පිළිකා රෝගීන්ට විකිරණ ප්‍රතිකාර සේවා කඩිනමින් හා කාර්යක්ෂමව සැලසීම සඳහා මහරගම අපේක්ෂා රෝහලවිකිරණ ප්‍රතිකාර ධාරිතාව පුළුල් කිරීමට සෞඛ්‍ය අමාත්‍යාංශයේ විශේෂ අවධානය යොමුව තිබේ.
ඒ සම්බන්ධයෙන් විශේෂ පසු විපරම් කළමනාකරණ සමාලෝචන රැස්වීමක් සෞඛ්‍ය නියෝජ්‍ය අමාත්‍ය වෛද්‍ය හංසක විජේමුණි මහතාගේ ප්‍රධානත්වයෙන් පසුගියදා අපේක්ෂා රෝහල් ශ්‍රවණාගාරයේදී පැවැත්විණි.
විකිරණ ප්‍රතිකාර සේවාවන්හි පවතින අවශ්‍යතා හඳුනාගෙන, ප්‍රතිකාර ධාරිතාව ඉහළ නැංවීම සහ රෝගීන්ට ප්‍රතිකාර ලබාගැනීම සඳහා පවතින පොරොත්තු කාලය අවම කිරීම මෙහිදී ප්‍රමුඛ අවධානයට ලක්විය.
මීට පෙර පැවැති කළමනාකරණ සමාලෝචන රැස්වීමේදී ගනු ලැබූ තීන්දු තීරණ ක්‍රියාත්මක කිරීමේ ප්‍රගතිය ද මෙහිදී සමාලෝචනයට ලක්කර තිබේ.
විකිරණ ප්‍රතිකාර සේවාවන් පුළුල් කිරීම සඳහා අත්‍යවශ්‍ය වන නව රේඛීය ත්වරණක යන්ත්‍ර (LINAC) ලබාගැනීම පිළිබඳව ද මෙහිදී විශේෂ අවධානය යොමු විය.
එම යන්ත්‍ර මගින් වැඩි රෝගීන් පිරිසකට කඩිනමින් ප්‍රතිකාර ලබාදීමේ හැකියාව පුළුල් කිරීම සහ දැනට පවතින සේවාවන්හි කාර්යක්ෂමතාව ඉහළ නැංවීම සම්බන්ධයෙන් සාකච්ඡා කර ඇත.
එමෙන්ම විකිරණ ප්‍රතිකාර සඳහා අවශ්‍ය ප්‍රතිකාර සැලසුම් කිරීමේදී භාවිත කරන CT Simulator පහසුකම් විධිමත්ව හා අඛණ්ඩව පවත්වාගෙන යාම, වෛද්‍ය උපකරණ නඩත්තු කිරීම සහ අවශ්‍ය තාක්ෂණික පහසුකම් සම්පූර්ණ කිරීම පිළිබඳව ද මෙහිදී අවධානය යොමුව තිබේ.
විකිරණ ප්‍රතිකාර සේවාවන්හි කාර්යක්ෂමතාව ඉහළ නැංවීම සඳහා විශේෂඥ වෛද්‍යවරුන්, විකිරණ චිකිත්සක තාක්ෂණවේදීන්, වෛද්‍ය භෞතික විද්‍යාඥයන් ඇතුළු තාක්ෂණික හා සහායක කාර්ය මණ්ඩලයේ අවශ්‍යතා ද සමාලෝචනය කර ඇත.
පවතින සේවා අවශ්‍යතා හා කාර්ය මණ්ඩල පුරප්පාඩු සැලකිල්ලට ගනිමින් අවශ්‍ය මානව සම්පත් සපයා ගැනීම සහ සේවා අඛණ්ඩව පවත්වාගෙන යාම සඳහා ගත යුතු ක්‍රියාමාර්ග පිළිබඳව ද සාකච්ඡා වී තිබේ.
මීට අමතරව, මධ්‍යම ඉංජිනේරු උපදේශන කාර්යාංශයේ (CECB) තාක්ෂණික සහාය ඇතිව රෝහල සඳහා නව ප්‍රධාන සැලැස්මක් සකස් කිරීමේ ප්‍රගතිය ද සමාලෝචනයට ලක්විය.
රෝහල් පරිශ්‍රයේ පවතින ඉඩකඩ උපරිම ඵලදායීතාවයකින් යොදාගනිමින්, ඉදිරි ප්‍රතිකාර අවශ්‍යතා හා තාක්ෂණික සංවර්ධනයට ගැළපෙන පරිදි යටිතල පහසුකම් සැලසුම් කිරීමේ වැදගත්කම ද මෙහිදී පෙන්වා දී ඇත.
රෝහලේ අනෙකුත් සායනික හා පරිපාලන සේවාවන්හි කාර්යක්ෂමතාව ඉහළ නැංවීම සඳහා වායුසමීකරණ පද්ධති, වෛද්‍ය උපකරණ නඩත්තුව, සේවා ඩිජිටල්කරණය, අන්තර්ජාල පහසුකම් සහ කාර්ය මණ්ඩලයේ වෘත්තීය ගැටලු සම්බන්ධයෙන් ද සාකච්ඡා කර තිබේ.
අපේක්ෂා රෝහලේ විකිරණ ප්‍රතිකාර සේවාවන්හි ධාරිතාව හා ගුණාත්මකභාවය ඉහළ නැංවීම සඳහා අවශ්‍ය භෞතික හා මානව සම්පත් සපයා දෙමින් හඳුනාගත් සංවර්ධන කටයුතු කඩිනම් කිරීමට අවශ්‍ය පියවර ගන්නා බව නියෝජ්‍ය අමාත්‍යවරයා මෙහිදී අවධාරණය කළේය.
මෙම අවස්ථාවට මහරගම ජාතික පිළිකා ආයතනයේ අධ්‍යක්ෂ විශේෂඥ වෛද්‍ය සුරංග දොලමුල්ල මහතා, නියෝජ්‍ය අධ්‍යක්ෂ විශේෂඥ වෛද්‍ය සංකේතා ෆ්‍රැන්සිස් මහත්මිය ඇතුළු විශේෂඥ වෛද්‍යවරුන්, වෛද්‍යවරුන්, හෙද නිලධාරීන් සහ රෝහල් කාර්ය මණ්ඩලයේ නිලධාරීහු එක්ව සිටියහ.
