සමාජය අඳුරින් අලෝකයට ගෙන ඒමටත් සියලු දෙනාගේ වගකීමක් වන බව විපක්ෂ නායක සජිත් ප්‍රේමදාස මහතා පවසයි.
දීපාවලි දින සුබ පැතුම් පණිවිඩයක් නිකුත් කරමින් විපක්ෂ නායකවරයා සඳහන් කර ඇත්තේ අඳුරින් ආලෝකයටත් අයහපතෙන් යහපතටත් ගෙන එම නරකට එරෙහිව කටයුතු කිරීම සියලු දෙනාගේම වගකීමක් වනු ඇති බවය.
එම වගකීම වගවීමක් ලෙස ඉටු කිරීමට අධිෂ්ඨානයක් සහ වැඩපිළිවෙලක් සැකසීමට කැපවීමට දීපාවලිය තුළ සැඟව ඇති දර්ශනය මග පෙන්වීමට පරමාදර්ශයක් වන බවද විපක්ෂ නායක සජිත් ප්‍රේමදාස මහතා අදාළ සුබ පැතුම් පණිවිඩය මගින් පෙන්වා දී තිබේ.
විපක්ෂ නායක සජිත් ප්‍රේමදාස මහතාගේ සම්පූර්ණ සුබ පැතුම් පණිවිඩය පහතින්,
"හින්දු බැතිමතුන් ගෞරවයෙන් සහ බැතියෙන් සමරන දීපාවලී උත්සවය ඉතාමත් ගැඹුරු හා දාර්ශනික පදනමක් ඇති උත්සවයකි. අඳුර වෙනුවට ආලෝකයත්, නපුර වෙනුවට යහපතත් ප්‍රාර්ථනා කරන, එය ජයග්‍රහණය කළ පුරාවෘත්තයක් දීපාවලී සැමරුම තුළ අපට දක්නට ලැබේ.
බලය තුළ පීඩනයට පත් කරන්නට දරනු ලැබූ උත්සාහයක් පරාජයට පත් කිරීම සිහිපත් කරන දීපාවලිය තුළ දක්නට ලැබෙන යටි පෙළ අරුත අන් කවර කලකටත් වඩා අපට අපගේ සමාජයට අත්විඳින්නට මේ මොහොතේ සමාජ ආර්ථික පරිසරය සැකසී තිබේ.
ජනතාවගේ ආර්ථික පීඩනය, නිදහසේ ජීවත්වීමේ අයිතිය, නීතියේ ආධිපත්‍ය මෙන්ම ඒ සියල්ලට බලය සැපයෙන ජනතා පරමාධිපත්‍යය යටපත් කරන අණපනත් ගණනාවක් සම්මත කොට හෝ සම්මත කිරීමට දරන උත්සාහය තුළ අප අත්විඳින්නේ සමාජය වසා ගන්නා අඳුරකි. ජනතාවගේ ජීවිතවල යහපත වෙනුවට අයහපත වර්ධනය කිරීමකි.
මෙය පරාජයට පත් කොට සමාජය අඳුරෙන් ආලෝකයට අයහපතෙන් යහපතට ගෙන ඒම නරකට එරෙහිව කටයුතු කරන සියලු දෙනාගේම වගකීමකි. එම වගකීම වගවීමක් ලෙස ඉටුකිරීමට අධිෂ්ඨානයක් සහ වැඩපිළිවෙලක් සැකසීමට කැපවීමට දීපාවලිය තුළ සැඟව ඇති දර්ශනය මග පෙන්වීම අපට පරමාදර්ශයක් බව සඳහන් කළ යුතුය.
බහු ආගමික, බහු ජාතික බහු භාෂාමය සමාජයක පදනම සැකසී ඇති අපගේ මාතෘ භූමිය යහපත් දේශයක් ලෙස ගොඩනගන්නට වර්තමානයේ නිවැරදිව තේරුම් ගෙන කටයුතු කිරීමට දීපවාලී උත්සවය සමරන මේ මොහොතේ සැමට දිරිය ශක්තිය සහ මග පෙන්වීම ලැබේවායි ප්‍රාර්ථනා කරනු කැමැත්තෙමි.
සජිත් ප්‍රේමදාස,
ශ්‍රී ලංකා පාර්ලිමේන්තුවේ විපක්ෂ නායක."
