මැතිඇමතිවරුන් රැසකගේ නිවාස ගිනි තබයි
May 10, 2022 07:39 am
ඊයේ (09) රාත්‍රී මැතිඇමතිවරුන් රැසකගේ නිවාස සහ දේපළවලට ද ගිනි තබා හානි සිදුකර තිබේ.
හිටපු අමාත්‍යවරුන් වන රමේෂ් පතිරණ, ජොන්ස්ටන් ප්‍රනාන්දු, ප්‍රසන්න රණතුංග, බන්දුල ගුණවර්ධන, කෙහෙළිය රඹුක්වැල්ල, ගාමිණී ලොකුගේ, විමල් වීරවංශ, සනත් නිශාන්ත, රෝහිත අබේගුණවර්ධන, පවිත්‍රා වන්නිආරච්චි, කනක හේරත්, ශාන්ත බණ්ඩාර, අරුන්දික ප්‍රනාන්දු, නිමල් ලන්සා, ඉන්දික අනුරුද්ධ, කංචන විජේසේකර යන අයගේ නිවාසවලට ගිනි තබා දැඩි අලාභානි සිදුව තිබේ.
ඊට අමතරව දිවයින පුරා පක්ෂ විපක්ෂ දේශපාලඥයින් රැසකගේ නිවාසවලට ද හානි සිදුකර ඇති අතර කුරුණෑගල පිහිටි මහින්ද රාජපක්ෂ මහතාට අයත් නිවසකට ද ගිනි තබා ඇති බව වාර්තා වේ.
මැදමුලන පිහිටි ඩී.ඒ රාජපක්ෂ සහ දන්දිනා රාජපක්ෂ මහත්මියගේ ස්මාරකය ද කිසියම් පිරිසක් විසින් කඩා බිඳ දමා විනාශ කර තිබේ.
මේ අතර වටරැක බන්ධනාගාර වැඩ කඳවුරේ රැඳවියන් පිරිසක් රැගත් බස් රථයකට ප්‍රහාරයක් එල්ල වී ඇති බව බන්ධනාගාර මාධ්‍ය ප්‍රකාශක චන්දන ඒකනායක මහතා සඳහන් කළේය.
බාහිර ඉදිකිරීම් සඳහා බන්ධනාගාර නිලධාරීන්ගේ රැකවරණය යටතේ පිටතට රැගෙන ගොස් යළි බන්ධනාගාර කඳවුරට පැමිණෙමින් සිටියදී එම පහරදීම සිදුව ඇති අතර එහිදී සිරකරුවන් පිරිසක් තුවාල ලබා රෝහල් ගත තිබේ.
මේ අතර, ඊයේ දිනයේ ගාලු මුවදොර සහ අරලියගහ මන්දිරය අසල ඇති වූ ගැටුම්කාරී සිදුවීම්වලින් තුවාල ලැබූ පුද්ගලයින් 193 දෙනෙකු ප්‍රතිකාර සඳහා කොළඹ ජාතික රෝහලට ඇතුළත් කර ඇති බව වාර්තා වේ.
ඉන් බොහෝ පිරිසකට සුළු තුවාල සිදුව ඇති අතර ඉන් වැඩි දෙනෙකු ප්‍රතිකාර ගෙන රෝහලෙන් පිටව ගොස් ඇති බව සඳහන්ය.
තවදුරටත් ජනතාව දිවයින පුරා මාර්ගවල රැස් වී විරෝධතා දක්වමින් සිටින බව "අද දෙරණ" වාර්තාකරුවන් සඳහන් කළේය.
මේ අතර ගාලු මුවදොර පැවැත්වෙන අරගලය විරෝධතාවය සඳහා ඊයේ රාත්‍රියේ ද විශාල පිරිසක් සහභාගී වී සිටියේය.
අරලියගහ මන්දිරය අසල විරෝධතාවයේ නිරත පිරිස් විසුරුවා හැරීම සඳහා ඊයේ රාත්‍රී කඳුළු ගෑස් ප්‍රහාර මෙන්ම අහසට වෙඩි තැබීම් ද සිදුකළ බව පොලීසිය සඳහන් කළේය.
මේ අතර, වීරකැටිය ප්‍රාදේශීය සභාවේ සභාපතිවරයාගේ නිවස අසල සිදු වූ වෙඩි තැබීමකින් පුද්ගලයින් දෙදෙනෙකු මියගොස් තවත් පිරිසක් තුවාල ලබා තිබේ.
පොලීසිය සඳහන් කළේ, ඊයේ රාත්‍රී පිරිසක් ප්‍රාදේශීය සභාවේ සභාපතිවරයාගේ නිවසට ගිනි තබා ඇති අතර එහිදී වෙඩි තැබීමක් ද සිදුව ඇති බවය.
වෙඩි වැදීමෙන් තුවාල ලැබූ පුද්ගලයින් 10 දෙනෙකු වීරකැටිය රෝහලට ඇතුළත් කිරීමෙන් අනතුරුව එක් අයෙකු මියගොස් තිබේ.
අනෙක් පිරිස තංගල්ල රෝහලට මාරුකර යවා ඇති අතර එහිදී ද තවත් පුද්ගලයෙකු මියගොස් ඇති බව රෝහල් ප්‍රකාශකයෙකු සඳහන් කළේය.
මේ අතර නිට්ටඹුව නගරයේදී සිදුවූ වෙඩි තැබීමේ සිද්ධියකින් අනතුරුව පොළොන්නරුව දිස්ත්‍රික් ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී අමරකීර්ති අතුකෝරාළ මහතා සහ ඔහුගේ ආරක්ෂක නිලධාරියා මිය ගියේය.
එම වෙඩි තැබීමේ සිද්ධියෙදී තවත් පුද්ගලයින් තිදෙනෙකු තුවාල ලබා ඇති බව වාර්තා වේ.
මේ අතර පාර්ලිමේන්තු මන්ත්‍රි කුමාර වෙල්ගම මහතාට ද ඊයේ රාත්‍රී මාකුඹුර ප්‍රදේශයේදී පහරදීමක් සිදුව තිබේ.
මෝටර් රථයෙන් ගමන් කරමින් සිටියදී අදාළ පහරදීම සිදුව ඇති අතර එහිදී තුවාල ලැබූ කුමාර වෙල්ගම මන්ත්‍රීවරයා ප්‍රතිකාර සඳහා හෝමාගම රෝහලට ඇතුළත් කර ඇති බව වාර්තා වේ.
