා අතරවාරයේ හිටපු අමාත්‍ය බැසිල් රාජපක්ෂ මහතා අධිකරණය හමුවේ දැරූ ස්ථාවරය වූයේ තමාට මෙම ඉඩමේ කිසිදු අයිතියක් නොමැති බවය.
එසේම රුපියල් ලක්ෂ 640 කට මිලදී ගෙන ඇති මෙම ඉඩමේ දැනට ලියාපදිංචි අයිතිය ඇති මුදිත ජයකොඩි නැමැත්තාද මෙම ඉඩමේ අයිතිය ඔහුට ද නොමැති බව ප්‍රකාශ කළේය.
ඒ අනුව පුගොඩ මහෙස්ත්‍රාත් අධිකරණය නියෝග කළේ කිසිවෙකුත් හිමිකම් නොකියන මෙම ඉඩම හා නිවස ප්‍රසිද්ධ වෙන්දේසියකදී අලෙවි කරන ලෙසය.
අලෙවි කිරීමෙන් පසු ලැබෙන මුදල් පූගොඩ මහෙස්ත්‍රාත් අධිකරණය බාරයට පත්කරන ලෙසද අධිකරණය නියෝග කළේය.
කෙසේවෙතත් අධිචෝදනා තුනක් යටතේ බැසිල් රාජපක්ෂ සහ තිරු නඩේෂන් යන අයට එරෙහිව නීතිපතිවරයා 2017 මැයි මස 03 වනදා ගම්පහ මහාධිකරණය අධිචෝදනා ගොනුකළ අතර වසර 05කට වැඩි කාලයක් නඩුව විභාගයට ගැනුණි.
මෙම නඩුව අවසන් වරට විභාගයට ගැනුණු මාර්තු 25වැනිදා පැමිණිල්ල විසින් පළමු සාක්ෂිය ලෙස කැඳවූ එම නිවස ඉදිකළ කොන්ත්‍රාත්කරු වන උපුල් කුමාර රාමවික්‍රම පැවසුවේ මූල්‍ය අපරාධ විමර්ශන කොට්ඨාසයට තමා විසින් පැමිණිල්ලක් ඉදිරිපත් නොකළ අතර තමා ලබාදී ඇති ප්‍රකාශයේ සඳහන් අත්සන තමාගේ බව පිළිගත නොහැකි බවය.
සාක්ෂිකරු එසේ පවසා සිටින පසුබිමක බැසිල් රාජපක්ෂ සහ තිරුකුමාරන් නඩේසන් යන විත්තිකරුවන් දෙදෙනාට විරුද්ධව ඇති මෙම නඩුවේ මින් ඉදිරියට සාක්ෂි විමසීමක් සිදු නොකරන බවට පැමිණිල්ල මෙහෙයවූ රජයේ නියෝජ්‍ය සොලිසිටර් ජනරාල් ශනිල් කුලරත්න මහතා මාර්තු 25 වනදා මහාධිකරණයට දැනුම් දුනි.
පැමිණිල්ල විසින් තවදුරටත් සාක්ෂි විමසීමක් සිදු නොකර නඩුව අවසන් කර ඇති හෙයින් තම සේවාදායකයන් චෝදනාවලින් නිදහස් කරන ලෙස විත්තිකරුවන් වෙනුවෙන් පෙනී සිටි ජනාධිපති නීතිඥවරුන් මහාධිකරණය හමුවේ ඉල්ලා සිටියේය.
ඒ අනුව නඩුව ඉදිරියට පවත්වාගෙන යන්නේද නැද්ද යන තීන්දුව ප්‍රකාශයට පත්කිරීම සඳහා නඩුව අද දිනට කල් තැබුණි.
අද නඩුව කැඳවූ අවස්ථාවේ පූර්වගාමී මහාධිකරණ විනිසුරු නිමල් රණවීර මහතා විසින් අදාළ නඩුවේ තීන්දුව ප්‍රකාශයට පත්කරමින් ප්‍රකාශ කළේ විත්තිකරුවන් දෙදෙනා නිදොස් කොට නිදහස් කිරීමට නියෝග කරන බවය.
විත්තිකරුවන්ට එරෙහි චෝදනා සාධාරණ සැකයෙන් ඔබ්බට ඔප්පු කිරීමට පැමිණිලි පාර්ශ්වය අපොහොසත් වීම හේතුවෙන් මෙම නියෝගය ලබාදෙන බවද පූර්වගාමී විනිසුරුවරයා ප්‍රකාශ කළේය.
ඒ අනුව මල්වාන හිමිකරුවෙක් නොමැති නිවසට අදාළ නඩුවෙන් හිටපු අමාත්‍ය බැසිල් රාජපක්ෂ සහ තිරු නඩේසන් යන දෙදෙනා නිදොස් කොට නිදහස් කෙරුණි.
විත්තිකරුවන් දෙදෙනාම අද නඩුවාරයට සහභාගී වී සිටි අතර ඔවුන් පැමිණි මෝටර් රථ අධිකරණ පරිශ්‍රය ඉදිරියේ ගාල් කිරීම සම්බන්ධයෙන් ගම්පහ මහාධිකරණයේ නීතීඥවරුන්ගෙන් විරෝධය එල්ලකර තිබුණි.
