
වත්මන් ආණ්ඩුව ඉදිරිපත් කර ඇති අයවැය යෝජනා මගින් ජනතාව බලාපොරොත්තු වූ සහන හිමි වී නොමැති බව සමගි ජනබලවේගයේ පාර්ලිමේන්තු මන්ත්රී ආචාර්ය හර්ෂ ද සිල්වා මහතා පවසයි.
විශේෂයෙන්ම මෙරට මැදි ආදායම් ලබන පවුල් දැඩි ආර්ථික පීඩනයකට මුහුණ දී සිටින බවත් ඔවුන්ගේ මාසික ආදායම සහ වියදම අතර පවතින පරතරය තවදුරටත් පුළුල් වී ඇති බවත් මන්ත්රීවරයා සඳහන් කළේය.
ඊයේ (16) රාත්රී ටීවී දෙරණ ඔස්සේ විකාශය වූ 360 කාලීන වැඩසටහන සමග එක්වෙමින් හර්ෂ ද සිල්වා මන්ත්රීවරයා මේ බව පැවසීය.
එහිදී ඒ මහතා වැඩිදුරටත් සඳහන් කළේ, අත්යවශ්ය ආහාර ද්රව්ය සඳහා පනවා ඇති බදු ඉවත් කිරීම සහ වැට් බද්ද ශුන්ය කිරීම වැනි පොරොන්දු ඉටු කිරීමට ආණ්ඩුව කටයුතු කර නොමැති බවය.
2019 වසරේදී සාමාන්ය මැදි ආදායම්ලාභී පවුලක මාසික ආදායම සහ වියදම අතර රුපියල් 5,700ක ඉතිරියක් පැවති නමුත් වර්තමානය වන විට එම තත්ත්වය වෙනස් වී ඇති බවද ආචාර්ය හර්ෂ ද සිල්වා මහතා පෙන්වා දුන්නේය.
ඒ අනුව අද වන විට එවැනි පවුලක මාසික ආදායමට සාපේක්ෂව වියදම රුපියල් 18,170කින් ඉහළ ගොස් ඇති බවත්, එම හිඟය පියවා ගැනීම සඳහා ජනතාවට ණය ගැනීමට, වියදම් කපා හැරීමට හෝ තම වටිනා දේපළ උකස් කිරීමට සිදුව ඇති බවත් මන්ත්රීවරයා පැවසීය.
මෙම තත්ත්වය තුළ සාමාන්ය මැදි ආදායම්ලාභී ජනතාව පෙරට වඩා දැඩි ආර්ථික පීඩනයකට ලක්ව සිටින බව පෙන්වා දුන් හර්ෂ ද සිල්වා මහතා, එවැනි ජනතාවට යම් සහනයක් ලබාදීමට ආණ්ඩුව කටයුතු කළ යුතුව තිබූ බවද අවධාරණය කළේය.
ජනතාව මුහුණ දෙන සැබෑ ආර්ථික දුෂ්කරතා සැලකිල්ලට ගනිමින් සහන සැලසීමේ අවශ්යතාවක් පවතින බවද ඔහු වැඩිදුරටත් ප්රකාශ කළේය.
එහිදී අදහස් දැක්වූ සමගි ජනබලවේගයේ පාර්ලිමේන්තු මන්ත්රී ආචාර්ය හර්ෂ ද සිල්වා මහතා,
''දීපු එක ප්රධාන පොරොන්දුවක් තමයි අත්යවශ්ය ආහාරවලට තියෙන බද්ද අයින් කරනවා, වැට් එක බින්දුවට ගේනවා කිව්වා, ඒක කළේ නෑ. අද රටේ ජනතාව එදාට වඩා දරිද්රතාවයෙන් පෙළෙනවා. සාමාන්ය මැදපන්තියේ පවුලක් ගන්න, 2019 ආදායමයි වියදමයි අතර තිබ්බ වෙනස තමයි රුපියල් 5,700 ක ඉතිරියක් තිබ්බා. හැබැයි අද මේ මැද තියෙන පවුලේ ආදායම සහ වියදම අතර තියෙන වෙනස සෘණ 18,170ක් මාසයකට. එතකොට 18,000ක් මදි අර මැද ඉන්න පවුලකට. එතකොට මොකද වෙන්නේ? එක්කෝ ණය ගන්න වෙනවා, එහෙමත් නැත්නම් කොහෙන් හරි අඩු කරන්න වෙනවා, හරි මොකක් හරි උකස් තියන්න වෙනවා. ඒකෙන් පෙන්නුම් කරන්නේ එදාට වඩා අද මිරිකීමකට පත් වෙලා ඉන්නවා සාමාන්ය මැදපන්තියේ පුද්ගලයා. ආණ්ඩුවට නැද්ද හදවතක්.. යම්කිසි සහනයක් දෙන්න තිබුණා.''

















































